চলন্ত বাছত দাও দাওকৈ লাগিল জুই
ৰাজস্থানৰ জয়ছালমেৰ জিলাত মঙলবাৰে বিয়লি এখন চলন্ত বাছত অগ্নিসংযোগ হোৱাৰ ফলত ভয়ংকৰ ঘটনা সংঘটিত হয় । এই দুৰ্ঘটনাত এতিয়ালৈকে ২০ জনতকৈ অধিক যাত্ৰীৰ মৃত্যু হৈছে বুলি জানিব পৰা গৈছে । এই কৰুণ ঘটনাত বাছখনৰ ভিতৰতে বহুকেইজন যাত্ৰী জীৱন্তে অগ্নিদগ্ধ হোৱাৰ বিপৰীতে আন একাংশ যাত্ৰী খিৰিকী ভাঙি পলায়ন কৰিবলৈ সক্ষম হয় । জানিব পৰা মতে, অগ্নিকাণ্ড সংঘটিত হোৱাৰ পিছত বাছখনৰ মূল দুৱাৰ লক হৈ থকাৰ ফলত যাত্ৰীসকল নামিব পৰা নাছিল । বাছখনত মুঠ ৫৭ জন যাত্ৰী আছিল ।
দুৰ্ঘটনাটোৰ পিছত গুৰুতৰভাৱে জ্বলি যোৱা ১৯জন যাত্ৰীক যোধপুৰলৈ প্ৰেৰণ কৰা হয় আৰু তাৰ পিছত ইয়াৰে অধিকাংশই চিকিৎসাৰ সময়ত মৃত্যুমুখত পৰে । জয়ছালমেৰত চাৰিজন আহত লোক চিকিৎসাধীন হৈ আছে আৰু তেওঁলোকৰ অৱস্থা বৰ্তমান সুস্থিৰ বুলি জানিব পৰা গৈছে ।
জানিব পৰা মতে, জয়ছালমেৰৰ পৰা যোধপুৰ অভিমুখে গৈ থকা চলন্ত বাছখনত হঠাতে এ চি ইউনিটত অগ্নিকাণ্ড সংঘটিত হৈ কেইছেকেণ্ডমানৰ ভিতৰতে সমগ্ৰ বাহনখন আগুৰি ধৰে । ঘটনাস্থলীত অগ্নিনিৰ্বাপক বাহিনীৰ দল উপস্থিত হৈ যথেষ্ট কষ্টৰ অন্তত জুই নিয়ন্ত্ৰণলৈ আনে । এই ঘটনাৰ পিছতে বুধবাৰে ৰাজ্যখনৰ মুখ্যমন্ত্ৰীগৰাকীয়ে বিহাৰ ভ্ৰমণ পৰিকল্পনা বাতিল কৰি সাহায্য আৰু উদ্ধাৰৰ পৰিস্থিতিৰ ওপৰত নজৰ ৰাখিছে ।
ক্ষতিপূৰণ ঘোষণা প্ৰধানমন্ত্ৰীৰ-
এই দুৰ্ঘটনাৰ প্ৰতিক্ৰিয়া প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে । তেওঁ এক্সত লিখিছে, “জয়ছালমেৰত সংঘটিত দুৰ্ঘটনাত মই শোক প্ৰকাশ কৰিছোঁ । এই কঠিন সময়ত ক্ষতিগ্ৰস্ত লোক আৰু তেওঁলোকৰ পৰিয়ালৰ সৈতে মোৰ সমবেদনা আছে । আহতসকলৰ আশু আৰোগ্যৰ বাবে প্ৰাৰ্থনা কৰিছো ।” তেওঁ আৰু লিখিছে যে প্ৰধানমন্ত্ৰী ৰাষ্ট্ৰীয় সাহায্য পুঁজিৰ পৰা প্ৰতিজন মৃতকৰ পৰিয়ালক ২ লাখ ক্ষতিপূৰ্ণ প্ৰদান কৰা হ’ব । আহতসকলক দিয়া হ’ব পঞ্চাশ হাজাৰকৈ টকা ।
আনহাতে জয়ছালমেৰ দুৰ্ঘটনাক লৈ শোক প্ৰকাশ কৰিছে মুখ্যমন্ত্ৰী ভজনলাল শৰ্মাই । মুখ্যমন্ত্ৰী ভজনলাল শৰ্মাই জিলা আয়ুক্ত আৰু আৰক্ষী অধীক্ষকৰ সৈতে ফোনযোগে বাৰ্তালাপ কৰি ভুক্তভোগীক সকলো ধৰণৰ সহায় আগবঢ়াবলৈ নিৰ্দেশ দিয়ে । এই মৰ্মান্তিক ঘটনা সন্দৰ্ভত মুখ্যমন্ত্ৰী ভজনলাল শৰ্মাই ধাৰাবাহিকভাৱে প্ৰতিক্ৰিয়া লৈ আছে । লগতে জয়ছালমেৰলৈ ৰাওনা হৈছে মুখ্যমন্ত্ৰী ভজনলাল শৰ্মা ।
লগতে পঢ়ক : শোকাৱহ পথ দুৰ্ঘটনা; দ’ খাৱৈত পৰিল যাত্ৰীবাহী বাছ, ৪২ জনৰ মৃত্যু
