কংগ্ৰেছ নেতা ৰাহুল গান্ধীয়ে উত্তৰ-পূৱৰ গলবস্ত্ৰ পৰিধান নকৰাক লৈ সৰৱ হৈ পৰিছে মুখ্যমন্ত্ৰী ড০ হিমন্ত বিশ্ব শৰ্মা । ৰাহুল গান্ধীয়ে উত্তৰ পূৰ্বাঞ্চলবাসীৰ মনত আঘাত হানিছে বুলি মন্তব্য মুখ্যমন্ত্ৰীৰ ।
শেহতীয়াকৈ বিশেষ ‘গলবস্ত্ৰ’ক লৈ উত্তাল হৈ পৰিছে দেশৰ ৰাজনীতি । গণতন্ত্ৰ দিৱসত ৰাষ্ট্ৰপতি ভৱনত আয়োজিত এক বিশেষ অনুষ্ঠানত কংগ্ৰেছ নেতা তথা সাংসদ ৰাহুল গান্ধীয়ে উত্তৰ-পূৱৰ বিশেষ গলবস্ত্ৰ পৰিধান তথা গ্ৰহণ নকৰাক লৈ ৰাজনৈতিক মহলত সৃষ্টি হৈছে প্ৰতিক্ৰিয়াৰ । ইয়াৰ পিছতে এতিয়া ৰাহুল গান্ধীৰ বিৰুদ্ধে সৰৱ হৈ উঠিছে ভাৰতীয় জনতা পাৰ্টী । দলটোৱে ৰাহুল গান্ধীয়ে উত্তৰ-পূৱক অপমান কৰিছে বুলি অভিযোগ উত্থাপন কৰিছে ।
এই ঘটনাক লৈ অসমৰ মুখ্যমন্ত্ৰী ড০ হিমন্ত বিশ্ব শৰ্মাই তীব্ৰ প্ৰক্ৰিয়া প্ৰকাশ কৰি ৰাহুল গান্ধীয়ে উত্তৰ-পূৱক ক্ষমা খোজিব লাগে বুলিও দাবী উত্থাপন কৰে । মঙলবাৰে এক চৰকাৰী অনুষ্ঠানত অংশগ্ৰহণ কৰি সাংবাদিকে সোধা প্ৰশ্নত মুখ্যমন্ত্ৰী ড০ হিমন্ত বিশ্ব শৰ্মাই ৰাহুল গান্ধীক তীক্ষ্ণ সমালোচনা কৰে । তেওঁ গান্ধী পৰিয়লে উত্তৰ-পূৱক সন্মান নকৰে বুলি অভিযোগ উত্থাপন কৰে । লগতে কয় যে, ৰাহুল গান্ধীয়ে উত্তৰ-পূৰ্বাঞ্চলবাসীৰ মনত আঘাত হানিছে ।
মুখ্যমন্ত্ৰী ড০ শৰ্মাই কয়- উত্তৰ-পূৱৰ বিভিন্ন অগং বস্ত্ৰ বা গলবস্ত্ৰ ৰাষ্ট্ৰপতি ভৱনত প্ৰধানমন্ত্ৰীয়ে দেশী-বিদেশী বিভিন্ন অতিথিসকলক দিয়াৰ ব্যৱস্থা কৰিছিল । সকলোৱে এই সন্মান গ্ৰহণ কৰিলে কিন্তু ৰাহুল গান্ধীয়ে তাক অস্বীকাৰ কৰিলে । উত্তৰ-পূৱৰ পৰা যোৱা গামোচাকে ধৰি কোনো অংগবস্ত্ৰ গ্ৰহণ নকৰিলে ৰাহুল গান্ধীয়ে । এই ঘটনাই সকলোকে দুখ দিছে । কিন্তু আমাৰ বাবে এয়া প্ৰথম কথা নহয় । ইয়াৰ পূৰ্বেও ৰাহুল গান্ধীয়ে অসমৰ গামোচাক অপমান কৰিছে ।
তেওঁ পুনৰ কয়- যদিও গুজৰাটৰ ব্যক্তি, প্ৰধানমন্ত্ৰী মোদীয়ে বিদেশতো গামোচাখন লৈ ফুৰে । কিন্তু ৰাহুল গান্ধীয়ে অসমলৈ আহিলেও গামোচাখন ল’বলৈ ইচ্ছা নকৰে । গতিকে মই ভাবো যে এই কথা ৰাইজে নিশ্চয়কৈ লক্ষ্য কৰিছে । গতিকে পূৰ্বেও যেনেকৈ শিক্ষা দিছে তেনেকৈ ভৱিষ্যতেও ৰাহুল গান্ধীক তেনেকৈ শিক্ষা দিব অসমৰ ৰাইজে ।
ৰাহুল গান্ধীৰ এই কাৰ্যক গৰিহণা দি মুখ্যমন্ত্ৰী ড০ শৰ্মাই কয়- গান্ধী পৰিয়ালে কেতিয়াও উত্তৰ-পূৱক সন্মান দিয়া নাই । আমাৰ কাম কৰাৰ বিপৰীতে আমাক অপমানহে কৰিছে । ৰাহুল গান্ধীয়ে কৰা এই কামক মই গৰিহণা দিছো । লগতে ৰাহুল গান্ধীক সকীয়াই দিব বিচাৰোঁ যে, যেতিয়ালৈকে উত্তৰ-পূৱক সন্মান কৰিবলৈ তেওঁ ৰাজী নহয় তেতিয়ালৈকে উত্তৰ-পূৱত ভোট খুজিবলৈয়ো আহিব নালাগে ।
মুখ্যমন্ত্ৰীয়ে কয় যে, গলবস্ত্ৰ পৰিধান কৰাটোত কোনো বাধ্যবাধকতা নাই । এয়া এক সংস্কৃতি । সংস্কৃতিক সন্মান কৰাতো এক কৰ্তব্য হয় । যদি আপুনি সংস্কৃতিক সন্মান নজনাই তেন্তে জনসাধাৰণে ভোটেৰে ইয়াৰ শাস্তি দিব ।
লগতে পঢ়ক : পাকিস্তানৰ সৈতে কি সম্পৰ্ক গৌৰৱ গগৈৰ? ৮ ফেব্ৰুৱাৰীত ফাদিল হ’ব ৰহস্যৰ !
