দেওবাৰে ভাৰত-নিউজীলেণ্ডৰ মাজত অনুষ্ঠিত হ’ব এদিনীয়া শৃংখলাৰ প্ৰথমখন মেচ । এই শৃংখলাত সকলোৰে দৃষ্টি নিবদ্ধ থাকিব ৰোহিত-কোহলীৰ ওপৰত ।
দেওবাৰৰ পৰা আৰম্ভ হ’ব ভাৰত আৰু নিউজীলেণ্ডৰ মাজৰ তিনিখন খেলৰ এদিনীয়া শৃংখলা । বদোদৰাৰ বি চি এ ক্ৰিকেট ষ্টেডিয়ামত দুয়োটা দলৰ মাজত অনুষ্ঠিত হ’ব প্ৰথমখন এদিনীয়া খেল । দুপৰীয়া ১ বজাত টছ অনুষ্ঠিত হ’ব, মেচখন ১:৩০ বজাৰ পৰা আৰম্ভ হ’ব । উল্লেখ্য যে, এই খেলপথাৰত ভাৰতীয় দলটোৱে প্ৰথমবাৰৰ বাবে খেলিব । ইয়াৰ পূৰ্বে এইখন গ্ৰাউণ্ডত ভাৰত আৰু ৱেষ্ট ইণ্ডিজ মহিলা দলৰ মাজত এদিনীয়া শৃংখলা অনুষ্ঠিত হৈছিল ।
ৰোহিত-কোহলীৰ ওপৰত থাকিব দৃষ্টি-
সকলোৰে দৃষ্টি পুনৰ এবাৰ ভাৰতীয় দলৰ দুই তাৰকা তথা বিস্ফোৰক বেটছমেন ৰোহিত শৰ্মা আৰু বিৰাট কোহলীৰ ওপৰত থাকিব । বিগত দক্ষিণ আফ্ৰিকাৰ বিৰুদ্ধে এদিনীয়া শৃংখলাত দুয়োগৰাকীয়ে বিস্ফোৰক প্ৰদৰ্শন আগবঢ়াইছিল । ইফালে বিৰাট কোহলীয়ে আন্তঃৰাষ্ট্ৰীয় ক্ৰিকেটত ১০০ শতক অৰ্জনৰ দিশে দ্ৰুতগতিত আগবাঢ়িছে । গতিকে এই ছিৰিজতো তেওঁ কমেও দুটা শতক অৰ্জন কৰাত লক্ষ্য ৰাখিব । দক্ষিণ আফ্ৰিকাৰ বিৰুদ্ধে তিনিখন মেচৰ শৃংখলাত দুটা শতক অৰ্জন কৰিছিল কিং কোহলীয়ে ।
মাইকেল ব্ৰেচৱেলৰ হাতত কিৱি দলৰ বাঘজৰী-
কেইবাগৰাকীও গুৰুত্বপূৰ্ণ খেলুৱৈৰ অনুপস্থিতিত নিউজীলেণ্ড দলৰ নেতৃত্ব দিব মাইকেল ব্ৰেচৱেলে । নিয়মীয়া অধিনায়ক মিচেল ছেণ্টনাৰ গ্ৰ’ইনৰ আঘাতৰ বাবে এদিনীয়া শৃংখলাৰ পৰা আঁতৰি থকাৰ বিপৰীতে টম লেথামে প্ৰথম সন্তান জন্মৰ বাবে ঘৰলৈ উভতি গৈছে । এছ এ ২০ লীগৰ বাবে দক্ষিণ আফ্ৰিকাত আছে প্ৰাক্তন অধিনায়ক কেন উইলিয়ামছন । আনহাতে ৰাচিন ৰবিন্দ্ৰ আৰু বেগী বলাৰ জেকব ডাফীক এই শৃংখলাৰ বাবে জিৰণি দিয়া হৈছে ।
ইফালে আঘাতৰ পৰা সুস্থ হৈ উঠা মেট হেনৰীয়ে আগন্তুক টি-২০ বিশ্বকাপৰ প্ৰতি দৃষ্টি ৰাখি টি-২০ শৃংখলাত মনোনিৱেশ কৰিছে । ওখ অল-ৰাউণ্ডাৰ কাইল জেমিছন আৰু ২৩ বছৰীয়া লেগ স্পীনাৰ আদিত্য অশোকৰ প্ৰদৰ্শনৰ ওপৰতো তীক্ষ্ণ দৃষ্টি থাকিব । ছেন্টনাৰৰ সলনি জেডেন লেনক্সক দলত অন্তৰ্ভুক্ত কৰা হৈছে । উল্লেখ্য যে, কেইবাজনো নতুন আৰু অনভিজ্ঞ মুখৰ ভিতৰত ডেভন কনৱে, ডেৰিল মিচেল, হেনৰী নিকোলছ, উইল ইয়ং, গ্লেন ফিলিপছৰ দৰে খেলুৱৈৰ উপস্থিতিয়ে নিউজীলেণ্ডৰ বেটিং ক্ৰম শক্তিশালী কৰি তুলিছে ।
এদিনীয়া শৃংখলাৰ বাবে টিম ইণ্ডিয়া-
শুভমন গীল (অধিনায়ক), যশস্বী জয়ছোৱাল, বিৰাট কোহলী, ৰোহিত শৰ্মা, কে এল ৰাহুল (উইকেটকীপাৰ), ঋষভ পন্ট (উইকেটকীপাৰ), ৰবীন্দ্ৰ জাডেজা, নীতিশ কুমাৰ ৰেড্ডী, ৱাশ্বিংটন সুন্দৰ, কুলদীপ যাদৱ, অৰ্শদীপ সিং, প্ৰসিদ্ধ কৃষ্ণ, মহম্মদ চিৰাজ, হৰ্ষিত ৰানা ।
লগতে পঢ়ক : ‘ভাগ্যত লিখা কথা কোনেও কাঢ়ি নিব নোৱাৰে’;টি-২০ বিশ্বকাপৰ পৰা বাদ পৰাৰ পিছত শুভমান গিলৰ দুখ প্ৰকাশ
