এজন প্ৰাক্তন থানা প্ৰভাৰীসহ ৯ গৰাকী আৰক্ষী কৰ্মীক আদালতে যাৱজ্জীৱন কাৰাদণ্ডৰ শাস্তি বিহিছে

মহাৰাষ্ট্ৰৰ ৱাশ্বিম জিলা আদালতৰ এক ঐতিহাসিক ৰায় । আৰক্ষীৰ জিম্মাত হোৱা এক নিৰ্মম হত্যাকাণ্ডৰ গোচৰত আদালতৰ মজিয়াত দোষী সাব্যস্ত হ’ল খাকী পোছাকধাৰী । এজন প্ৰাক্তন থানা প্ৰভাৰীসহ ৯ গৰাকী আৰক্ষী কৰ্মীক আদালতে যাৱজ্জীৱন কাৰাদণ্ডৰ শাস্তি বিহিছে । ১৫ বছৰীয়া এক দীৰ্ঘদিনীয়া আইনী যুঁজৰ অন্তত অৱশেষত ন্যায় পালে এজন দুৰ্ভগীয়া মৃত যুৱকৰ বৃদ্ধ পিতৃ-মাতৃয়ে ।

নিশা ৩ বজাত ঘৰৰ পৰা উঠাই আনিছিল আৰক্ষীয়ে

এই জঘন্য ঘটনাটো সংঘটিত হৈছিল আজিপৰা প্ৰায় ১৫ বছৰ পূৰ্বে, ১০ মে’ত মহাৰাষ্ট্ৰৰ ৰিচোড আৰক্ষী থানাত । আৰক্ষীয়ে নিশা প্ৰায় ৩ বজাত পাৰ্ধী সম্প্ৰদায়ৰ বেগ্যা পাৱাৰ নামৰ এজন যুৱকক কেৱল সোধা-পোছা কৰাৰ নামত তেওঁৰ ঘৰৰ পৰা উঠাই আনিছিল । কিন্তু থানালৈ অনাৰ পিছতেই আৰক্ষীৰ লোকসকলে যুৱকজনৰ ওপৰত চলাইছিল অমানুষিক অত্যাচাৰ । জিম্মাতে নিৰ্মম প্ৰহাৰৰ ফলত থিতাতে মৃত্যু হৈছিল নিৰ্দোষ যুৱকজনৰ । জানিব পৰা মতে, মৃত যুৱকজনৰ বিৰুদ্ধে পূৰ্বৰ কোনো অপৰাধমূলক ৰেকৰ্ড নাছিল আৰু ঘটনাৰ মাত্ৰ এবছৰ পূৰ্বেহে তেওঁৰ বিবাহ সম্পন্ন হৈছিল ।

এজাহাৰ ল’বলৈ অমান্তি হৈছিল আৰক্ষী

পুত্ৰৰ আকস্মিক মৃত্যুৰ পিছত যেতিয়া বৃদ্ধ পিতৃ-মাতৃয়ে ন্যায় বিচাৰি ৰিচোড আৰক্ষী থানাত উপস্থিত হৈছিল, তেতিয়া তেওঁলোকক সহযোগিতা কৰাৰ বিপৰীতে খেদিহে পঠিওৱা হৈছিল । আনকি যিগৰাকী থানা প্ৰভাৰীৰ নাম এজাহাৰত আছিল, তেওঁ নিজেই গোচৰ ৰুজু কৰিবলৈ স্পষ্টভাৱে অস্বীকাৰ কৰিছিল । যুৱকজন পাৰ্ধী সম্প্ৰদায়ৰ হোৱাৰ বাবে এই ঘটনাৰ বিৰুদ্ধে সমগ্ৰ অঞ্চলটোত তীব্ৰ প্ৰতিবাদ আৰু গণ-বিক্ষোভ গঢ়ি উঠিছিল । পৰৱৰ্তী সময়ত মৰণোত্তৰ আৰু চিকিৎসা পৰীক্ষাত প্ৰকাশ পাইছিল যে আৰক্ষীৰ মাৰধৰৰ ফলত যুৱকজনৰ শৰীৰৰ কেইবাডালো গুৰুত্বপূৰ্ণ হাড় ভাঙি গৈছিল ।

চিআইডি-ৰ সূক্ষ্ম তদন্ত আৰু চাৰ্জশ্বীট

গোচৰটোৰ গুৰুত্ব আৰু সংবেদনশীলতা লক্ষ্য কৰি ইয়াৰ তদন্তৰ দায়িত্ব চিআইডি বিষয়া আনৱাৰ শ্বেখক অৰ্পণ কৰা হয় । চিআইডি বিষয়াগৰাকীয়ে অত্যন্ত সততা আৰু সূক্ষ্মতাৰে ঘটনাৰ প্ৰতিটো দিশ পৰীক্ষা কৰি আদালতত এক শক্তিশালী অভিযোগনামা দাখিল কৰে । এই চাৰ্জশ্বীটত বেগ্যা পাৱাৰৰ ওপৰত আৰক্ষী থানাত কেনেকৈ আৰু কিমান নৃশংসভাৱে থাৰ্ড ডিগ্ৰী প্ৰয়োগ কৰা হৈছিল, তাৰ পুংখানুপুংখ বিৱৰণ দাঙি ধৰা হৈছিল ।

১৫ বছৰৰ অন্তত কাৰাগাৰলৈ খাকী পোছাকধাৰী গুণ্ডা

ৱাশ্বিম জিলা সত্ৰ আদালতৰ ন্যায়াধীশ ঝাপাটেই সমগ্ৰ সাক্ষ্য-প্ৰমাণৰ ভিত্তিত ঐতিহাসিক ৰায়দান কৰি তদানীন্তন ৰিচোড থানাৰ প্ৰভাৰী মহাদেৱ মাণিক ধাণ্ডে আৰু আন ৮ গৰাকী আৰক্ষী কৰ্মীক দোষী সাব্যস্ত কৰে । উল্লেখ্য যে, এই ৯ জন অভিযুক্তৰ ভিতৰত দুজন আৰক্ষী কৰ্মীয়ে ইতিমধ্যে চাকৰিৰ পৰা অৱসৰো গ্ৰহণ কৰিছে । আদালতৰ ৰায়ৰ পিছতেই সকলোকে প্ৰথমে ৱাশ্বিম কাৰাগাৰ আৰু পৰৱৰ্তী সময়ত অমৰাৱতী কেন্দ্ৰীয় কাৰাগাৰলৈ স্থানান্তৰ কৰাৰ ব্যৱস্থা কৰা হৈছে ।

ইফালে আদালতৰ এই ৰায়দানৰ পিছত  কান্দি কান্দি সন্তোষ প্ৰকাশ কৰে যুৱকগৰাকীৰ বৃদ্ধ পিতৃ-মাতৃয়ে ।

লগতে পঢ়ক : স্কুল বাছৰ ওপৰত গছ বাগৰি ছাত্ৰৰ কৰুণ ঘটনা, হাহাকাৰ পৰিস্থিতি