এনকাউন্টাৰৰ সংখ্যা বৃদ্ধি পোৱাৰ ধাৰাক লৈ উচ্চ ন্যায়ালয়ে গভীৰ উদ্বেগ প্ৰকাশ কৰিছে । বিচাৰপীঠে উল্লেখ কৰে যে আৰক্ষী আইনৰ ওপৰত নহয় আৰু অপৰাধীক শাস্তি দিয়াটো আৰক্ষীৰ নহয়, ন্যায়পালিকাৰ দায়িত্ব ।
উত্তৰ প্ৰদেশত আৰক্ষীৰ এনকাউণ্টাৰৰ সংখ্যা বৃদ্ধি পোৱা, বিশেষকৈ অভিযুক্তৰ ভৰিত গুলীচালনা কৰি “এনকাউণ্টাৰ” ঘোষণা কৰাৰ ধাৰাক লৈ এলাহাবাদ উচ্চ ন্যায়ালয়ে গভীৰ উদ্বেগ প্ৰকাশ কৰিছে । প্ৰয়াগৰাজৰ ন্যায়াধীশ অৰুণ কুমাৰ দেশৱালৰ একক বিচাৰপীঠে উল্লেখ কৰে যে আৰক্ষী আইনৰ ওপৰত নহয় আৰু অপৰাধীক শাস্তি দিয়াটো আৰক্ষীৰ নহয়, ন্যায়পালিকাৰ দায়িত্ব ।
আদালতে কয় যে প্ৰচাৰ, হাতচাপৰি বা ছ’চিয়েল মিডিয়াৰ মনোযোগৰ বাবে গুলীচালনা কৰাৰ প্ৰৱণতা কেৱল ভুলেই নহয়, বিপদজনকো । লগতে আদালতে স্পষ্ট কৰি দিয়ে যে অভিযুক্তৰ শৰীৰৰ যিকোনো অপ্ৰয়োজনীয় অংশত গুলীচালনা কৰাটোও আইনগতভাৱে গ্ৰহণযোগ্য নহয় । যদি কোনো এনকাউণ্টাৰত গুলীচালনা বা গুৰুতৰভাৱে আঘাতপ্ৰাপ্ত হয় তেন্তে কঠোৰ নিয়ম স্বয়ংক্ৰিয়ভাৱে প্ৰযোজ্য হ’ব ।
উচ্চ ন্যায়ালয়ে আৰক্ষীৰ বাবে ৬ দফীয়া গাইডলাইন জাৰি কৰি ইয়াক মানি চলাটো বাধ্যতামূলক কৰি পি ইউ চি এল বনাম মহাৰাষ্ট্ৰ গোচৰত উল্লেখ কৰা উচ্চতম ন্যায়ালয়ৰ গাইডলাইন কঠোৰভাৱে বলবৎ কৰাৰ নিৰ্দেশ দিয়ে । এই নিৰ্দেশনাসমূহ পালন নকৰিলে সংশ্লিষ্ট আৰক্ষী অধীক্ষক আৰু অতিৰিক্ত আৰক্ষী অধীক্ষকক পোনপটীয়াকৈ দায়ী কৰা হ’ব আৰু ব্যক্তিগত অৱজ্ঞাৰ গোচৰৰ সন্মুখীন হ’ব পাৰে বুলি আদালতে সকীয়াই দিয়ে ।
আদালতে আৰক্ষী সঞ্চালক প্ৰধান আৰু গৃহ সচিবক আৰক্ষী বিষয়াক অভিযুক্তৰ ভৰিত গুলী মাৰিবলৈ বা এনকাউণ্টাৰৰ দাবী কৰিবলৈ কোনো মৌখিক বা লিখিত নিৰ্দেশনা দিয়া হৈছে নেকি বুলিও প্ৰশ্ন কৰে । আদালতে মন্তব্য কৰে যে এই প্ৰথা এতিয়া নিয়মিত হৈ পৰিছে, হয় উৰ্ধতন বিষয়াক সন্তুষ্ট কৰিবলৈ নহয় অভিযুক্তক শিক্ষা দিবলৈ ।
মিৰ্জাপুৰৰ দুজন অভিযুক্তই দাখিল কৰা জামিন আবেদনৰ শুনানিৰ সময়ত এই মন্তব্য কৰে উচ্চ ন্যায়ালয়ে । আৰক্ষীৰে পৃথক সংঘৰ্ষত এই অভিযুক্ত আহত হৈছিল । এই ঘটনাত কোনো আৰক্ষী বিষয়া আহত হোৱা নাই বুলি আদালতে লক্ষ্য কৰি অস্ত্ৰ ব্যৱহাৰৰ প্ৰয়োজনীয়তাক লৈ প্ৰশ্ন উত্থাপন কৰে ।
লগতে পঢ়ক : চৰকাৰী কৰ্মচাৰীলৈ কঠোৰ নিৰ্দেশ; অনুমতি অবিহনে খুলিব নোৱাৰিব ছ’চিয়েল মিডিয়া একাউণ্ট
