তিনিদিনীয়া কাৰ্যসূচীৰে ১৪ জুনৰ পৰা ১৬ জুনলৈ অনুষ্ঠিত হ’বলগীয়া এই মেগা সন্মিলনখন ভাৰতৰ প্ৰধানমন্ত্ৰী নৰেন্দ্ৰ মোদী আৰু ফ্ৰান্সৰ ৰাষ্ট্ৰপতি ইমানুৱেল মেক্ৰনে যুটীয়াভাৱে উদ্বোধন কৰে
প্ৰযুক্তি আৰু উদ্ভাৱনক মূল বিষয়বস্তু হিচাপে লৈ আজি ফ্ৰান্সৰ নিচ (Nice) চহৰত উলহ-মালহেৰে আৰম্ভ হৈছে ঐতিহাসিক ‘ভাৰত ইনোভেটছ ২০২৬’ সন্মিলন । তিনিদিনীয়া কাৰ্যসূচীৰে ১৪ জুনৰ পৰা ১৬ জুনলৈ অনুষ্ঠিত হ’বলগীয়া এই মেগা সন্মিলনখন ভাৰতৰ প্ৰধানমন্ত্ৰী নৰেন্দ্ৰ মোদী আৰু ফ্ৰান্সৰ ৰাষ্ট্ৰপতি ইমানুৱেল মেক্ৰনে যুটীয়াভাৱে উদ্বোধন কৰে ।
উষ্ম আদৰণি আৰু দ্বিপাক্ষিক বৈঠক :
দেওবাৰে নিচত উপস্থিত হোৱাৰ লগে লগে প্ৰধানমন্ত্ৰী নৰেন্দ্ৰ মোদীক ফ্ৰান্সৰ ৰাষ্ট্ৰপতি ইমানুৱেল মেক্ৰনে উষ্ম আদৰণি জনায় । এক গুৰুত্বপূৰ্ণ দ্বিপাক্ষিক বৈঠকৰ পূৰ্বে দুয়োগৰাকী বিশ্ব নেতাই ইজনে সিজনক সাৱটি ধৰি আৰু কৰমৰ্দন কৰি অভিবাদন বিনিময় কৰে ।
গোলকীয় মঞ্চত ভাৰতীয় ষ্টাৰ্টআপ-
‘ভাৰত ইনোভেটছ’ হৈছে এনে এক বৃহৎ গোলকীয় মঞ্চ, যিয়ে ভাৰত, ফ্ৰান্স আৰু বিশ্বৰ অন্যান্য প্ৰান্তৰ অগ্ৰণী ষ্টাৰ্টআপ তথা ভেঞ্চাৰ কেপিটেল ফাণ্ডসমূহক একেটা চালিৰ তললৈ আনিছে । বৰ্তমান চলি থকা ‘ভাৰত-ফ্ৰান্স উদ্ভাৱন বৰ্ষ’ৰ অংশ হিচাপে এই হাই-প্ৰফাইল অনুষ্ঠানটোক এক গুৰুত্বপূৰ্ণ মাইলৰ খুঁটি হিচাপে গণ্য কৰা হৈছে । এই সন্মিলনে ভাৰতীয় উদ্ভাৱকসকলক গোলকীয় বিনিয়োগকাৰী, উদ্যোগ জগতৰ শীৰ্ষ নেতা আৰু শৈক্ষিক প্ৰতিষ্ঠানসমূহৰ সৈতে পোনপটীয়াকৈ সংযোগ স্থাপনৰ এক শক্তিশালী সুযোগ প্ৰদান কৰিব ।
প্ৰযুক্তি আৰু অংশীদাৰিত্বৰ নতুন শিখৰ: প্ৰধানমন্ত্ৰী মোদী আৰু ৰাষ্ট্ৰপতি মেক্ৰনৰ এই যুটীয়া পদক্ষেপে ভাৰত-ফ্ৰান্সৰ ক্ৰমবৰ্ধমান সম্পৰ্কত প্ৰযুক্তিৰ গুৰুত্বক পুনৰ প্ৰমাণিত কৰিছে । শেহতীয়া বছৰবোৰত দুয়োখন দেশৰ মাজত প্ৰতিৰক্ষা আৰু মহাকাশ খণ্ডৰ পৰা আৰম্ভ কৰি ডিজিটেল প্ৰযুক্তি আৰু কৃত্ৰিম বুদ্ধিমত্তা (AI) লৈকে সহযোগিতা গভীৰ হৈ পৰিছে ।
ভাৰতৰ বিশাল অংশগ্ৰহণ: এই সন্মানীয় অনুষ্ঠানত ভাৰতৰ তৰফৰ পৰা ১২০ টাতকৈও অধিক প্ৰতিশ্ৰুতিবান ‘ডিপ-টেক’ ষ্টাৰ্টআপ আৰু দেশৰ প্ৰথম শাৰীৰ আইআইটি আদিকে ধৰি ১৫ টাতকৈও অধিক উচ্চ শিক্ষা তথা গৱেষণা প্ৰতিষ্ঠানে অংশগ্ৰহণ কৰিছে । এই সন্মিলনে অনাগত দিনত ভাৰত আৰু ফ্ৰান্সৰ প্ৰযুক্তিগত অংশীদাৰিত্বক এক নতুন মাত্ৰা প্ৰদান কৰিব বুলি আশা কৰা হৈছে ।
লগতে পঢ়ক : ফ্ৰান্সত উপস্থিত প্ৰধানমন্ত্ৰী মোদী; বিমানবন্দৰৰ পৰা হোটেললৈ উষ্ম আদৰণি
