বাংলাদেশত ৰাজনৈতিক অস্থিৰতা আৰু নিৰাপত্তাক লৈ ক্ৰমে উদ্বেগ বৃদ্ধি পাইছে । ইয়াৰ মাজতে ভাৰতে এক বৃহৎ পদক্ষেপ গ্ৰহণ কৰিছে ।
বাংলাদেশৰ অৱনতি ঘটা নিৰাপত্তাজনিত পৰিস্থিতিৰ প্ৰতি লক্ষ্য ৰাখি ভাৰতে এক বৃহৎ পদক্ষেপ গ্ৰহণ কৰিছে । ভাৰত চৰকাৰে দেশখনত নিয়োজিত ভাৰতীয় কূটনীতিবিদৰ পৰিয়ালক পুনৰ ঘূৰাই অনাৰ সিদ্ধান্ত লৈছে । কিন্তু চৰকাৰে স্পষ্টকৈ উল্লেখ কৰিছে যে ইয়াৰ ফলত বৰ্তমান বাংলাদেশত কৰ্মৰত ভাৰতীয় কূটনীতিবিদৰ সংখ্যাত কোনো প্ৰভাৱ নপৰে । ভাৰতীয় উচ্চায়ুক্ত আৰু ঢাকাত থকা অন্যান্য সহযোগী উচ্চায়ুক্তসমূহে পূৰ্বৰ দৰেই কাম কৰি যাব ।
বাংলাদেশত সংসদীয় নিৰ্বাচন অনুষ্ঠিত হোৱাৰ মাত্ৰ কেইসপ্তাহমান পূৰ্বে এই সিদ্ধান্ত লোৱা হৈছে । ২০২৪ চনৰ আগষ্ট মাহত শ্বেখ হাছিনাৰ চৰকাৰৰ পতনৰ পিছত এয়া প্ৰথমটো নিৰ্বাচন অনুষ্ঠিত হ’ব । ছাত্ৰ আন্দোলনৰ পিছত শ্বেখ হাছিনাৰ চৰকাৰক উৎখাত কৰা হৈছিল । তেতিয়াৰ পৰাই দেশখনত ৰাজনৈতিক অস্থিৰতা আৰু নিৰাপত্তাক লৈ উদ্বেগ বৃদ্ধি পাইছে ।
ইফালে যোৱা মাহত ভাৰতে বাংলাদেশৰ উচ্চায়ুক্ত ৰিয়াজ হামিদুল্লাক তলব কৰিছিল । বাংলাদেশৰ অৱনতি ঘটা আইন-শৃংখলা পৰিস্থিতিক লৈ তীব্ৰ প্ৰতিবাদ দাখিল কৰিছিল ভাৰতে । ঢাকাত ভাৰতীয় উচ্চায়ুক্তৰ আশে-পাশে প্ৰতিবাদৰ সূত্ৰপাত হোৱাৰ পিছত এই বিৰোধিতা কৰা হয় । এই ঘটনাই দুয়োখন দেশৰ সম্পৰ্ক আৰু অধিক কঠিন কৰি তোলে ।
আনহাতে বাংলাদেশত সংখ্যালঘু লোকৰ বিৰুদ্ধে হিংসাৰ ঘটনা তীব্ৰভাৱে বৃদ্ধি পাইছে । মহম্মদ ইউনুছৰ নেতৃত্বত গঠিত অন্তৱৰ্তীকালীন চৰকাৰৰ তথ্য অনুসৰি ২০২৫ চনত সংখ্যালঘুৰ বিৰুদ্ধে ৬৪৫টা হিংসাত্মক কাণ্ড সংঘটিত হৈছে । এই সংখ্যাসমূহ ২০২৫ চনৰ জানুৱাৰীৰ পৰা ডিচেম্বৰলৈকে আৰক্ষীৰ ৰেকৰ্ড, এফ আই আৰ, সাধাৰণ ডায়েৰী, চাৰ্জ শ্বীট আৰু তদন্তৰ প্ৰতিবেদনৰ ওপৰত ভিত্তি কৰি লোৱা হৈছে ।
লগতে পঢ়ক : গ্ৰীণলেণ্ডক লৈ আকোঁৰগোজ ট্ৰাম্প; সীমা, পৰিচয় আৰু স্বাধীনতাৰ সৈতে আপোচ নকৰাৰ হুংকাৰ ডেনমাৰ্কৰ
