বাৰ্তালাপৰ সময়ত ৰাজ্যপাল আচাৰ্যই মুখ্যমন্ত্ৰী আৰু মন্ত্ৰীসকলৰ সৈতে ৰাজ্যখনৰ বিভিন্ন জনসাধাৰণৰ গুৰুত্বপূৰ্ণ বিষয়সমূহৰ ওপৰত আলোচনা কৰে
অসমৰ ৰাজ্যপাল লক্ষ্মণ প্ৰসাদ আচাৰ্যৰ আতিথ্যত শনিবাৰে গুৱাহাটীৰ লোক ভৱনত (পূৰ্বৰ ৰাজ ভৱন) এক সৌহাৰ্দ্যপূৰ্ণ পৰিৱেশত ‘স্নেহ মিলন’ নামৰ এক বিশেষ মত-বিনিময় অনুষ্ঠান অনুষ্ঠিত হৈ যায় । এই অনুষ্ঠানত মুখ্যমন্ত্ৰী ড° হিমন্ত বিশ্ব শৰ্মাৰ লগতে ৰাজ্যিক মন্ত্ৰী পৰিষদৰ নৱ-নিযুক্ত আৰু পুৰণি সদস্যসকলে অংশগ্ৰহণ কৰে ।
ৰাজভৱনৰ এক প্ৰেছ বিজ্ঞপ্তি অনুসৰি, বাৰ্তালাপৰ সময়ত ৰাজ্যপাল আচাৰ্যই মুখ্যমন্ত্ৰী আৰু মন্ত্ৰীসকলৰ সৈতে ৰাজ্যখনৰ বিভিন্ন জনসাধাৰণৰ গুৰুত্বপূৰ্ণ বিষয়সমূহৰ ওপৰত আলোচনা কৰে । ইয়াৰ লগতে অসমৰ শান্তি, প্ৰগতি, সমৃদ্ধি আৰু সামগ্ৰিক তথা অন্তৰ্ভুক্তিমূলক উন্নয়নৰ প্ৰতি থকা সামূহিক সংকল্পক তেওঁ পুনৰ প্ৰতিষ্ঠা কৰে । আনহাতে, মুখ্যমন্ত্ৰী আৰু মন্ত্ৰী পৰিষদৰ সদস্যসকলে এনে এক সুন্দৰ অনুষ্ঠান আয়োজন কৰাৰ বাবে ৰাজ্যপালগৰাকীক ধন্যবাদ জ্ঞাপন কৰে আৰু অসমৰ উন্নয়ন তথা জনসাধাৰণৰ কল্যাণৰ বাবে অহৰহ কাম কৰি যোৱাৰ প্ৰতিশ্ৰুতি দোহাৰে । সমগ্ৰ কাৰ্যসূচীৰ শেষত সকলোৱে মিলি এটা স্মৰণীয় দলীয় ফটোও তোলে ।
উদ্ধাৰ হ’ল পুৰণি পৰম্পৰা :
উল্লেখ্য যে, পূৰ্বতে শপত গ্ৰহণৰ পিছত নতুন মন্ত্ৰী পৰিষদক লোক ভৱনত আদৰণি জনোৱাৰ এক সুন্দৰ নিয়ম আছিল । কিন্তু ক’ভিড মহামাৰীৰ সময়ত এই পৰম্পৰা বন্ধ হৈ পৰিছিল । এইবাৰ ৰাজ্যপাল লক্ষ্মণ প্ৰসাদ আচাৰ্যৰ বিশেষ উদ্যোগত এই প্ৰথাটো পুনৰ জীৱন্ত কৰি তোলা হয় ।
শুকুৰবাৰে ১২ মন্ত্ৰীৰ শপত গ্ৰহণ, কেবিনেট সম্প্ৰসাৰণ-
প্ৰণিধানযোগ্য যে, শুকুৰবাৰে ভাৰতীয় জনতা পাৰ্টিৰ নেতৃত্বাধীন ৰাজ্য চৰকাৰৰ তৃতীয়টো কাৰ্যকালৰ প্ৰথমটো কেবিনেট সম্প্ৰসাৰণ ঘটোৱা হয় । ৰাজ্যপাল লক্ষ্মণ প্ৰসাদ আচাৰ্যই ১২ গৰাকী বিধায়কক মন্ত্ৰী হিচাপে পদ আৰু গোপনীয়তাৰ শপত বাক্য পাঠ কৰোৱায় । ৰাজভৱনত অনুষ্ঠিত এই পবিত্ৰ শপত গ্ৰহণ অনুষ্ঠানত মুখ্যমন্ত্ৰী হিমন্ত বিশ্ব শৰ্মাও উপস্থিত আছিল ।
মন্ত্ৰীসভাত স্থান পোৱা নতুন আৰু পুৰণি মুখসমূহ:
বিজেপিৰ নতুন মুখ : অশ্বিনী ৰায় চৰকাৰ, নীলিমা দেৱী আৰু সুশান্ত বৰগোহাঁই ।
মিত্ৰদল আৰু জ্যেষ্ঠ নেতা : অসম গণ পৰিষদৰ জ্যেষ্ঠ নেতা তথা পূৰ্বৰ চৰকাৰৰ মন্ত্ৰী কেশৱ মহন্তক পুনৰ অন্তৰ্ভুক্ত কৰা হৈছে । ইয়াৰ উপৰিও অসম বিধানসভাৰ প্ৰাক্তন অধ্যক্ষ বিশ্বজিৎ দৈমাৰীয়েও কেবিনেট মন্ত্ৰী হিচাপে নতুনকৈ স্থান লাভ কৰিছে ।
শপত লোৱা অন্যান্য মন্ত্ৰীসকল : অশোক সিংঘাল, বিমল বড়া, জয়ন্ত মল্লবৰুৱা, কৌশিক ৰায়, কৃষ্ণেন্দু পাল, পীয়ুষ হাজৰীকা আৰু ড° ৰণোজ পেগু ।
নতুন মন্ত্ৰী পৰিষদৰ এই সতীৰ্থসকলৰ সন্মিলিত প্ৰচেষ্টাত অনাগত দিনত অসমৰ উন্নয়নৰ যাত্ৰা আৰু অধিক খৰতকীয়া হ’ব বুলি আশা প্ৰকাশ কৰা হৈছে ।
লগতে পঢ়ক : ‘বিকশিত অসম’ গঢ়াৰ সংকল্প : এশৰো অধিক IAS বিষয়াৰ সৈতে মুখ্যমন্ত্ৰী ড০ হিমন্ত বিশ্ব শৰ্মাৰ গুৰুত্বপূৰ্ণ বৈঠক
