প্ৰতিটো আঙঠিৰ এফালে ফিফা বিশ্বকাপৰ ট্ৰফী খোদিত থকাৰ বিপৰীতে আনটো ফাল বিজয়ী দলটোৰ পৰিচয় আৰু ঐতিহ্য প্ৰতিফলিত কৰাকৈ কাষ্টমাইজ কৰা হ’ব
ফুটবল বিশ্বকাপৰ ইতিহাসত পোনপ্ৰথমবাৰৰ বাবে পূৰ্বে নোহোৱা এক পৰম্পৰাৰ সূচনা কৰিবলৈ সাজু হৈছে বিশ্ব ফুটবলৰ সৰ্বোচ্চ সংস্থা ফিফা (FIFA) । ২০২৬ চনৰ ফিফা বিশ্বকাপৰ ফাইনেলত বিজয়ী দলটোক আইকনিক স্বৰ্ণিল ট্ৰফী আৰু সোণৰ পদকৰ উপৰিও প্ৰদান কৰা হ’ব বিশেষভাৱে অৰ্ডাৰ দি প্ৰস্তুত কৰা “চেম্পিয়নশ্বিপ আঙঠি” (Bespoke Championship Rings) । ফিফাৰ ৱেবছাইট অনুসৰি, ইয়াৰ পূৰ্বে ফিফাৰ কোনো প্ৰতিযোগিতাতে এনেধৰণৰ পুৰস্কাৰ আগবঢ়োৱা হোৱা নাই ।
আমেৰিকাৰ ক্ৰীড়াজগতৰ এক পুৰণি আৰু জনপ্ৰিয় পৰম্পৰাৰ দ্বাৰা অনুপ্ৰাণিত হৈ এই পদক্ষেপ গ্ৰহণ কৰা হৈছে । অহা ১৯ জুলাই, দেওবাৰে (স্থানীয় সময় অনুসৰি) নিউয়ৰ্ক নিউ জাৰ্চি ষ্টেডিয়ামত অনুষ্ঠিত হ’বলগীয়া স্পেইন আৰু আৰ্জেন্টিনাৰ মাজৰ মেগা ফাইনেল খেলখনৰ সামৰণিৰ পিছতে চেম্পিয়ন দলটোক এই বিশেষ আঙঠিসমূহ প্ৰদান কৰা হ’ব ।
মাত্ৰ ২,০২৬ টা আঙঠি আৰু অনন্য ডিজাইন
এই ঐতিহাসিক টুৰ্নামেণ্টখন স্মৰণীয় কৰি ৰাখিবলৈ মুঠ ২,০২৬ টা সুকীয়া নম্বৰযুক্ত আঙঠি প্ৰস্তুত কৰাৰ সিদ্ধান্ত লোৱা হৈছে । ইয়াৰে ৩০ টা আঙঠি বিজয়ী দলৰ খেলুৱৈ আৰু সদস্যসকলৰ বাবে সংৰক্ষিত থাকিব । বাকী ১,৯৯৬ টা আঙঠি বিশ্বজুৰি ফুটবল অনুৰাগীসকলৰ বাবে ‘অফিচিয়েল লাইচেঞ্চড প্ৰডাক্ট’ হিচাপে মুকলি কৰা হ’ব ।
প্ৰতিটো আঙঠিৰ এফালে ফিফা বিশ্বকাপৰ ট্ৰফী খোদিত থকাৰ বিপৰীতে আনটো ফাল বিজয়ী দলটোৰ পৰিচয় আৰু ঐতিহ্য প্ৰতিফলিত কৰাকৈ কাষ্টমাইজ কৰা হ’ব । প্ৰতিটো আঙঠিতে একক নম্বৰ থকাৰ লগতে ইয়াৰ সৈতে এটা সত্যতাৰ প্ৰমাণপত্ৰও প্ৰদান কৰা হ’ব ।
খেলৰ শেষত অনুষ্ঠিত হ’বলগীয়া বিজয় উৎসৱৰ সময়ত কেৱল বিজয়ী দলৰ অধিনায়ক আৰু মুখ্য প্ৰশিক্ষকক সাময়িকভাৱে দুটা আঙঠি দিয়া হ’ব । পৰৱৰ্তী সময়ত সকলো খেলুৱৈৰে হাতৰ সঠিক জোখ লৈ চূড়ান্তভাৱে ৩০ টা আঙঠি কাষ্টম-মেড হিচাপে সাজু কৰি আনুষ্ঠানিকভাৱে খেলুৱৈসকলৰ হাতত অৰ্পণ কৰা হ’ব ।
লগতে পঢ়ক : ফিফা বিশ্বকাপৰ সামৰণি অনুষ্ঠানত কোনে কোনে পৰিৱেশন কৰিব অনুষ্ঠান?
