আলোচনা চলি থকাৰ মাজতে বিৰোধী কংগ্ৰেছ আৰু ৰাইজৰ দলৰ বিধায়কসকলে সদন ত্যাগ কৰি ওলাই যায় যাৰ পিছতে মুখ্যমন্ত্ৰী ড° হিমন্ত বিশ্ব শৰ্মাই কংগ্ৰেছ দলক তীব্ৰ সমালোচনা কৰি তেওঁলোকক মহিলা বিৰোধী বুলি অভিহিত কৰে
অসম বিধানসভাত আজি সংসদ আৰু ৰাজ্যিক বিধানসভাবোৰত মহিলাৰ বাবে ৩৩ শতাংশ সংৰক্ষণ সমৰ্থন কৰি চৰকাৰে উত্থাপন কৰা এক গুৰুত্বপূৰ্ণ প্ৰস্তাৱ ধ্বনি ভোটৰ জৰিয়তে সৰ্বসন্মতিক্ৰমে গৃহীত হয় । অৱশ্যে, এই ঐতিহাসিক প্ৰস্তাৱটোক কেন্দ্ৰ কৰি আজি সদনৰ মজিয়াত তীব্ৰ ৰাজনৈতিক বাকযুদ্ধ আৰু উত্তপ্ত পৰিস্থিতিৰ সৃষ্টি হয় । আলোচনা চলি থকাৰ মাজতে বিৰোধী কংগ্ৰেছ আৰু ৰাইজৰ দলৰ বিধায়কসকলে সদন ত্যাগ কৰি ওলাই যায় (ৱাকআউট কৰে), যাৰ পিছতে মুখ্যমন্ত্ৰী ড° হিমন্ত বিশ্ব শৰ্মাই কংগ্ৰেছ দলক তীব্ৰ সমালোচনা কৰি তেওঁলোকক “মহিলা বিৰোধী” বুলি অভিহিত কৰে ।
অজন্তা নেওগৰ প্ৰস্তাৱ আৰু বিৰোধীৰ ৱাকআউট-
যোৱা সোমবাৰে সদনত মহিলা আৰু শিশু কল্যাণ মন্ত্ৰী অজন্তা নেওগে এই সংকল্প প্ৰস্তাৱটো উত্থাপন কৰিছিল । প্ৰস্তাৱটোত দেশৰ সমষ্টি পুনৰ্নীৰ্ধাৰণ প্ৰক্ৰিয়া সম্পূৰ্ণ হোৱাৰ পিছতে সংসদ আৰু দেশৰ সকলো ৰাজ্যিক বিধানসভাত মহিলাৰ বাবে এক-তৃতীয়াংশ (৩৩ শতাংশ) আসন সংৰক্ষণৰ ব্যৱস্থা তাৎক্ষণিকভাৱে কাৰ্যকৰী কৰিবলৈ কেন্দ্ৰীয় চৰকাৰক আহ্বান জনোৱা হৈছিল ।
আজি এই প্ৰস্তাৱৰ ওপৰত চলি থকা আলোচনাৰ সময়ত বিজেপি বিধায়ক ভৱন পেগুৱে কংগ্ৰেছ দলৰ বিৰুদ্ধে কিছুমান তীক্ষ্ণ মন্তব্য কৰে । ইয়াৰে আপত্তি দৰ্শাই আৰু মুখ্যমন্ত্ৰীয়ে ভাষণ দি থকাৰ মাজতে কংগ্ৰেছ আৰু ৰাইজৰ দলৰ বিধায়কসকলে একাংশ সময়ৰ বাবে সদনৰ পৰা ওলাই যায় । অৱশ্যে, প্ৰস্তাৱটো ভোটদানৰ বাবে গ্ৰহণ কৰাৰ পূৰ্বেই কংগ্ৰেছ বিধায়কসকল পুনৰ সদনলৈ ঘূৰি আহে ।
কংগ্ৰেছক মুখ্যমন্ত্ৰীৰ তীব্ৰ আক্ৰমণ-
সদনৰ আলোচনাত অংশগ্ৰহণ কৰি মুখ্যমন্ত্ৰী হিমন্ত বিশ্ব শৰ্মাই কংগ্ৰেছ দলৰ অতীতৰ ভূমিকাক তীব্ৰ সমালোচনা কৰে । তেওঁ অভিযোগ কৰে যে দীৰ্ঘ বছৰ ধৰি দেশত শাসনৰ গদীত থকাৰ পিছতো কেৱল সদিচ্ছাৰ অভাৱৰ বাবেই কংগ্ৰেছে মহিলা সংৰক্ষণ বিধেয়কখন সংসদত পাছ কৰাব পৰা নাছিল ।
মুখ্যমন্ত্ৰীগৰাকীয়ে আৰু দাবী কৰে যে : পূৰ্বৰ ইউ পি এ (UPA) চৰকাৰৰ দিনত কংগ্ৰেছে নিজৰ মিত্ৰদল যেনে সমাজবাদী পাৰ্টী (SP) আৰু ৰাষ্ট্ৰীয় জনতা দল (RJD)-ৰ বিৰোধিতাৰ ওচৰত আঁঠু লৈছিল আৰু মহিলাৰ অধিকাৰক বলি দিছিল । আজিৰ সদনৰ ভোটদান প্ৰক্ৰিয়াত উপস্থিত নাথাকিবলৈ কংগ্ৰেছ বিধায়কসকলক তেওঁলোকৰ কেন্দ্ৰীয় নেতৃত্বই (হাইকমাণ্ড) গোপন নিৰ্দেশ দিছিল । অৱশ্যে মুখ্যমন্ত্ৰীৰ এই গুৰুতৰ অভিযোগৰ সন্দৰ্ভত কংগ্ৰেছৰ কোনো বিধায়কে সদনত কোনো প্ৰতিক্ৰিয়া বা স্পষ্টীকৰণ প্ৰকাশ নকৰিলে ।
খিলঞ্জীয়াৰ প্ৰতিনিধিত্ব আৰু মহিলাৰ ভূমিকা-
মুখ্যমন্ত্ৰী ড° শৰ্মাই ভাষণ প্ৰসংগত উল্লেখ কৰে যে এই সংৰক্ষণ আৰু সমষ্টি পুনৰ্নীৰ্ধাৰণৰ ফলত অসমৰ ৰাজনীতিত মহিলাৰ অংশগ্ৰহণ বৃদ্ধি পোৱাৰ লগতে ৰাজ্যখনৰ খিলঞ্জীয়া জনগোষ্ঠীসমূহৰ প্ৰতিনিধিত্বও বহু পৰিমাণে সুৰক্ষিত আৰু শক্তিশালী হ’ব । অসমৰ সামাজিক আৰু ঐতিহাসিক প্ৰেক্ষাপটৰ কথা সুঁৱৰি তেওঁ কয় যে অসমৰ সমাজত যুগে যুগে মহিলাসকলে গুৰুত্বপূৰ্ণ নেতৃত্ব দি আহিছে । বৰ্তমান সময়তো আত্মসহায়ক গোটসমূহৰ জৰিয়তে লাখ লাখ মহিলাই ৰাজ্যৰ অৰ্থনীতি আৰু গ্ৰাম্য উন্নয়নত এক বিৰাট ভূমিকা পালন কৰি আছে ।
