ই প্ৰকল্পৰ বিশেষত্ব হ’ল ব্ৰহ্মপুত্ৰৰ তলত নিৰ্মাণ হ’বলগীয়া ভাৰতৰ প্ৰথমটো পানীৰ তলৰ পথ তথা ৰে’ল সুৰংগ ।
প্ৰধানমন্ত্ৰী নৰেন্দ্ৰ মোদীৰ অধ্যক্ষতাত কেন্দ্ৰীয় কেবিনেটৰ অৰ্থনৈতিক পৰিক্ৰমা সমিতিয়ে অসমৰ গহপুৰ (ৰাষ্ট্ৰীয় ঘাইপথ-১৫) আৰু নুমলীগড়ৰ (ৰাষ্ট্ৰীয় ঘাইপথ-৭১৫) মাজত ৪-লেনযুক্ত এক ‘এক্সেছ-কন্ট্ৰলড্ গ্ৰীনফিল্ড কৰিডৰ’ নিৰ্মাণত অনুমোদন জনাইছে । এই প্ৰকল্পৰ বিশেষত্ব হ’ল ব্ৰহ্মপুত্ৰৰ তলত নিৰ্মাণ হ’বলগীয়া ভাৰতৰ প্ৰথমটো পানীৰ তলৰ পথ তথা ৰে’ল সুৰংগ ।
অভিযান্ত্ৰিক, ক্ৰয় আৰু নিৰ্মাণ (EPC) আৰ্হিত নিৰ্মাণ হ’বলগীয়া এই প্ৰকল্পৰ মুঠ ব্যয় নিৰ্ধাৰণ কৰা হৈছে ১৮,৬৬২ কোটি টকা । এই আঁচনিত অন্তৰ্ভুক্ত আছে ১৫.৭৯ কিলোমিটাৰ দৈৰ্ঘ্যৰ ‘টুইন-টিউব টিবিএম’ (TBM) প্ৰযুক্তিসম্পন্ন সুৰংগ, য’ত প্ৰতিটো দিশতে দুটাকৈ লেন থকা পথৰ লগতে এটা টিউবত ৰে’লপথৰ আন্তঃগাঁথনিৰ সুবিধা থাকিব । সমগ্ৰ প্ৰকল্পটোৰ মুঠ দৈৰ্ঘ্য হ’ব ৩৩.৭ কিলোমিটাৰ ।
প্ৰকল্পটোৰ গুৰুত্বপূৰ্ণ দিশসমূহ :
যাতায়তৰ সময় হ্ৰাস : বৰ্তমান শিলাঘাটৰ কলিয়াভোমোৰা সেতুৰে নুমলীগড় আৰু গহপুৰৰ মাজৰ দূৰত্ব প্ৰায় ২৪০ কিলোমিটাৰ, যি অতিক্ৰম কৰিবলৈ প্ৰায় ৬ ঘণ্টা সময় লাগে । এই নতুন সংযোগী পথটোৱে যাতায়তৰ সময় উল্লেখনীয়ভাৱে হ্ৰাস কৰাৰ লগতে কাজিৰঙা ৰাষ্ট্ৰীয় উদ্যান আৰু বিশ্বনাথ চাৰিআলি চহৰৰ যান-জঁট লাঘৱ কৰিব ।
গোলকীয় স্বীকৃতি : সম্পূৰ্ণ হোৱাৰ পিছত এই সুৰংগটো হ’ব ভাৰতৰ প্ৰথম আৰু বিশ্বৰ দ্বিতীয়টো পানীৰ তলৰ পথ-ৰে’ল সুৰংগ ।
ৰাজ্যিক আৰু আঞ্চলিক সংযোগ : এই প্ৰকল্পই অসমৰ লগতে অৰুণাচল প্ৰদেশ, নাগালেণ্ড আৰু উত্তৰ-পূৰ্বাঞ্চলৰ অন্যান্য ৰাজ্যসমূহৰ সৈতে সংযোগ ব্যৱস্থা উন্নত কৰিব, যাৰ ফলত পৰিবহণ ব্যয় হ্ৰাস পাব ।
মাল্টি-মডেল ইণ্টিগ্ৰেচন : এই কৰিডৰটোৱে উত্তৰ-পূব সীমান্ত ৰে’লৱেৰ ৰঙিয়া ডিভিজনৰ অন্তৰ্গত ৰঙিয়া-মুৰ্কংচেলেক শাখা আৰু তিনিচুকীয়া ডিভিজনৰ ফৰকাটিং-মৰিয়নি লুপ লাইনক সংযোগ কৰিব । ইয়াৰ উপৰি ই ১১টা অৰ্থনৈতিক কেন্দ্ৰ, ৩টা সামাজিক কেন্দ্ৰ, ৮টা লজিষ্টিক হাব, ৪টা ৰে’ল ষ্টেচন, ২টা বিমানবন্দৰ আৰু ২টা আভ্যন্তৰীণ জলপথ টাৰ্মিনেলক একেলগে সংযোগ কৰিব ।
অৰ্থনৈতিক আৰু কৌশলগত প্ৰভাৱ :
এই মেগা প্ৰকল্পটোৱে প্ৰায় ৮০ লাখ ব্যক্তি-দিনৰ প্রত্যক্ষ আৰু পৰোক্ষ নিয়োগৰ সৃষ্টি কৰিব বুলি আশা কৰা হৈছে । ইয়াৰ ফলত ঔদ্যোগিক বিকাশ খৰতকীয়া হোৱাৰ লগতে ব্ৰহ্মপুত্ৰ উপত্যকাৰ বাণিজ্যিক দিশত এক নতুন দিগন্তৰ সূচনা হ’ব ।
এই বৃহৎ আন্তঃগাঁথনিমূলক পদক্ষেপে প্ৰযুক্তি-নিৰ্ভৰ প্ৰকল্পৰ জৰিয়তে উত্তৰ-পূৰ্বাঞ্চলৰ যোগাযোগ ব্যৱস্থা শক্তিশালী কৰাৰ লগতে অঞ্চলটোৰ দীৰ্ঘম্যাদী আৰ্থ-সামাজিক উন্নয়নত গুৰুত্বপূৰ্ণ ভূমিকা পালন কৰিব ।
লগতে পঢ়ক : গুৱাহাটী-উত্তৰ গুৱাহাটী সংযোগী কুমাৰ ভাস্কৰ বৰ্মা সেতু মুকলি প্ৰধানমন্ত্ৰী নৰেন্দ্ৰ মোদীৰ
