কাইলৈ আনুষ্ঠানিকভাৱে বিজেপি দলত যোগদান কৰিব সদ্য কংগ্ৰেছ ত্যাগী নেতা, প্ৰদেশ কংগ্ৰেছৰ প্ৰাক্তন সভাপতি ভূপেন কুমাৰ বৰাই
অসম বিধানসভা নিৰ্বাচনলৈ মাজত মাত্ৰ এটা মাহ । চলিত বছৰৰ এপ্ৰিল মাহত ৰাজ্যৰ ১২৬টা বিধানসভা সমষ্টিৰ বাবে নিৰ্বাচন অনুষ্ঠিত হোৱাৰ পূৰ্ণ সম্ভাৱনা আছে । নিৰ্বাচনৰ বাবে ৰাজ্যৰ প্ৰতিটো ৰাজনৈতিক দলে এতিয়া ককালত টঙালি বান্ধিছে । ইয়াৰ মাজতে ৰাজ্যৰ প্ৰধান বিৰোধী দল কংগ্ৰেছত পদত্যাগৰ জোৱাৰ উঠা পৰিলক্ষিত হৈছে । যাৰ বাবে এতিয়া নিৰ্বাচনৰ প্ৰাকক্ষণত শলঠেকত পৰিছে দলটো ।
২২ ফেব্ৰুৱাৰী, দেওবাৰ ৰাজ্যৰ ৰাজনীতিৰ এটা উল্লেখযোগ্য দিন হিচাবে পৰিগণিত হ’বলৈ গৈ আছে । এই দিনটোতে কংগ্ৰেছ এৰি শ শ লোকে বিজেপি দলত যোগদান কৰিব । বিশেষভাৱে চৰ্চিত বিষয়টো হ’ল যে, কাইলৈ আনুষ্ঠানিকভাৱে বিজেপি দলত যোগদান কৰিব সদ্য কংগ্ৰেছ ত্যাগী নেতা, প্ৰদেশ কংগ্ৰেছৰ প্ৰাক্তন সভাপতি ভূপেন কুমাৰ বৰাই । পুৱা ১০ বজাত বশিষ্ঠস্থিত ৰাজ্যিক বিজেপিৰ মুখ্য কাৰ্যালয়ত ভূপেন কুমাৰ বৰাই আনুষ্ঠানিকভাৱে ভাৰতীয় জনতা পাৰ্টিত যোগদান কৰিব । আগন্তুক বিধানসভা নিৰ্বাচনৰ পূৰ্বে ইয়াক ৰাজ্যৰ ৰাজনীতিৰ এক গুৰুত্বপূৰ্ণ ঘটনা হিচাপে গণ্য কৰা হৈছে ।
এই যোগদান কাৰ্যসূচীত উপস্থিত থাকিব ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্মা । ইয়াৰ উপৰিও বিজেপিৰ ৰাজ্যিক সভাপতি দিলীপ শইকীয়া আৰু দলৰ জ্যেষ্ঠ নেতা বৈজয়ন্ত পাণ্ডাও এই অনুষ্ঠানত উপস্থিত থাকিব ।
ভূপেন বৰাই ইয়াৰ পূৰ্বে ঘোষণা কৰিছিল যে ভাৰতীয় জাতীয় কংগ্ৰেছত ৩২ বছৰ কটোৱাৰ পিছত তেওঁ বিজেপিত যোগদান কৰি এক নতুন ৰাজনৈতিক অধ্যায় আৰম্ভ কৰিব । এই সিদ্ধান্তক তেওঁ দৃঢ়তা আৰু স্পষ্টতাৰে লোৱা এক পদক্ষেপ বুলি অভিহিত কৰিছে ।
ইফালে চৰ্চা অনুসৰি আগন্তুক বিধানসভা নিৰ্বাচনত ভঊপেন বৰাই বিহপুৰীয়া সমষ্টিৰ পৰা প্ৰতিদ্বন্দ্বিতা কৰাৰ সম্ভাৱনা আছে, যদিও তেওঁৰ প্ৰাৰ্থিত্ব সন্দৰ্ভত এতিয়াও কোনো আনুষ্ঠানিক ঘোষণা কৰা হোৱা নাই ।
লগতে পঢ়ক : এতিয়া অসমক কোনেও ৰঙা চকু দেখুৱাব নোৱাৰিবঃ কচুতলীৰ পৰা অবৈধ বাংলাদেশীক হুংকাৰ মুখ্যমন্ত্ৰীৰ
