ডুবাই আন্তঃৰাষ্ট্ৰীয় বিমানবন্দৰত ইৰানে চলোৱা ড্ৰোন আক্ৰমণত এজন ভাৰতীয়কে ধৰি চাৰিজন লোক আহত হয়
বুধবাৰে ডুবাই আন্তঃৰাষ্ট্ৰীয় বিমানবন্দৰত ইৰানে চলোৱা ড্ৰোন আক্ৰমণত এজন ভাৰতীয়কে ধৰি চাৰিজন লোক আহত হয় । ডুবাই কৰ্তৃপক্ষই নিশ্চিত কৰিছে যে বুধবাৰে পুৱা ডুবাই আন্তঃৰাষ্ট্ৰীয় বিমানবন্দৰৰ ওচৰত দুখন ড্ৰোনে আঘাত কৰাত দুজন ঘানাৰ নাগৰিক আৰু এজন বাংলাদেশী নাগৰিক সামান্য আহত হোৱাৰ বিপৰীতে এজন ভাৰতীয় নাগৰিকো আহত হৈছে । এই ঘটনাৰ তদন্ত আৰম্ভ কৰিছে নিৰাপত্তা সংস্থাই । অৱশ্যে ড্ৰোন আক্ৰমণৰ পিছতো স্বাভাৱিকভাৱে চলি আছে বিমান পৰিবহণ ।
ডুবাই আন্তঃৰাষ্ট্ৰীয় বিমানবন্দৰ আৰু আল মাকটুম আন্তঃৰাষ্ট্ৰীয় বিমানবন্দৰ পৰিচালনা কৰা ডুবাই বিমানবন্দৰে জনোৱা মতে, ৭ মাৰ্চৰ পৰা দুয়োটা বিমানবন্দৰতে বিমান সেৱা আংশিকভাৱে পুনৰ আৰম্ভ হৈছে । ইয়াৰ পূৰ্বে কম সময়ৰ বাবে বিমান সেৱা বন্ধ হৈ আছিল । যাত্ৰীসকলক তেওঁলোকৰ বিমান সংস্থাই নিৰ্ধাৰিত সময়ত তেওঁলোকৰ বিমান সেৱা নিশ্চিত নকৰালৈকে বিমানবন্দৰলৈ যাত্ৰা নকৰিবলৈ পৰামৰ্শ দিয়া হৈছে । বৰ্তমান বিমানৰ সময়সূচী সলনি হৈ আছে । বিমান চলাচলত গড়ে ৬০ৰ পৰা ৯০ মিনিট পলম হৈছে ।
ইয়াৰ পূৰ্বে ১ মাৰ্চত ড্ৰোন আক্ৰমণত ডুবাই আন্তঃৰাষ্ট্ৰীয় বিমানবন্দৰৰ এটা অংশ সামান্য ক্ষতিসাধন হৈছিল । কিন্তু শীঘ্ৰে পৰিস্থিতি নিয়ন্ত্ৰণলৈ অনা হয় । এই ঘটনাত চাৰিজন কৰ্মচাৰী আহত হয় যদিও তাৎক্ষণিকভাৱে তেওঁলোকক চিকিৎসা সেৱা লাভ প্ৰদান কৰা হয় । বিমানবন্দৰ প্ৰশাসনে উল্লেখ কৰিছে যে পূৰ্ব পৰিকল্পিত জৰুৰীকালীন ব্যৱস্থাৰ বাবে ইতিমধ্যে প্ৰায়বোৰ টাৰ্মিনেলৰ পৰা যাত্ৰীসকলক নিৰাপদে উলিয়াই অনা হৈছে । আন্তঃৰাষ্ট্ৰীয় ভ্ৰমণৰ বাবে এইটোৱেই হৈছে বিশ্বৰ আটাইতকৈ ব্যস্ত বিমানবন্দৰ ।
লগতে পঢ়ক : হৰমুজ প্ৰণালীত তীব্ৰতৰ হৈ উঠিছে যুদ্ধ, ভাৰতত স্তব্ধ হৈ পৰিব পাৰে ইণ্টাৰনেট!
