হিংসাত্মক সংঘাতৰ পৰিপ্ৰেক্ষিতত অসম চৰকাৰে মোবাইল ইন্টাৰনেট আৰু ডাটা সেৱা বন্ধ কৰিছে
ভাৰত-ভূটান সীমান্তত চলি থকা এক উচ্ছেদ অভিযানক কেন্দ্ৰ কৰি সৃষ্টি হোৱা হিংসাত্মক সংঘাতৰ পৰিপ্ৰেক্ষিতত অসম চৰকাৰে চিৰাং আৰু কোকৰাঝাৰ জিলাত মোবাইল ইণ্টাৰনেট আৰু ডাটা সেৱা বন্ধ কৰিছে ।
অতিৰিক্ত মুখ্য সচিব অজয় তিৱাৰীয়ে জাৰি কৰা এক চৰকাৰী জাননী অনুসৰি, ১৬ এপ্ৰিলত ৰুণীখাতাত উচ্ছেদ অভিযানৰ সময়ত বন বিভাগে ২৫ জন আদিবাসী লোকক আটক কৰাৰ পিছত চিৰাং জিলাত অশান্তিৰ সৃষ্টি হোৱাৰ খবৰ পোৱা গৈছিল । ইয়াৰ পিছতে প্ৰতিবাদকাৰী আৰু বনকৰ্মীৰ মাজত হিংসাত্মক সংঘৰ্ষৰ সূত্ৰপাত হয় । প্ৰতিবাদকাৰীয়ে চৰকাৰী বাহনত অগ্নিসংযোগ কৰাৰ লগতে ৰেঞ্জ অফিচাৰৰ কাৰ্যালয়টো জ্বলাই দিবলৈ চেষ্টা কৰা বুলি জানিব পৰা গৈছে । লগতে গুলীচালনাৰ ঘটনা আৰু তীব্ৰ উত্তেজনাৰ সৃষ্টি হয় বুলিও খবৰ প্ৰকাশ পাইছে ।
এই পৰিস্থিতি চুবুৰীয়া কোকৰাঝাৰ জিলাৰ দৰে সমীপৱৰ্তী অঞ্চললৈও বিয়পি পৰাৰ সম্ভাৱনা আছে বুলি কৰ্তৃপক্ষই উদ্বেগ প্ৰকাশ কৰিছে, যিয়ে জনসাধাৰণৰ সুৰক্ষা আৰু আইন-শৃংখলাৰ প্ৰতি ভাবুকি কঢ়িয়াই আনিব পাৰে । জাননীখনত উল্লেখ কৰা হৈছে যে হোৱাটছএপ, ফেচবুক, এক্স, ইউটিউব আৰু ইনষ্টাগ্ৰামৰ দৰে ছচিয়েল মিডিয়া প্লেটফৰ্মৰ জৰিয়তে অপপ্ৰচাৰ আৰু উত্তেজক বিষয়বস্তু বিয়পি পৰাৰ আশংকা আছে, যাৰ ফলত পৰিস্থিতি অধিক ভয়াৱহ হৈ পৰিব পাৰে ।
ভাৰতীয় টেলিগ্ৰাফ আইন, ১৮৮৫ আৰু টেলিকম সেৱাৰ সাময়িক নিলম্বন নিয়ম, ২০১৭ ৰ ব্যৱস্থাৱলী প্ৰয়োগ কৰি চৰকাৰে পৰৱৰ্তী নিৰ্দেশ নিদিয়া পৰ্যন্ত আক্ৰান্ত জিলাকেইখনত তাৎক্ষণিকভাৱে মোবাইল ইণ্টাৰনেট সেৱা বন্ধ কৰাৰ নিৰ্দেশ দিছে ।
অৱশ্যে ভইচ কল আৰু ফিক্সড লাইন কানেকচনৰ জৰিয়তে ব্ৰডবেণ্ড সেৱা কাৰ্যকৰী হৈ থাকিব । এই নিৰ্দেশ উলংঘা কৰিলে আইনৰ প্ৰাসংগিক ধাৰাৰ অধীনত আইনী ব্যৱস্থা গ্ৰহণ কৰা হ’ব বুলি জাননীত সতৰ্ক কৰি দিয়া হৈছে ।
লগতে পঢ়ক : পৱন খেৰাই আত্মসমৰ্পণ কৰা উচিত: জামিন আবেদন খাৰিজৰ পিছত হিমন্ত বিশ্ব শৰ্মাৰ মন্তব্য
