স্লোভাকিয়াই স্বাধীনতা লাভ কৰাৰ পিছত দেশখন ভ্ৰমণ কৰা নৰেন্দ্ৰ মোদীয়েই হৈছে প্ৰথমগৰাকী ভাৰতীয় প্ৰধানমন্ত্ৰী
প্ৰধানমন্ত্ৰী নৰেন্দ্ৰ মোদীক স্লোভাকিয়াৰ সৰ্বোচ্চ অসামৰিক সন্মান ‘অৰ্ডাৰ অব্ দ্য হোৱাইট ডাবল ক্ৰছ’ (প্ৰথম শ্ৰেণী) প্ৰদান কৰা হৈছে । স্লোভাকিয়া গণৰাজ্যৰ ৰাজধানী ব্ৰাটিশ্লাভাত অনুষ্ঠিত এক বিশেষ অনুষ্ঠানত ৰাষ্ট্ৰপতি পিটাৰ পেলেগ্ৰিনিয়ে প্ৰধানমন্ত্ৰী মোদীক এই সন্মানেৰে বিভূষিত কৰে । কোনো বিদেশী ৰাষ্ট্ৰই প্ৰধানমন্ত্ৰী মোদীক প্ৰদান কৰা এইটো হৈছে ৩৩ সংখ্যক গোলকীয় সন্মান ।
উল্লেখ্য যে, স্লোভাকিয়াই স্বাধীনতা লাভ কৰাৰ পিছত দেশখন ভ্ৰমণ কৰা নৰেন্দ্ৰ মোদীয়েই হৈছে প্ৰথমগৰাকী ভাৰতীয় প্ৰধানমন্ত্ৰী ।
কিয় প্ৰদান কৰা হ’ল এই সৰ্বোচ্চ সন্মান ?
‘অৰ্ডাৰ অব্ দ্য হোৱাইট ডাবল ক্ৰছ’ হৈছে স্লোভাকিয়াৰ আটাইতকৈ মৰ্যাদাপূৰ্ণ অসামৰিক অলংকাৰ । সাধাৰণতে স্লোভাকিয়াৰ সৈতে দ্বিপাক্ষিক আৰু বন্ধুত্বপূৰ্ণ সম্পৰ্ক সুদৃঢ় কৰা, দেশখনৰ বৈদেশিক নীতিক সমৰ্থন কৰা আৰু আন্তঃৰাষ্ট্ৰীয় পৰ্যায়ত স্লোভাকিয়াৰ স্থিতি শক্তিশালী কৰাৰ ক্ষেত্ৰত আগবঢ়োৱা অসাধাৰণ অৱদানৰ বাবে বিদেশী ৰাষ্ট্ৰপ্ৰধান বা বিশিষ্ট ব্যক্তিসকলক ৰাষ্ট্ৰপতিৰ দ্বাৰা এই বঁটা প্ৰদান কৰা হয় । ভাৰতৰ বৈদেশিক পৰিক্ৰমা মন্ত্ৰালয়ে জনোৱা মতে, এই সন্মানে ভাৰত আৰু স্লোভাকিয়াৰ মাজত ক্ৰমান্বয়ে বৃদ্ধি পোৱা অংশীদাৰিত্ব আৰু ঘনিষ্ঠতাক প্ৰতিফলিত কৰিছে ।
দেশবাসীলৈ সন্মান উৎসৰ্গা প্ৰধানমন্ত্ৰীৰ
এই ঐতিহাসিক সন্মান লাভ কৰাৰ পিছত প্ৰধানমন্ত্ৰী মোদীয়ে ছচিয়েল মিডিয়া প্লেটফৰ্ম ‘এক্স’ত (X) এক পোষ্টযোগে আনন্দ প্ৰকাশ কৰে । তেওঁ লিখে :
