নলবাৰী জিলা প্ৰশাসনে ৰাষ্ট্ৰীয় ঘাইপথ ২৭-ত এক ৫ কিলোমিটাৰ দীঘল জৰুৰীকালীন অৱতৰণ সুবিধা নিৰ্মাণৰ বাবে আনুষ্ঠানিক অনুমোদন জনাইছে
উত্তৰ-পূৰ্বাঞ্চলৰ কৌশলগত আন্তঃগাঁথনি অধিক শক্তিশালী কৰাৰ দিশত এক গুৰুত্বপূৰ্ণ পদক্ষেপ গ্ৰহণ কৰা হৈছে । নলবাৰী জিলা প্ৰশাসনে ৰাষ্ট্ৰীয় ঘাইপথ ২৭-ত এক ৫ কিলোমিটাৰ দীঘল জৰুৰীকালীন অৱতৰণ সুবিধা (ELF) নিৰ্মাণৰ বাবে আনুষ্ঠানিক অনুমোদন জনাইছে । ডিব্ৰুগড়ৰ পিছত অসমত নিৰ্মাণ হ’বলগীয়া এয়া দ্বিতীয়টো এনেধৰণৰ গুৰুত্বপূৰ্ণ প্ৰকল্প ।
জানিব পৰা মতে, এই প্ৰস্তাবিত প্ৰকল্পৰ অধীনত টিহু আৰু মাধপুৰৰ মাজৰ ৰাষ্ট্ৰীয় ঘাইপথৰ এক বিশেষ অংশক এটা সহযোগী ৰানৱেলৈ ৰূপান্তৰ কৰা হ’ব । এই ৰানৱেটো জৰুৰীকালীন পৰিস্থিতিত সামৰিক পৰিবহন বিমানৰ লগতে অসামৰিক বাণিজ্যিক বিমানসমূহৰ চলাচলৰ বাবেও সম্পূৰ্ণ উপযোগী কৰি তোলা হ’ব ।
ৰাষ্ট্ৰীয় নিৰাপত্তাৰ সংকট, ভয়াৱহ প্ৰাকৃতিক দুৰ্যোগ অথবা যিকোনো জৰুৰীকালীন অৱস্থাত সেনা কৰ্মী আৰু সাহায্য সামগ্ৰী অতি দ্ৰুতগতিত মোতায়েন কৰাৰ বাবে এক বৈকল্পিক লজিষ্টিক আৰু কাৰ্যবাহী কেন্দ্ৰ হিচাপে ব্যৱহাৰ কৰিব পৰাকৈ এই প্ৰকল্পটোৰ আৰ্হি প্ৰস্তুত কৰা হৈছে । বিষয়াসকলে সদৰী কৰা অনুসৰি, এই ৰানৱেটো সম্পূৰ্ণৰূপে সামৰিক পৰিচালনাৰ উচ্চ মানদণ্ড অনুসৰি নিৰ্মাণ কৰা হ’ব আৰু ইয়াত গধুৰ বিমান উঠা-নমা কৰিব পৰাকৈ শক্তিশালী আন্তঃগাঁথনি গঢ়ি তোলা হ’ব ।
আনহাতে, এই সামৰিকভাৱে স্পৰ্শকাতৰ প্ৰকল্পটোৰ সুৰক্ষা নিশ্চিত কৰাৰ বাবে ভাৰতীয় ৰাষ্ট্ৰীয় ঘাইপথ প্ৰাধিকৰণে (NHAI) স্থানীয় প্ৰশাসনৰ সৈতে বিশেষ তৎপৰতা আৰম্ভ কৰিছে । বিমান অহা-যোৱা কৰা পথত যাতে কোনো ধৰণৰ বাধাৰ সৃষ্টি নহয়, তাৰ বাবে নিৰ্দিষ্ট জ’নিং নিয়মাৱলী কাৰ্যকৰী কৰাৰ লগতে পথছোৱাৰ আশে-পাশে ‘কোনো ধৰণৰ নিৰ্মাণকাৰ্য কৰিব নোৱাৰা অঞ্চল’ (No-Construction Zone) বজাই ৰখাৰ পদক্ষেপ গ্ৰহণ কৰা হৈছে ।
উল্লেখ্য যে, ডিব্ৰুগড়ৰ সমীপত অসমৰ প্ৰথমটো জৰুৰীকালীন অৱতৰণ সুবিধা সফলতাৰে কাৰ্যক্ষম হৈ উঠাৰ পিছতে নলবাৰীত এই দ্বিতীয়টো প্ৰকল্প হাতত লোৱা হৈছে । এই নতুন সুবিধাই উত্তৰ-পূৰ্বাঞ্চলত ভাৰতৰ কৌশলগত নিৰাপত্তা আৰু প্ৰস্তুতিৰ নেটৱৰ্কক বহু পৰিমাণে সম্প্ৰসাৰিত কৰিব বুলি আশা কৰা হৈছে ।
লগতে পঢ়ক : ৪৫ হাজাৰ টকাৰ ঘোচ লৈ হাতে-লোটে গ্ৰেপ্তাৰ ACS বিষয়া লাচিত কুমাৰ দাস
