গুৱাহাটী মহানগৰীৰ বান পৰিস্থিতিত লৈ মুখ্যমন্ত্ৰী গৰাকীয়ে এক ডাঙৰ মন্তব্য কৰিছে। মুখ্যমন্ত্ৰী গৰাকীয়ে কয় যে ‘USTM এ গুৱাহাটীলৈ ভাবুকি কঢ়িয়াইছে’।
মুখ্যমন্ত্ৰী ড০ হিমন্ত বিশ্ব শৰ্মাই বৃহস্পতিবাৰে অসম-মেঘালয় সীমান্তত ভূমিস্খলন আৰু বানপানীৰ সম্ভাৱনাক লৈ উদ্বেগ প্ৰকাশ কৰে। তেওঁ সকীয়াই দিয়ে যে মেঘালয়ৰ যোৰাবাট-USTM ৰ নিয়ন্ত্ৰণহীন উন্নয়নে গুৱাহাটীৰ বাবে মাৰাত্মক ভাবুকি কঢ়িয়াই আনিব পাৰে।
মুখ্যমন্ত্ৰী গৰাকীয়ে কয় যে উচ্চতম ন্যায়ালয়ে গঠন কৰি দিয়া এখন কমিটীয়ে ইতিমধ্যে এইবিষয়টো পৰীক্ষা কৰি পাৰিপাৰ্শ্বিক বিপদসমূহৰ ওপৰত এখন “অতি বিধ্বংসী প্ৰতিবেদন” দাখিল কৰিছে।
মুখ্যমন্ত্ৰীগৰাকীয়ে কয়, “উচ্চতম ন্যায়ালয়ে গঠন কৰা কমিটীয়ে এই বিষয়টো পৰীক্ষা কৰিছে আৰু তেওঁলোকে এটা অতি বিধ্বংসী প্ৰতিবেদন দাখিল কৰিছে। তেওঁলোকে স্পষ্টভাৱে উল্লেখ কৰিছে যে যোৰাবাট, বিশেষকৈ USTM আৰু ইয়াৰ প্ৰতিৱেশী অঞ্চলৰ অনিয়ন্ত্ৰিত উন্নয়নে গুৱাহাটীৰ বাবে ভয়ংকৰ বিপদৰ সৃষ্টি কৰিব।”
মেঘালয় চৰকাৰক এই বিষয়টো গুৰুত্বসহকাৰে ল’বলৈ আহ্বান জনাই মুখ্যমন্ত্ৰী গৰাকীয়ে কয় যে সীমান্তৰ সিপাৰে দ্ৰুতগতিত হৈ থকা উন্নয়নৰ পৰিৱেশীয় প্ৰভাৱৰ কথা বিবেচনা কৰাতো জৰুৰী।
তেওঁ কয়, “মই ভাবো যে অসমৰ ওপৰত পৰা প্ৰভাৱৰ প্ৰতি লক্ষ্য ৰাখি মেঘালয় চৰকাৰে সহানুভূতিশীল বিবেচনা কৰা উচিত। মই কেৱল মেঘালয় চৰকাৰক যোৰাবাট আৰু ইয়াৰ আশে-পাশে উন্নয়ন কেনেকৈ নিয়ন্ত্ৰণ কৰিব পাৰি সেয়া চাবলৈহে আহ্বান জনাম।”
মুখ্যমন্ত্ৰীগৰাকীয়ে সকীয়াই দিয়ে যে নিৰ্মাণ কাৰ্য নিয়ন্ত্ৰণ নহ’লে গুৱাহাটী ক্ৰমান্বয়ে অধিক সংকটাপন্ন হৈ পৰিব।
তেওঁ কয়, “তেওঁলোকৰ নিৰ্মাণ কাৰ্য নিয়ন্ত্ৰণ নহ’লে গুৱাহাটী এখন পৰিচালনা কৰিব নোৱাৰা চহৰ হৈ পৰিব। এয়া অতি কঠিন হ’ব। আমি গুৱাহাটীক সুৰক্ষিত কৰি ৰাখিব নোৱাৰিম, কাৰণ ওপৰৰ পৰা যি পানী নামি আহে, তাক কোনো ধৰণৰ নৰ্দমা প্ৰণালীৰে পৰিচালনা কৰা সম্ভৱ নহয়।”
মুখ্যমন্ত্ৰী গৰাকীয়ে আৰু কয় যে এই বিষয়ে তেওঁ মেঘালয়ৰ মুখ্যমন্ত্ৰী কনৰাড কে. চাংমাৰ সৈতে যোগাযোগত আছে আৰু বিষয়টো বৰ্তমান উচ্চতম ন্যায়ালয়ত বিচৰাধীন হৈ আছে।
তেওঁ কয়, “মই মেঘালয়ৰ মুখ্যমন্ত্ৰীৰ সৈতে কথা পাতি আছো। উচ্চতম ন্যায়ালয়ৰ দৃষ্টিত এই বিষয়টো আছে। যিকোনো দিনতে ন্যায়ালয়ত এই বিষয়টো শুনানিৰ বাবে আহিব আৰু আমি উচ্চতম ন্যায়ালয়ৰ সমুখত আমাৰ যুক্তি উপ উপস্থাপন কৰিম।”
লগতে পঢ়ক: ‘নাগালেণ্ডৰ ৫০০ শতাংশ অতিৰিক্ত বৰষুণে বিপদ ঘণ্টা মাতিছে’; মুখ্যমন্ত্ৰী
