বিৰোধী দলপতি তথা লোকসভাৰ সাংসদ ৰাহুল গান্ধীক কটাক্ষ গৃহমন্ত্ৰী অমিত শ্বাহৰ । পৰাজয়ৰ বাবে ৰাহুলক এতিয়াই ভাগৰি নপৰিবলৈ কয় শ্বাহে । তেওঁ কয় যে, বংগ আৰু তামিলনাডুতো পৰাস্ত হ’বলৈ বাকী আছে…
কেন্দ্ৰীয় গৃহমন্ত্ৰী অমিত শ্বাহে লোকসভাৰ বিৰোধী দলপতি তথা কংগ্ৰেছৰ সাংসদ ৰাহুল গান্ধীক তীব্ৰ কটাক্ষ কৰি কয় যে, “এতিয়াই পৰাজিত হৈ ভাগৰি নাযাব । বংগ আৰু তামিলনাডুতো পৰাস্ত হ’ব লাগিব ।” আহমেদাবাদত এক অনুষ্ঠানত অমিত শ্বাহে কয় যে ২০২৯ চনত প্ৰধানমন্ত্ৰী নৰেন্দ্ৰ মোদীৰ নেতৃত্বত পুনৰ এবাৰ বিজেপি চৰকাৰ গঠন হ’ব ।
“ৰাহুল বাবা, এতিয়াই ভাগৰি নপৰিব…”
দেওবাৰে আহমেদাবাদ পৌৰ নিগমৰ ৩৩০ কোটি টকাৰ উন্নয়নমূলক প্ৰকল্পৰ উদ্বোধনী অনুষ্ঠানত অংশগ্ৰহণ কৰে অমিত শ্বাহে । এই অনুষ্ঠানত ভাষণত তেওঁ কংগ্ৰেছ নেতা ৰাহুল গান্ধীক তীব্ৰ কটাক্ষ কৰে । তেওঁ কয়, “ৰাহুল বাবা, এতিয়াই ভাগৰি নপৰিবা । পৰাজয়ত ভাগৰি নাযাবা । বংগ আৰু তামিলনাডুতো পৰাজিত হ’ব লাগিব ।” তেওঁ লগতে কয়, “২০২৯ চনত পুনৰবাৰ প্ৰধানমন্ত্ৰী মোদীৰ নেতৃত্বত বিজেপিয়ে চৰকাৰ গঠন কৰিব । ইয়াৰ কাৰণ হৈছে বিজেপিৰ নীতি, যাৰ সৈতে জনসাধাৰণ সংযুক্ত হৈ আছে ।”
‘কংগ্ৰেছে বিজেপিৰ প্ৰতিটো সিদ্ধান্তৰ বিৰোধিতা কৰিছিল’
গৃহমন্ত্ৰীগৰাকীয়ে কয়, “যেতিয়া বিজেপিয়ে ৰাম মন্দিৰ নিৰ্মাণ কৰিছিল তেতিয়া কংগ্ৰেছে প্ৰতিবাদ কৰিছিল । পাকিস্তানত চাৰ্জিকেল ষ্ট্ৰাইকৰ বিৰোধিতা কৰিছিল । কংগ্ৰেছে বিমান আক্ৰমণৰো প্ৰতিবাদ কৰিছিল । বাংলাদেশী অনুপ্ৰৱেশকাৰীক আঁতৰোৱাৰ কথা চৰ্চা হ’লে বিৰোধিতা কৰিছিল । কাশীত নতুন মন্দিৰ নিৰ্মাণ হ’লেও বিৰোধিতা কৰিছিল । কাশ্মীৰৰ পৰা ৩৭০ অনুচ্ছেদ আঁতৰোৱাৰ সময়তো কংগ্ৰেছে প্ৰতিবাদ কৰিছিল । তিনি তালাক বিলুপ্ত হোৱাৰ সময়তো বিৰোধিতা কৰিছিল । যেতিয়া কমন চিভিল কোড প্ৰৱৰ্তন কৰা হৈছিল, তেতিয়াও বিৰোধিতা কৰিছিল ।”
“ৰাহুল বাবাক বুজোৱাৰ ক্ষমতা মোৰ নাই”
অমিত শ্বাহে কয়, “ৰাহুল গান্ধী আৰু কংগ্ৰেছে জনসাধাৰণে যি ভাল পায় তাৰ বিৰোধিতা কৰে, গতিকে ভোট কেনেকৈ পাব ?” তেওঁ আৰু কয়, “ৰাহুল বাবাক বুজোৱাৰ ক্ষমতা মোৰ নাই, কাৰণ যিসকলক তেওঁৰ নিজৰ দলে পতিয়ন নিয়াব নোৱাৰিলে, তেওঁলোকক তেওঁ কেনেকৈ পতিয়ন নিয়াব ?”
লগতে পঢ়ক : সভ্যতাৰ যুঁজত আমাক ভিতৰৰ পৰা দুৰ্বল কৰাৰ চেষ্টা… বিজেপিৰ কাৰ্যনিৰ্বাহকত মুখ্যমন্ত্ৰী হিমন্ত বিশ্ব শৰ্মা