“আজি সন্ধিয়া ব্ৰাটিশ্লাভাত ‘দ্য অৰ্ডাৰ অব্ দ্য হোৱাইট ডাবল ক্ৰছ’ (প্ৰথম শ্ৰেণী) লাভ কৰি মই নথৈ আনন্দিত হৈছোঁ । এই সন্মানৰ বাবে স্লোভাকিয়াৰ ৰাইজ আৰু চৰকাৰক মই কৃতজ্ঞতা জ্ঞাপন কৰিছোঁ, যিটো ভাৰতৰ ১৪০ কোটি জনসাধাৰণৰ প্ৰাপ্য । মই এই বঁটাটো ভাৰত আৰু স্লোভাকিয়াৰ মাজৰ চিৰস্থায়ী বন্ধুত্বৰ নামত উৎসৰ্গা কৰিছোঁ ।”
উচ্চস্তৰীয় বৈঠক আৰু ভাৰতীয় প্ৰতিনিধি দল
ব্ৰাটিশ্লাভাৰ ৰাষ্ট্ৰপতি ভৱনত উপস্থিত হোৱাৰ লগে লগে প্ৰধানমন্ত্ৰী মোদীক এক সামৰিক ‘গাৰ্ড অব্ অনাৰ’ আৰু আনুষ্ঠানিক উষ্ম আদৰণি জনোৱা হয় । ইয়াৰ পিছতে ৰাষ্ট্ৰপতি পেলেগ্ৰিনিৰ সৈতে এক উচ্চস্তৰীয় প্ৰতিনিধি পৰ্যায়ৰ দ্বিপাক্ষিক বৈঠক অনুষ্ঠিত হয় ।
যোগ দিৱস আৰু ‘বাৰাণসী’ প্ৰদৰ্শনী
আগন্তুক ২১ জুনত উদযাপন হ’বলগীয়া আন্তঃৰাষ্ট্ৰীয় যোগ দিৱসৰ প্ৰস্তুতিৰ অংশ হিচাপে স্লোভাকিয়াৰ ৰাষ্ট্ৰপতি ভৱনত এক বিশেষ যোগাসন কাৰ্যসূচীৰ আয়োজন কৰা হৈছিল । প্ৰধানমন্ত্ৰী মোদী আৰু ৰাষ্ট্ৰপতি পেলেগ্ৰিনিয়ে একেলগে এই যোগ সত্ৰ পৰিদৰ্শন কৰে ।
ইয়াৰ উপৰিও, ৰাষ্ট্ৰপতি ভৱনত প্ৰধানমন্ত্ৰী মোদীৰ সংসদীয় সমষ্টি ‘বাৰাণসী’ৰ (কাশী) আধ্যাত্মিক আৰু সাংস্কৃতিক ঐতিহ্যৰ দ্বাৰা অনুপ্ৰাণিত এক ব্যতিক্ৰমী চিত্ৰ তথা কলা প্ৰদৰ্শনীৰো আয়োজন কৰা হয় । ৰাষ্ট্ৰপতি পেলেগ্ৰিনিয়ে নিজেই প্ৰধানমন্ত্ৰী মোদীক এই প্ৰদৰ্শনী ঘূৰি দেখুৱায় ।
প্ৰধানমন্ত্ৰী ৰবাৰ্ট ফিকোৰ সৈতে বৈঠক
ইউৰোপ ভ্ৰমণৰ এই দ্বিতীয়টো পৰ্যায়ত প্ৰধানমন্ত্ৰী মোদীয়ে ঐতিহাসিক ব্ৰাটিশ্লাভা দুৰ্গত স্লোভাকিয়াৰ প্ৰধানমন্ত্ৰী ৰবাৰ্ট ফিকোকো সাক্ষাৎ কৰে । দুয়োগৰাকী বিশ্বনেতাই আনুষ্ঠানিক বৈঠকত বহাৰ পূৰ্বে দুৰ্গটোত থকা আন এক কলা প্ৰদৰ্শনী উপভোগ কৰে আৰু বাণিজ্য, প্ৰযুক্তি তথা জনসাধাৰণৰ মাজৰ পাৰস্পৰিক সম্পৰ্ক অধিক মজবুত কৰাৰ সংকল্প লয় ।
লগতে পঢ়ক : ‘ভাৰত ইনোভেটছ’ৰ উদ্বোধনৰ পূৰ্বে প্ৰধানমন্ত্ৰী মোদীক সাৱটি উষ্ম আদৰণি ফ্ৰান্সৰ ৰাষ্ট্ৰপতিৰ
