নক্সালবাদৰ অন্ত পেলোৱাৰ দিশত আন এক সফলতা লাভ কৰিছে নিৰাপত্তা বাহিনীয়ে । এক সংঘৰ্ষত মাওবাদীৰ শীৰ্ষ নেতা গণেশ উইকেকে ধৰি ৬টা নক্সালবাদী নিহত হয় । যাৰ মূৰৰ দাম আছিল এক কোটি টকা ।

বৃহস্পতিবাৰে ওড়িশাৰ কন্ধমাল জিলাত নিৰাপত্তাৰক্ষীৰ সৈতে হোৱা সংঘৰ্ষত মাওবাদীৰ শীৰ্ষ নেতা গণেশ উইকেকে ধৰি ৬টা নক্সালবাদী নিহত হয় । ৰাজ্যখনত নক্সাল বিৰোধী অভিযানৰ নেতৃত্ব দিয়া জ্যেষ্ঠ বিষয়াসকলে কয় যে চকাপাড়া থানা এলেকাৰ অন্তৰ্গত গভীৰ বনাঞ্চলত সংঘটিত হৈছে এই এনকাউণ্টাৰ ।

মূৰৰ দাম আছিল ১ কোটি-

গণেশ উইক (৬৯) চি পি আই (মাওবাদী)ৰ কেন্দ্ৰীয় সমিতিৰ সদস্য আৰু ওড়িশাত নিষিদ্ধ সংগঠনটোৰ মুৰব্বী আছিল । এই নক্সালবাদীটোৰ মূৰৰ দাম ১.১ কোটি ঘোষণা কৰিছিল চৰকাৰে । মূলতঃ তেলেংগানাৰ নলগোণ্ডা জিলাৰ উইকে পক্কা হনুমন্তু আৰু ৰাজেশ তিৱাৰীকে ধৰি বিভিন্ন ছদ্মনামেৰেও জনা গৈছিল ।

নিৰাপত্তা সংস্থাসমূহৰ বাবে ডাঙৰ কৃতিত্ব-

আৰক্ষীয়ে জনোৱা মতে, এই সফল অভিযানত গণেশ উইকেৰ উপৰিও দুগৰাকী মহিলাকে ধৰি আন পাঁচটা নক্সালবাদীও নিহত হয় । আন নক্সালবাদীসকলৰ পৰিচয় এতিয়াও নিশ্চিত হোৱা নাই । নিৰাপত্তা বাহিনীৰ বাবে এইটো এটা ডাঙৰ কৃতিত্ব বুলি গণ্য কৰা হৈছে, কিয়নো উইকে দীৰ্ঘদিন ধৰি ৰাডাৰত আছিল আৰু অঞ্চলটোত নক্সালবাদী কাৰ্যকলাপৰ সৈতে জড়িত আছিল । বৰ্তমান অঞ্চলটোত অব্যাহত আছে তালাচী অভিযান ।

এছ অ’ জি, চি আৰ পি এফ আৰু বি এছ এফৰ যৌথ অভিযান-

ওড়িশা আৰক্ষীৰ নক্সাল অপাৰেশ্যনৰ ডি আই জি অখিলেশ্বৰ সিঙে কয় যে, “ওড়িশাৰ বিশেষ বাহিনী (এছ অ’ জি), চি আৰ পি এফ আৰু বি এছ এফৰ যুটীয়া দলে এই অভিযান চলাইছিল । ওড়িশাৰ কন্ধমাল জিলা আৰু গঞ্জাম জিলাৰ সীমান্তত অৱস্থিত ৰামপা বনাঞ্চলত গণেশ উইক নিহত হয় ।”

বিশেষ চোৰাংচোৱা শাখাৰ পৰা পোৱা গোপন খবৰৰ ভিত্তিত নিৰাপত্তা বাহিনীয়ে যৌথ অভিযান আৰম্ভ কৰে । অৰণ্যত নিৰাপত্তা বাহিনী দেখি নক্সালবাদীয়ে গুলীচালনা কৰে । লগে লগে নিৰাপত্তাৰক্ষীয়েও প্ৰত্যুত্তৰ দিয়ে । প্ৰচণ্ড গুলী বৰ্ষণত নিহত হয় নক্সালবাদী । এনকাউণ্টাৰ স্থানৰ পৰা দুটা INSAS ৰাইফল আৰু এটা .303 ৰাইফল উদ্ধাৰ কৰা হৈছে ।

কি ক’লে গৃহমন্ত্ৰীয়ে ?

নিৰাপত্তা বাহিনীৰ এই সফলতা সন্দৰ্ভত গৃহমন্ত্ৰী অমিত শ্বাহে ছ’চিয়েল মিডিয়া প্লেটফৰ্ম এক্সত লিখিছে, “এখন নক্সালমুক্ত ভাৰতৰ দিশত এক উল্লেখযোগ্য কৃতিত্ব । ওড়িশাৰ কন্ধমালত এক বৃহৎ অভিযানত কেন্দ্ৰীয় সমিতিৰ সদস্য গণেশ উইকেকে ধৰি ছয়জন নক্সালবাদী নিহত হৈছে । এই বৃহৎ সফলতাৰ সৈতে ওড়িশা নক্সালবাদৰ পৰা সম্পূৰ্ণৰূপে মুক্ত হোৱাৰ উপক্ৰম হৈছে । ৩১ মাৰ্চ, ২০২৬ৰ পূৰ্বে আমি নক্সালবাদৰ অন্ত পেলাবলৈ সংকল্পবদ্ধ ।”

লগতে পঢ়ক : বাংলাদেশত হিন্দু যুৱকৰ হত্যাক লৈ হাওৰাত তীব্ৰ প্ৰতিবাদ, আৰক্ষী আৰু বিজেপি সমৰ্থকৰ সংঘাত