২০২৫ চনৰ ৭ মে’ত পহলগাম আক্ৰমণৰ পাছতেই ভাৰতীয় সেনাই এই বৃহৎ অভিযান আৰম্ভ কৰিছিল
২০২৫ চনৰ পহলগাম সন্ত্ৰাসবাদী আক্ৰমণৰ প্ৰত্যুত্তৰত ভাৰতীয় সেনাই চলোৱা ঐতিহাসিক ‘অপাৰেচন সিন্দুৰ’ৰ আজি এবছৰ সম্পূৰ্ণ হ’ল । এই বিশেষ দিনটোত কেন্দ্ৰীয় গৃহমন্ত্ৰী অমিত শ্বাহে দেশৰ সশস্ত্ৰ বাহিনীৰ বীৰত্বক প্ৰশংসা কৰি ইয়াক এক “যুগান্তকাৰী অভিযান” বুলি অভিহিত কৰে ।
গৃহমন্ত্ৰীৰ হুংকাৰ-
সামাজিক মাধ্যম ‘এক্স’ত এক পোষ্টযোগে অমিত শ্বাহে কয় যে অপাৰেচন সিন্দুৰে ভাৰতৰ সামৰিক শক্তি, চোৰাংচোৱা দক্ষতা আৰু দৃঢ় ৰাজনৈতিক ইচ্ছাশক্তিৰ একত্ৰিত প্ৰতিফলন ঘটাইছে । তেওঁ সতৰ্ক কৰি দি কয়, “আমাৰ শত্ৰুবোৰে য’তেই আত্মগোপন নকৰক কিয়, তেওঁলোক সাৰি যাব নোৱাৰিব । তেওঁলোক সদায় আমাৰ দৃষ্টিত আৰু আমাৰ অগ্নিশক্তিৰ তীব্ৰ ক্ৰোধৰ মাজত আছে ।”
কটকটীয়া নিৰাপত্তা আৰু শ্ৰদ্ধাঞ্জলি-
অপাৰেচনৰ বৰ্ষপূৰ্তিৰ পৰিপ্ৰেক্ষিতত জম্মু-কাশ্মীৰৰ পুঞ্চকে ধৰি বিভিন্ন স্পৰ্শকাতৰ স্থানত নিৰাপত্তা ব্যৱস্থা অধিক কটকটীয়া কৰা হৈছে । পহলগাম আক্ৰমণত প্ৰাণ হেৰুওৱা ২৬ জন লোক আৰু দেশৰ হকে আত্মবলিদান দিয়া জোৱানসকলৰ প্ৰতি সমগ্ৰ দেশজুৰি শ্ৰদ্ধাঞ্জলি জ্ঞাপন কৰা হয় ।
অপাৰেচন সিন্দুৰ-
২০২৫ চনৰ ৭ মে’ত পহলগাম আক্ৰমণৰ পাছতেই ভাৰতীয় সেনাই এই বৃহৎ অভিযান আৰম্ভ কৰিছিল । এই অভিযানত :
-পাকিস্তান আৰু পিঅ’কেত থকা লস্কৰ-ই-তৈবা, জয়শ-ই-মহম্মদ আৰু হিজবুল মুজাহিদিনৰ ৯ টা সন্ত্ৰাসবাদী লঞ্চপেড ধ্বংস কৰা হৈছিল ।
-সেনাই প্ৰায় ১০০ৰো অধিক সন্ত্ৰাসবাদীক নিধন কৰিছিল ।
-চাৰিদিন ধৰি চলা এই তীব্ৰ সংঘাতৰ পাছত ১০ মে’ত দুয়ো দেশৰ সামৰিক অভিযানৰ সঞ্চালক প্ৰধানৰ (DGMO) আলোচনামৰ্মে যুদ্ধবিৰতি ঘোষণা কৰা হৈছিল ।
প্ৰতিৰক্ষা মন্ত্ৰী ৰাজনাথ সিঙেও আজিৰ দিনটোত সশস্ত্ৰ বাহিনীক চেল্যুট জনাই কয় যে অপাৰেচন সিন্দুৰ ভাৰতৰ সামৰিক শক্তিৰ এক অনন্য প্ৰতীক হৈ ৰ’ব ।
