মুখ্যমন্ত্ৰী হিচাপে শপত গ্ৰহণ কৰাৰ পিছতেই একচন মুডত অবতীৰ্ণ হৈছে ড° হিমন্ত বিশ্ব শৰ্মা
মুখ্যমন্ত্ৰী হিচাপে শপত গ্ৰহণ কৰাৰ পিছতেই একচন মুডত অবতীৰ্ণ হৈছে ড° হিমন্ত বিশ্ব শৰ্মা । গুৱাহাটীত অনুষ্ঠিত নতুন চৰকাৰৰ প্ৰথমখন কেবিনেট বৈঠকত ১৩ মে’ত মুখ্যমন্ত্ৰীগৰাকীয়ে কেইবাটাও গুৰুত্বপূৰ্ণ প্ৰশাসনিক সিদ্ধান্ত ঘোষণা কৰে । ৰাজ্য চৰকাৰৰ অনাৱশ্যকীয় ব্যয় হ্ৰাস কৰা আৰু কাম-কাজত অধিক স্বচ্ছতা অনাৰ লক্ষ্যৰে এই সিদ্ধান্তসমূহ গ্ৰহণ কৰা হৈছে ।
বিধানসভাৰ অধিৱেশনৰ সূচী :
মুখ্যমন্ত্ৰীয়ে জানিবলৈ দিয়া মতে, আগন্তুক অসম বিধানসভাৰ অধিৱেশন অহা ২১, ২২, ২৫ আৰু ২৬ মে’ত অনুষ্ঠিত হ’ব । এই অধিৱেশনতে নৱ-নিৰ্বাচিত বিধায়কসকলে আনুষ্ঠানিকভাৱে শপত গ্ৰহণ কৰিব আৰু ৰাজ্যপালে সদনত ভাষণ প্ৰদান কৰিব । উল্লেখ্য যে, এই অধিৱেশনৰ বাবে চন্দ্ৰমোহন পাটোৱাৰীক সাময়িক অধ্যক্ষ (Protem Speaker) হিচাপে নিযুক্তি দিবলৈ ৰাজ্যপালক অনুৰোধ জনোৱা হৈছে ।
ব্যয় সংকুচনৰ বাবে পদক্ষেপ : ৰাজ্যৰ আৰ্থিক বোজা হ্ৰাস কৰিবলৈ কেবিনেটে অনাগত ছয় মাহৰ বাবে কঠোৰ পদক্ষেপ লৈছে । সেই অনুসৰি :
কনভয় হ্ৰাস : মুখ্যমন্ত্ৰী, ৰাজ্যপাল আৰু সকলো মন্ত্ৰীৰ নিৰাপত্তা বাহিনীৰ বাহন বা কনভয়ৰ সংখ্যা হ্ৰাস কৰা হ’ব ।
বিদেশী সামগ্ৰীৰ ওপৰত নিষেধাজ্ঞা : অহা ছয় মাহলৈ চৰকাৰী কাৰ্যালয়ৰ বাবে কোনো বিদেশী সামগ্ৰী আমদানি কৰা নহ’ব ।
ডিজিটেল বৈঠকত গুৰুত্ব : চৰকাৰী বিভাগসমূহে কোনো ধৰণৰ শাৰীৰিক আলোচনা চক্ৰ বা কৰ্মশালা অনুষ্ঠিত কৰিব নোৱাৰিব । ইয়াৰ পৰিৱৰ্তে ভিডিও কনফাৰেন্সিঙৰ জৰিয়তেহে সকলো সভা সম্পন্ন কৰিব লাগিব ।
কেবিনেট সম্প্ৰসাৰণৰ ইংগিত : সংবাদ মাধ্যমৰ সৈতে হোৱা বাৰ্তালাপত মুখ্যমন্ত্ৰীয়ে স্পষ্ট কৰে যে মন্ত্ৰীসকলৰ দপ্তৰ এতিয়াও ঘোষণা কৰা হোৱা নাই । বিধানসভাৰ অধিৱেশন সমাপ্ত হোৱাৰ পিছতহে কেবিনেট সম্প্ৰসাৰণ কৰা হ’ব বুলি তেওঁ জানিবলৈ দিয়ে ।
নতুন চৰকাৰৰ এই জনহিতকৰ তথা মিতব্যয়ী পদক্ষেপে ৰাজ্যৰ প্ৰশাসনিক ব্যৱস্থাত এক নতুন গতি প্ৰদান কৰিব বুলি আশা কৰা হৈছে ।
লগতে পঢ়ক : নতুন চৰকাৰৰ কঠোৰ পদক্ষেপ : অহা ৬ মাহৰ বাবে মন্ত্ৰী-বিষয়াৰ বিদেশ ভ্ৰমণ নিষিদ্ধ
