আজি ঘোষণা কৰা পদ্ম বঁটাত অন্তৰ্ভূক্ত হৈছে দেশৰ ক্ৰীড়া জগতৰ কেইবাগৰাকীও কিংবদন্তি । ৰোহিত শৰ্মা আৰু হৰমনপ্ৰীত কৌৰলৈ আগবঢ়োৱা হৈছে পদ্মশ্ৰী বঁটা ।
ভাৰতৰ কিংবদন্তি টেনিছ খেলুৱৈ বিজয় অমৃতৰাজক পদ্মভূষণ বঁটাৰে সন্মানিত কৰা হৈছে । ভাৰতীয় মহিলা ক্ৰিকেট দলৰ অধিনায়ক হৰমনপ্ৰীত কৌৰ আৰু পুৰুষ দলৰ প্ৰাক্তন অধিনায়ক ৰোহিত শৰ্মাক পদ্মশ্ৰী বঁটা প্ৰদান কৰা হৈছে । গণৰাজ্য দিৱসৰ প্ৰাকক্ষণত দেওবাৰে ঘোষণা কৰা হয় পদ্ম বঁটা ।
এইবাৰ পদ্মভূষণ লাভ কৰা ক্ৰীড়া জগতৰ একমাত্ৰ খেলুৱৈ বিজয় অমৃতৰাজ । পদ্মভূষণ ভাৰতৰ তৃতীয় সৰ্বোচ্চ অসামৰিক বঁটা, পদ্মশ্ৰী চতুৰ্থ । ইয়াৰ পূৰ্বে অমৃতৰাজে ১৯৮৩ চনত পদ্মশ্ৰী বঁটা আৰু ১৯৭৪ চনত অৰ্জুন বঁটা লাভ কৰি ভাৰতীয় ক্ৰীড়ালৈ তেওঁৰ দীৰ্ঘদিনীয়া আৰু উল্লেখযোগ্য অৱদানৰ প্ৰতিফলন ঘটাইছে ।
এই খেলুৱৈসকললৈ পদ্ম সন্মান-
ৰোহিত শৰ্মা আৰু হৰমনপ্ৰীত কৌৰৰ উপৰিও প্ৰাক্তন ভাৰতীয় বেগী বলাৰ প্ৰবীণ কুমাৰ আৰু ভাৰতীয় মহিলা হকী দলৰ গ’লৰক্ষক সবিতা পুনিয়াক পদ্মশ্ৰী বঁটা প্ৰদান কৰা হৈছে । বলদেৱ সিং, ভগৱানদাস ৰায়কৱাৰ আৰু কে পাঞ্জানিভেলকো ক্ৰীড়ালৈ আগবঢ়োৱা অৱদানৰ বাবে পদ্মশ্ৰী বঁটা প্ৰদান কৰা হৈছে ।
ভাৰতত মহিলা হকীৰ নতুন ৰূপ দিয়াৰ ক্ষেত্ৰত প্ৰশিক্ষক হিচাপে বলদেৱ সিঙৰ অৱদান উল্লেখযোগ্য । বিজয় অমৃতৰাজক ভাৰতীয় টেনিছৰ পথ প্ৰদৰ্শক হিচাপে গণ্য কৰা হয় । কেৰিয়াৰত তেওঁ দুবাৰকৈ উইম্বলডন আৰু ইউ এছ অ’পেনত কোৱাৰ্টাৰ ফাইনেলত প্ৰৱেশ কৰিছিল ।
ইফালে ভাৰতীয় মহিলা ক্ৰিকেট দলৰ অধিনায়ক হৰমনপ্ৰীত কৌৰৰ বাবে ২০২৫ বৰ্ষটো বিশেষ বৰ্ষ আছিল, কিয়নো তেওঁৰ নেতৃত্বত ভাৰতীয় মহিলা দলটোৱে ঘৰুৱা মাটিত প্ৰথমবাৰৰ বাবে বিশ্বকাপ জয় কৰিছিল ।
ৰোহিত শৰ্মাই ২০২৫ চনত টেষ্ট ক্ৰিকেটৰ পৰা অৱসৰ গ্ৰহণ কৰিছিল যদিও এদিনীয়া ক্ৰিকেটত তেওঁ ভাৰতৰ হৈ গুৰুত্বপূৰ্ণ খেলুৱৈ হৈ আছে । তেওঁৰ নেতৃত্বত ভাৰতে টি-২০ বিশ্বকাপ আৰু চেম্পিয়নছ ট্ৰফী জয় কৰিছিল । তদুপৰি প্ৰাক্তন মল্লযুঁজৰ প্ৰশিক্ষক ভ্লাদিমিৰ মেষ্টভিৰিছভিলিক মৰণোত্তৰভাৱে পদ্মশ্ৰী বঁটা প্ৰদান কৰা হৈছে ।
উল্লেখ্য যে, দেওবাৰে কেন্দ্ৰীয় চৰকাৰে পদ্ম বঁটা ২০২৬ৰ তালিকা প্ৰকাশ কৰি মুঠ ১৩১টা অসামৰিক সন্মানত অনুমোদন জনায় । ইয়াৰ ভিতৰত আছে পাঁচটা পদ্ম বিভূষণ, ১৩টা পদ্মভূষণ আৰু ১১৩টা পদ্মশ্ৰী বঁটা । এই তালিকাত ক্ৰীড়া, কলা, চিনেমা, সাহিত্য, জনসেৱা আৰু অন্যান্য ক্ষেত্ৰৰ বিশিষ্ট ব্যক্তিত্বসমূহ অন্তৰ্ভুক্ত কৰা হৈছে ।
পদ্ম বঁটা ২০২৬ : ক্ৰীড়া জগতৰ পৰা সন্মানিত কিংবদন্তি
বিজয় অমৃতৰাজ – পদ্ম ভূষণ
-বলদেৱ সিং – পদ্মশ্ৰী
-ভগৱানদাস ৰাইকাৰ – পদ্মশ্ৰী
হৰমনপ্ৰীত কৌৰ – পদ্মশ্ৰী
কে পাঞ্জনিভেল – পদ্মশ্ৰী
প্ৰবীণ কুমাৰ – পদ্মশ্ৰী
ৰোহিত শৰ্মা – পদ্মশ্ৰী
সবিতা পুনিয়া – পদ্মশ্ৰী
লগতে পঢ়ক : গণতন্ত্ৰ দিৱসে অতীত, বৰ্তমান আৰু ভৱিষ্যতক সংযোগ কৰে… দেশবাসীক সম্বোধন ৰাষ্ট্ৰপতি দ্ৰৌপদী মুৰ্মুৰ
