তথ্য আৰু সম্প্ৰচাৰ মন্ত্ৰী অশ্বিনী বৈষ্ণৱে উল্লেখ কৰে যে কেৰালাৰ নাম সলনি কৰা বিধেয়কখন এতিয়া ৰাজ্য বিধানসভালৈ অনুমোদনৰ বাবে প্ৰেৰণ কৰা হ’ব ।
মঙলবাৰে কেন্দ্ৰীয় কেবিনেটে কেৰালাৰ নাম সলনি কৰি “কেৰালাম” কৰাত অনুমোদন জনায় । কেন্দ্ৰীয় মন্ত্ৰী অশ্বিনী বৈষ্ণৱে কয়, “ভাষাৰ আধাৰত ৰাজ্যখন সৃষ্টি হোৱাৰ পৰাই কেৰালাৰ নাম কেৰালাম ৰখাৰ দাবী উত্থাপন হৈ আহিছে । কেবিনেটে এই দাবীত অনুমোদন জনাইছে ।” চলিত বৰ্ষত অনুষ্ঠিত হ’বলগীয়া কেৰালা বিধানসভা নিৰ্বাচনৰ পূৰ্বে এই পদক্ষেপ গ্ৰহণ কৰা হৈছে ।
তথ্য আৰু সম্প্ৰচাৰ মন্ত্ৰী অশ্বিনী বৈষ্ণৱে উল্লেখ কৰে যে কেৰালাৰ নাম সলনি কৰা বিধেয়কখন এতিয়া ৰাজ্য বিধানসভালৈ অনুমোদনৰ বাবে প্ৰেৰণ কৰা হ’ব । তেওঁ লগতে কয় যে নতুন প্ৰধানমন্ত্ৰী কাৰ্যালয় ভৱনত অনুষ্ঠিত প্ৰথমখন কেবিনেট বৈঠকত ১৪০ কোটি লোকৰ স্বাৰ্থত সকলো সিদ্ধান্ত লোৱাৰ প্ৰস্তাৱ গৃহীত কৰা হয় ।
প্ৰধানমন্ত্ৰী কাৰ্যালয়ৰ নতুন ভৱন ‘সেৱা তীৰ্থ’ত অনুষ্ঠিত কেন্দ্ৰীয় মন্ত্ৰীসভাৰ এইখনেই আছিল প্ৰথমখন বৈঠক । কেৰালা বিধানসভাই ২০২৪ চনৰ ২৪ জুনত সৰ্বসন্মতিক্ৰমে এক প্ৰস্তাৱ গ্ৰহণ কৰি কেন্দ্ৰীয় চৰকাৰক ৰাজ্যখনৰ নাম আনুষ্ঠানিকভাৱে ‘কেৰালাম’লৈ সলনি কৰিবলৈ আহ্বান জনায় । কেৰালা বিধানসভাই দ্বিতীয়বাৰৰ বাবে এই প্ৰস্তাৱ গৃহীত কৰে কাৰণ কেন্দ্ৰীয় গৃহ মন্ত্ৰালয়ে প্ৰথম প্ৰস্তাৱটো পৰ্যালোচনা কৰাৰ সময়ত কিছু কাৰিকৰী পৰিৱৰ্তনৰ পৰামৰ্শ দিছিল ।
কেৰালাৰ মুখ্যমন্ত্ৰী পিনাৰায়ী বিজয়নে বিচাৰিছিল যে কেন্দ্ৰীয় চৰকাৰে সংবিধানৰ অষ্টম অনুসূচীত তালিকাভুক্ত সকলো ভাষাতে দক্ষিণৰ ৰাজ্যখনৰ নাম কেৰালাৰ পৰা “কেৰালাম”লৈ সলনি কৰক । কেৰালা বিধানসভাই ২০২৩ চনৰ আগষ্ট মাহত একেধৰণৰ সৰ্বসন্মতিক্ৰমে প্ৰস্তাৱ গৃহীত কৰি কেন্দ্ৰীয় চৰকাৰলৈ প্ৰেৰণ কৰিছিল যদিও গৃহ মন্ত্ৰালয়ে কিছু কাৰিকৰী পৰিৱৰ্তনৰ পৰামৰ্শ আগবঢ়াইছিল ।
লগতে পঢ়ক : ভাৰত ভ্ৰমণলৈ আহিব কানাডাৰ প্ৰধানমন্ত্ৰী মাৰ্ক কাৰ্নী, প্ৰতিৰক্ষা-প্ৰযুক্তিকে ধৰি বহু বিষয়ত হ’ব আলোচনা
