নিজৰ সাহস আৰু দৃঢ়তাৰে বলত ১ ফেব্ৰুৱাৰীত দক্ষিণ আমেৰিকাৰ সৰ্বোচ্চত সফলতাৰে আৰোহণ কৰি ইতিহাস সৃষ্টি কৰে অৰুণাচলৰ কাবাক ইয়ানোৱে ।
অৰুণাচল প্ৰদেশৰ পৰ্বতাৰোহী কাবাক ইয়ানোৱে নিজৰ সাহস আৰু দৃঢ়তাৰে বলত ১ ফেব্ৰুৱাৰীত দক্ষিণ আমেৰিকাৰ সৰ্বোচ্চ শৃংগ মাউণ্ট একনকাগুয়া (আৰ্জেন্টিনা)ত সফলতাৰে আৰোহণ কৰি ইতিহাস ৰচনা কৰে । ২২,৮৩১ ফুট উচ্চতাৰ এই পৰ্বতটোক পশ্চিম গোলাৰ্ধৰ সৰ্বোচ্চ শৃংগ হিচাপে জনা যায় আৰু অভিজ্ঞ পৰ্বতাৰোহীৰ বাবেও ই যথেষ্ঠ প্ৰত্যাহ্বানমূলক ।
এই ঐতিহাসিক সাফল্যৰ বাবে ৰাজ্যপাল লেফটেনেণ্ট জেনেৰেল কে টি পাৰ্নাইকে কাবাক ইয়ানোক অভিনন্দন জ্ঞাপন কৰে । তেওঁ কয় যে এই সফলতা অৰুণাচল প্ৰদেশৰ যুৱক-যুৱতীসকলৰ বাবে প্ৰেৰণাৰ উৎস আৰু অনুশাসন, আত্মবিশ্বাস আৰু নিৰন্তৰ প্ৰচেষ্টাৰে কঠিন লক্ষ্যতো উপনীত হ’ব পৰা যায় ।
কাবাক ইয়ানোৰ এই অভিযান ‘৭-ছামিট মাউণ্টেইনিং এক্সপেডিচন’ৰ অংশ, য’ত বিশ্বৰ সাতখন মহাদেশৰ সৰ্বোচ্চ শৃংগ আৰোহণ অন্তৰ্ভূক্ত আছে । ইয়াৰ পূৰ্বে তেওঁ ২০২৫ চনৰ ৪ আগষ্টত আফ্ৰিকাৰ মাউণ্ট কিলিমাঞ্জাৰো আৰু ২০২৫ চনৰ ১৬ আগষ্টত ইউৰোপৰ মাউণ্ট এলব্ৰাছত সফলতাৰে আৰোহণ কৰিছিল । কাবাক ইয়ানোৰ এই সাফল্যই অৰুণাচল প্ৰদেশৰ যুৱক-যুৱতীসকলক ক্ৰীড়া, দুঃসাহসিক অভিযান, পৰ্বতাৰোহণৰ বাবে অনুপ্ৰাণিত কৰিব বুলি কয় । লগতে যুৱক-যুৱতীসকলৰ মাজত ক্ৰীড়া আৰু দুঃসাহসিক ক্ৰীড়াৰ প্ৰসাৰৰ বাবে প্ৰশাসনৰ দায়বদ্ধতাক পুনৰ উল্লেখ কৰে ।
উল্লেখযোগ্য যে ২০২৫ চনৰ ২৮ জুলাইত ৰাজ্যপালগৰাকীয়ে ইটানগৰৰ লোকভৱনৰ পৰা কাবাক ইয়ানোৰ ‘৭-ছামিট মাউণ্টেইনিং এক্সপেডিচন’ক আনুষ্ঠানিকভাৱে ফ্লেগ অফ কৰিছিল । এই অনুষ্ঠানত ক্ৰীড়া আৰু যুৱ পৰিক্ৰমা বিভাগৰ ৰাজ্যিক মন্ত্ৰী কেণ্টো জিনিও উপস্থিত আছিল ।
‘৭-ছামিট মাউণ্টেইনিং এক্সপেডিচন’ত এছিয়াৰ মাউণ্ট এভাৰেষ্ট, দক্ষিণ আমেৰিকাৰ একনকাগুয়া, উত্তৰ আমেৰিকাৰ ডেনালি, আফ্ৰিকাৰ কিলিমাঞ্জাৰো, ইউৰোপৰ এলব্ৰাছ, এন্টাৰ্কটিকাৰ ভিনছন মেছিফ আৰু অ’চেনিয়াৰ পাঞ্চক জয়া বা মাউণ্ট কচচিউস্কো আৰোহণ অন্তৰ্ভূক্ত আছে । এই বিৰল কৃতিত্ব এতিয়ালৈকে নিৰ্বাচিত কেইগৰাকীমান পৰ্বতাৰোহীয়েহে লাভ কৰিছে ।
লগতে পঢ়ক : উত্তৰ-পূবৰ বাবে চৰকাৰৰ বৃহৎ পৰিকল্পনা… ‘চিকেন নেক’ত চলিব ভূগৰ্ভস্থ ৰে’ল
