কুমাও ৰেজিমেণ্ট তথা ৫০ সংখ্যক ৰাষ্ট্ৰীয় ৰাইফলছ বেটেলিয়নৰ কৰ্তব্যৰত মেজৰ ভাৰ্গৱ কলিতাক দেশৰ অন্যতম সৰ্বোচ্চ শান্তিকালীন বীৰত্ব বঁটা শৌৰ্য চক্ৰ প্ৰদান কৰা হৈছে
সমগ্ৰ অসমবাসীৰ বাবে এক গৌৰৱোজ্জ্বল খবৰ । ভাৰতীয় সেনাৰ কুমাও ৰেজিমেণ্ট তথা ৫০ সংখ্যক ৰাষ্ট্ৰীয় ৰাইফলছ বেটেলিয়নৰ কৰ্তব্যৰত অসম সন্তান মেজৰ ভাৰ্গৱ কলিতাক দেশৰ অন্যতম সৰ্বোচ্চ শান্তিকালীন বীৰত্ব বঁটা ‘শৌৰ্য চক্ৰ’ প্ৰদান কৰা হৈছে । জম্মু-কাশ্মীৰত সন্ত্ৰাসবাদ বিৰোধী অভিযানত দেখুওৱা ব্যতিক্ৰমী সাহস, আদৰ্শগত নেতৃত্ব আৰু অসাধাৰণ যুদ্ধকৌশলৰ স্বীকৃতি স্বৰূপে অসম সন্তানজনক এই সন্মানীয় বঁটাৰে বিভূষিত কৰা হয় ।
কেইবাটাও সফল অভিযানৰ নেতৃত্ব :
প্ৰকাশিত এক চৰকাৰী প্ৰেছ বিজ্ঞপ্তি অনুসৰি, ২০২২ চনৰ অক্টোবৰ মাহৰ পৰাই মেজৰ ভাৰ্গৱ কলিতাই উপত্যকাটোত কেইবাটাও গুৰুত্বপূৰ্ণ আৰু সফল অভিযানৰ সক্ৰিয় নেতৃত্ব দি আহিছে । তেওঁৰ বলিষ্ঠ নেতৃত্বত এতিয়ালৈকে তিনিজন কুখ্যাত সন্ত্ৰাসবাদীক ধৰাশায়ী কৰা হৈছে আৰু চাৰিটা কট্টৰ ‘অ’ভাৰ গ্ৰাউণ্ড ৱৰ্কাৰ’ক আটক কৰা সম্ভৱ হৈছে । অঞ্চলটোত শান্তি আৰু সুৰক্ষা বজায় ৰখাৰ ক্ষেত্ৰত এই অসম সন্তানজনৰ অদম্য নিষ্ঠাই এক গুৰুত্বপূৰ্ণ ভূমিকা পালন কৰি আহিছে ।
২০২৪ চনৰ ২ ডিচেম্বৰৰ সেই ৰুদ্ধশ্বাস অভিযান :
২০২৪ চনৰ ২ ডিচেম্বৰত লাভ কৰা এক জৰুৰী তথা গোপন চোৰাংচোৱা তথ্যৰ ভিত্তিত মেজৰ কলিতাই এটা অতি বিপজ্জনক সন্ত্ৰাসবাদীৰ বিৰুদ্ধে এক সুপৰিকল্পিত এম্বুছ ৰচনা কৰিছিল । নিজৰ অসাধাৰণ যুদ্ধকৌশল প্ৰদৰ্শন কৰি তেওঁ শত্ৰুপক্ষই গম নোপোৱাকৈ নিজৰ দলটোক মোতায়েন কৰিছিল আৰু সন্ত্ৰাসবাদীটোৰ নিৰ্ধাৰিত লক্ষ্যস্থানত প্ৰৱেশ কৰালৈ ধৈৰ্য্যৰে অপেক্ষা কৰিছিল ।
অদম্য সাহসৰ পৰিচয় :
নিচেই ওচৰৰ পৰা সেনাৰ প্ৰত্যাহ্বানৰ সন্মুখীন হৈ সন্ত্ৰাসবাদীটোৱে ধাৰাষাৰ গুলীবৰ্ষণ কৰি পলাই যাবলৈ চেষ্টা চলাইছিল । কিন্তু অলপো বিচলিত নহৈ মেজৰ কলিতাই অতি নিখুঁতভাৱে প্ৰত্যুত্তৰ দিয়ে আৰু চতুৰতাৰে শত্ৰুৰ সকলো পলায়নৰ পথ বন্ধ কৰি দিয়ে । সন্ত্ৰাসবাদীটো যাতে কোনোমতে সাৰি যাব নোৱাৰে, তাৰ বাবে তেওঁ নিজৰ দলটোক নিৰন্তৰ চকু ৰাখিবলৈ আৰু প্ৰতি আক্ৰমণ চলাবলৈ নিৰ্দেশ দিয়ে ।
সন্মুখ সমৰত ধৰাশায়ী ‘A++’ শ্ৰেণীৰ সন্ত্ৰাসবাদী :
চৰম বিপদৰ মাজতো নিজৰ জীৱনক তুচ্ছ জ্ঞান কৰি মেজৰ কলিতাই আত্মগোপন কৰি থকা সন্ত্ৰাসবাদীটোৰ দিশে বগাই গৈছিল । প্ৰৱল মনোবল প্ৰদৰ্শন কৰি তেওঁ সন্ত্ৰাসবাদীটোৰৰ ওপৰত জঁপিয়াই পৰে আৰু চকুৰ পচাৰতে হোৱা তীব্ৰ সন্মুখ সমৰত তাক থিতাতে নিহত কৰে ।
বিজ্ঞপ্তিটোত উল্লেখ কৰা অনুসৰি, নিহত সন্ত্ৰাসবাদীটো আছিল এটা মোষ্ট ৱান্টেড ‘A++’ শ্ৰেণীৰ সন্ত্ৰাসবাদী, যি সাতজন নিৰীহ নাগৰিকৰ নৃশংস হত্যা আৰু নিৰাপত্তা বাহিনীৰ ওপৰত চলোৱা কেইবাটাও ভয়াৱহ আক্ৰমণৰ মাষ্টাৰমাইণ্ড আছিল ।
লগতে পঢ়ক : গুৱাহাটীত ৰাজ্যৰ অমৰ শ্বহীদসকলক ৰাজ্যপালৰ গভীৰ শ্ৰদ্ধাঞ্জলি
