এতিয়া কোনোবাই যদি অসমলৈ ৰঙা চকুৰে চাই সেই ৰঙা চকু আমি কাঢ়ি উলিয়াই আনিম । কচুতলীৰ পৰা হুংকাৰ দিয়ে মুখ্যমন্ত্ৰী ড০ হিমন্ত বিশ্ব শৰ্মাৰ ।
এইখন নতুন অসম । এতিয়া অসমক কোনেও ৰঙা চকু দেখুৱাব নোৱাৰিব । এতিয়া কোনোবাই যদি অসমলৈ ৰঙা চকুৰে চাই সেই ৰঙা চকু আমি কাঢ়ি উলিয়াই আনিম । সোণাপুৰৰ কচুতলীৰ পৰা অবৈধ বিদেশীক এই হুংকাৰ দিয়ে মুখ্যমন্ত্ৰী ড০ হিমন্ত বিশ্ব শৰ্মাই । শনিবাৰে কচুতলীত অনুষ্ঠিত হোৱা চিআৰপিএফৰ প্ৰতিষ্ঠা দিৱসৰ পেৰেডত অংশগ্ৰহণ কৰি মুখ্যমন্ত্ৰী হিমন্ত বিশ্ব শৰ্মাই এই মন্তব্য কৰে ।
মুখ্যমন্ত্ৰী ড০ শৰ্মাই কয়- কচুতলীত ৭০৮ বিঘা মাটি সন্দেহজনক লোকে দখল কৰি আছিল । স্থানীয় ৰাইজে দীৰ্ঘদিন ধৰি এই অবৈধ লোকসকলক উচ্ছেদৰ বাবে দাবী জনাই আহিছিল যদিও কোনোৱে সাহস কৰা নাছিল । কিন্তু বিজেপি চৰকাৰৰ নেতৃত্বত কচুতলীৰ এই ৭০৮ বিঘা মাটি অবৈধ দখলকাৰীৰ কবলৰ পৰা উদ্ধাৰ কৰা হ’ল । বিজেপি চৰকাৰে শাসনত নহা হ’লে কোনোৱে এই কাম কৰিব নোৱাৰিলেহেতেন ।
অসমত বিগত পাঁচ বছৰত এক লাখ দহ বিঘা মাটিত উচ্ছেদ চলোৱা হৈছে প্ৰকাশ কৰে মুখ্যমন্ত্ৰী হিমন্ত বিশ্ব শৰ্মাই । লগতে ২৬ হাজাৰ বিঘা চৰকাৰী মাটি আৰু ভিজিআৰ-পিজিআৰ ৭ হাজাৰ বিঘা মাটিত উচ্ছেদ চলোৱা হৈছে বুলিও জনায় তেওঁ । মুখ্যমন্ত্ৰীগৰাকীয়ে কয় যে, এই মাটিত অবৈধ বাংলাদেশী বহি আছিল আৰু বিগত পাঁচ বছৰত ৰাজ্যত ডেৰ লাখ বিঘা মাটি অবৈধ লোকৰ কবলৰ পৰা উদ্ধাৰ কৰা হৈছে । আনহাতে এইবাৰ নিৰ্বাচনত ৰাজ্যৰ শাসনলৈ পুনৰ বিজেপি চৰকাৰ আহিলে পাঁচ লাখ বিঘা মাটিৰ পৰা অবৈধ বাংলাদেশীক উচ্ছেদ কৰা হ’ব বুলি প্ৰতিশ্ৰুতি দিয়ে মুখ্যমন্ত্ৰীগৰাকীয়ে ।
এতিয়া অসম পূৰ্বৰ দৰে নহয় বুলি হুংকাৰ দি মুখ্যমন্ত্ৰী ড০ শৰ্মাই কয়- অসমক আমি বাংলাদেশীৰ পৰা মুক্ত কৰিবই লাগিব । শ্বহীদসকলৰ তেজৰ মূল্য আমি দিবই লাগিব । আজি আমি অবৈধ বাংলাদেশীক বুজাই দিলো যে এতিয়াৰ অসম পূৰ্বৰ দৰে নহয় । কোনোবাই যদি আমাৰ ফালে ৰঙা চকুৰে চাই তেন্তে আমি সেই ৰঙা চকু কাঢ়ি আনিম কিন্তু আমি কাৰো লগত আপোচ নকৰোঁ । এইখন নতুন অসম, অটল, অবিচল, অগ্ৰগামী অসম ।
অসমৰ মাটি আৰু নতুনকৈ কোনোৱে দখল কৰিব নোৱাৰিব বুলি উল্লেখ কৰি তেওঁ কয়- অসমৰ গঁড় কোনোবাই যদি হত্যা কৰিব বিচাৰে দহবাৰ চিন্তা কৰিব লাগিব যে তেওঁ উভতি যাব পাৰিব নে নোৱাৰে । অসমত এতিয়া ছেমিকণ্ডাক্টৰ আহিছে, অসমৰ ৰাজপথত এতিয়া কেৱল মটৰ গাড়ীয়েই নচলে, অসমৰ ৰাজপথত এতিয়া এৰোপ্লেনো লেণ্ডিং কৰিব পাৰে । এনেকুৱা সাহস বিগত পাঁচ বছৰত অসমীয়াই গোটাব পাৰিলে ।
মুখ্যমন্ত্ৰী হিমন্ত বিশ্ব শৰ্মাই লগতে কয় যে, এতিয়া অসমীয়াই সকলোকে বুজাই দিছে যে আগৰ দিন নাই । এতিয়া দিন পৰিৱৰ্তন হৈছে । অসমৰ পৰা আমি এনেকুৱা পৰিৱশ সৃষ্টি কৰিম কেৱল কচুতলীয়েই নহয় সমগ্ৰ অসমৰ পৰা এদিন এই বাংলাদেশী পলাব লাগিব ।
লগতে পঢ়ক : কংগ্ৰেছে কৰা ‘পাপ’ৰ পৰা অসমক মুক্ত কৰিব বিজেপিয়ে: কচুতলীৰ পৰা অমিত শ্বাহৰ হুংকাৰ
