হৰমুজ প্ৰণালীত ভাৰত অভিমুখী এখন মালবাহী জাহাজ আক্ৰমণৰ সন্মুখীন হয়
মধ্যপ্ৰাচ্যৰ মাজেৰে যোৱা অতি গুৰুত্বপূৰ্ণ সাগৰীয় পথ হৰমুজ প্ৰণালীত ভাৰত অভিমুখী এখন মালবাহী জাহাজ আক্ৰমণৰ সন্মুখীন হয় । গুজৰাটৰ কণ্ডলা বন্দৰলৈ ৰাওনা হৈছিল জাহাজখন । এই আক্ৰমণৰ পিছতে ভাৰতে বাণিজ্যিক জাহাজক লক্ষ্য কৰি লোৱাক লৈ গুৰুতৰ উদ্বেগ প্ৰকাশ কৰিছে ।
খবৰ অনুসৰি যোৱা ১১ মাৰ্চত থাইলেণ্ডৰ মালবাহী জাহাজ ময়ুৰী নাৰী অচিনাক্ত আক্ৰমণৰ সন্মুখীন হয় । এই আক্ৰমণৰ ফলত জাহাজখনত অগ্নিকাণ্ড সংঘটিত হয় । ওমানৰ উত্তৰ উপকূলৰ পৰা প্ৰায় ১১ নটিকেল মাইল দূৰত্বত সংঘটিত হৈছে এই ঘটনা ।
জাহাজ অনুসৰণৰ তথ্যত জাহাজখন ময়ুৰী নাৰী বুলি চিনাক্ত কৰা হৈছে । থাইলেণ্ড চৰকাৰে জনোৱা মতে, জাহাজখনত মুঠ ২৩ জন ক্ৰু মেম্বাৰ আছিল । দুৰ্ঘটনাৰ পিছত ২০ জন ক্ৰু সদস্যক নিৰাপদে উলিয়াই অনা হয়, আনহাতে তিনিজন জাহাজতে আছে ।
এই আক্ৰমণৰ পিছতে ওমানৰ নৌসেনাই ততাতৈয়াকৈ উদ্ধাৰ অভিযান আৰম্ভ কৰে । ৰয়েল থাই নৌসেনা আৰু ইউনাইটেড কিংডম মেৰিটাইম ট্ৰেড অপাৰেচনেও নিশ্চিত কৰিছে যে মালবাহী জাহাজখনত অচিনাক্ত আক্ৰমণৰ সন্মুখীন হৈছে । কিন্তু এই আক্ৰমণত ব্যৱহৃত অস্ত্ৰ এতিয়াও আনুষ্ঠানিকভাৱে চিনাক্ত হোৱা নাই আৰু কোনো দেশ বা সংগঠনে ইয়াৰ দায়িত্ব স্বীকাৰ কৰা নাই ।
ঘটনাৰ পিছতে ভাৰতৰ বৈদেশিক পৰিক্ৰমা মন্ত্ৰালয়ে এক বিবৃতি প্ৰকাশ কৰি কয় যে পশ্চিম এছিয়াত চলি থকা সংঘাতৰ সময়ত বাণিজ্যিক জাহাজক লক্ষ্য কৰি লোৱাটো গভীৰ উদ্বেগজনক । মন্ত্ৰালয়ে উল্লেখ কৰে যে ইয়াৰ পূৰ্বেও একেধৰণৰ আক্ৰমণত ভাৰতীয় নাগৰিককে ধৰি অসংখ্য লোকৰ প্ৰাণহানি হৈছে আৰু এই আক্ৰমণৰ তীব্ৰতা বৃদ্ধি পোৱা যেন লাগে ।
লগতে পঢ়ক : হৰমুজ প্ৰণালীত গুজৰাট অভিমুখী জাহাজত আক্ৰমণ, ওমান নৌসেনাৰ উদ্ধাৰ অভিযান
