শনিবাৰে মুখ্যমন্ত্ৰী ড০ হিমন্ত বিশ্ব শৰ্মাই শিলচৰত এক নতুন সচিবালয় ভৱন উদ্বোধন কৰে
অন্ত পৰিল বৰাকবাসীৰ দীৰ্ঘদিনীয়া এক প্ৰতীক্ষাৰ । প্ৰশাসনিক বিকেন্দ্ৰীকৰণ আৰু চৰকাৰক জনসাধাৰণৰ অধিক ওচৰ চপাই নিয়াৰ উদ্দেশ্যেৰে শনিবাৰে মুখ্যমন্ত্ৰী ড০ হিমন্ত বিশ্ব শৰ্মাই শিলচৰত এক নতুন সচিবালয় ভৱন উদ্বোধন কৰে ।
ছচিয়েল মিডিয়া প্লেটফৰ্ম ‘এক্স’-ত মুখ্যমন্ত্ৰী ড০ শৰ্মাই কয়, “অসমৰ দৰে এখন বৈচিত্ৰ্যপূৰ্ণ ৰাজ্যত দীৰ্ঘদিন ধৰি নীতি-নিৰ্ধাৰণ আৰু উন্নয়ন কেৱল গুৱাহাটীতে কেন্দ্ৰীভূত হৈ আছিল । এতিয়া এই ধাৰণা সলনি হৈছে । যোৱা পাঁচ বছৰত মোৰ অন্যতম প্ৰধান লক্ষ্য আছিল এই মানসিকতা সম্পূৰ্ণৰূপে নিৰ্মূল কৰা ।”
তেওঁ লগতে কয়, “কোকৰাঝাৰত বিধানসভাৰ অধিবেশন অনুষ্ঠিত হৈছে । ডিব্ৰুগড়ত এক নতুন সচিবালয় আৰু বিধানসভা ভৱন নিৰ্মাণৰত অৱস্থাত আছে । শিলচৰত আজি আমি এক নতুন সচিবালয় উদ্বোধন কৰিছো । এইবোৰ কেৱল অট্টালিকা নহয়, এয়া আমাৰ দৃঢ় সংকল্পৰ নিদৰ্শন ।”
মুখ্যমন্ত্ৰী হিমন্ত বিশ্ব শৰ্মাই গুৰুত্ব আৰোপ কৰে যে সংস্কাৰৰ জৰিয়তে বহুতো কাৰ্যবাহী ক্ষমতা জিলা প্ৰশাসনক প্ৰদান কৰা হৈছে আৰু ‘সহ-জিলা’ গঠন কৰা হৈছে । ইয়াৰ ফলত চৰকাৰী সেৱাৰ বাবে নাগৰিকে জিলা সদৰলৈ যাব লগা পুৰণি প্ৰথাৰ অন্ত পৰিব ।
শেষত তেওঁ কয়, “আমাৰ মন্ত্ৰ সদায় এটাই আছিল আৰু থাকিব: প্ৰশাসন জনসাধাৰণৰ ওচৰলৈ যাব, জনসাধাৰণ প্ৰশাসনৰ ওচৰলৈ নহয় ।”
লগতে পঢ়ক : প্ৰধানমন্ত্ৰীৰ পিছতে গুৱাহাটীত উপস্থিত কেন্দ্ৰীয় গৃহমন্ত্ৰী অমিত শ্বাহ
