ভাৰত-বাংলাদেশৰ সম্পৰ্কত অব্যাহত আছে উত্তেজনা । ইয়াৰ মাজতে ভাৰতে দেশখনৰ বিৰুদ্ধে গ্ৰহণ কৰিছে এক ডাঙৰ সিদ্ধান্ত ।
কেন্দ্ৰীয় চৰকাৰে ২০২৫ চনৰ ১৭ ডিচেম্বৰত জাননী জাৰি কৰি বাংলাদেশৰ ৰাজধানী ঢাকাত থকা ভাৰতীয় ভিছা আবেদন কেন্দ্ৰ (আই ভি এ চি) বন্ধ কৰি দিছে । উগ্ৰপন্থী উপাদানৰ ভাবুকি আৰু বাংলাদেশী নেতাসকলৰ উচটনিমূলক মন্তব্যকে ধৰি নিৰাপত্তাজনিত উদ্বেগ বৃদ্ধি পোৱাৰ মাজতে এই সিদ্ধান্ত গ্ৰহণ কৰিছে ভাৰতে ।
বাংলাদেশত ১৬ টা ভাৰতীয় আই ভি এ চি-
আই ভি এ চিৰ মূল কেন্দ্ৰটো ঢাকাৰ যমুনা ফিউচাৰ পাৰ্কত অৱস্থিত । কেন্দ্ৰটোৱে জাননী জাৰি কৰি কয় যে বৰ্তমানৰ নিৰাপত্তা পৰিস্থিতিৰ বাবে এই কেন্দ্ৰটো ২ বজাৰ পৰা বন্ধ থাকিব । ইয়াৰ ফলত বৰ্তমানৰ নিযুক্তি থকা আবেদনকাৰীসকলো প্ৰভাৱিত হৈছে । বাংলাদেশত মুঠ ১৬টা ভাৰতীয় ভিছা কেন্দ্ৰ আছে, যিবোৰে বছৰি প্ৰায় ২২ লাখ আবেদন প্ৰক্ৰিয়াকৰণ কৰে ।
ভাৰতীয় উচ্চায়ুক্তৰ নিৰাপত্তাক লৈ গুৰুতৰ উদ্বেগ-
ভাৰতে বাংলাদেশৰ উচ্চায়ুক্ত মহম্মদ ৰিয়াজ হামিদুল্লাক চমন কৰাৰ পিছতে কেন্দ্ৰীয় চৰকাৰে এই পদক্ষেপ লৈছে । ভাৰতে ঢাকাত ভাৰতীয় উচ্চায়ুক্তৰ নিৰাপত্তাক লৈ গুৰুতৰ উদ্বেগ প্ৰকাশ কৰে । বৈদেশিক পৰিক্ৰমা মন্ত্ৰালয়ে উল্লেখ কৰিছে যে একাংশ উগ্ৰপন্থীয়ে ভাৰতীয় মিচনৰ আশে-পাশে থকা নিৰাপত্তা পৰিস্থিতিত ব্যাঘাত জন্মাবলৈ পৰিকল্পনা কৰিছে । লগতে ভাৰতে বাংলাদেশত অস্থিৰতা সৃষ্টি কৰিবলৈ চেষ্টা কৰা বুলি উত্থাপিত অভিযোগ তীব্ৰভাৱে নাকচ কৰিছে ।
ভাৰতক ভাবুকি বাংলাদেশৰ নেতাৰ-
বাংলাদেশৰ নেশ্যনেল চিটিজেন পাৰ্টিৰ নেতা হাছনাত আব্দুল্লাই ভাৰতক মুকলি ভাবুকি প্ৰদান কৰিছে । ১৫ ডিচেম্বৰত অনুষ্ঠিত এক সমাৱেশত তেওঁ উল্লেখ কৰে যে বাংলাদেশ অস্থিৰ হ’লে সীমান্তৰ সিপাৰে প্ৰতিৰোধৰ জুই বিয়পিব । তেওঁ ভাৰতৰ উত্তৰ-পূবৰ ৰাজ্যসমূহ (সাত ভগ্নী) পৃথক কৰি বিচ্ছিন্নতাবাদীক আশ্ৰয় দিয়াৰ হুংকাৰ দিয়ে ।
শ্বেখ হাছিনাক প্ৰত্যাৰ্পণৰ দাবী-
ভাৰতীয় উচ্চায়ুক্তক মাতি বাংলাদেশে প্ৰাক্তন প্ৰধানমন্ত্ৰী শ্বেখ হাছিনাক প্ৰত্যাৰ্পণৰ দাবী পুনৰবাৰ প্ৰকাশ কৰিছে । যোৱা বছৰৰ আগষ্ট মাহত ক্ষমতাৰ পৰা অপসাৰিত হোৱাৰ পিছৰে পৰা শ্বেখ হাছিনা ভাৰতত আশ্ৰয় লৈ আছে । মহম্মদ ইউনুছৰ অন্তৱৰ্তীকালীন চৰকাৰৰ সময়ৰ পৰাই ভাৰত-বাংলাদেশৰ সম্পৰ্কত উত্তেজনা বৃদ্ধি পাইছে ।
ভাৰতে স্পষ্টকৈ উল্লেখ কৰিছে যে বাংলাদেশৰ জনসাধাৰণৰ সৈতে বন্ধুত্বৰ কামনা কৰে কিন্তু নিজৰ নিৰাপত্তা আৰু মিচন সুৰক্ষিত কৰাৰ বাবে প্ৰয়োজনীয় পদক্ষেপ গ্ৰহণ কৰিব ।
লগতে পঢ়ক : ১২ বছৰত গ্রেপ্তাৰ ২১,৪০৭ বাংলাদেশী, ভাৰত–বাংলা সীমান্তৰ ২১% উন্মুক্ত
