ঘাইপথত জৰুৰীকালীন অৱতৰণ কৰাৰ সময়তে এখন বিমানে চাৰিচকীয়া বাহনত খুন্দা মাৰে । কাৰিকৰী সমস্যাৰ সন্মুখীন হৈ পাইলটজনে ঘাইপথত অৱতৰণ কৰিবলৈ বাধ্য হয় ।
সোমবাৰে সন্ধিয়া আমেৰিকাৰ ফ্ল’ৰিডাৰ মেৰিট দ্বীপৰ সমীপৰ ব্যস্ত আই-৯৫ ঘাইপথত জৰুৰীকালীন অৱতৰণ কৰি থকা অৱস্থাত এখন সৰু বিমানে চাৰিচকীয়া বাহনত খুন্দা মাৰে । কাৰিকৰী সমস্যাৰ সন্মুখীন হৈ পাইলটজনে ঘাইপথত অৱতৰণ কৰিবলৈ বাধ্য হয় যদিও ট্ৰেফিকৰ মাজতে অৱতৰণ কৰাৰ সময়তে বিমানখনে এখন চাৰিচকীয়া বাহনত খুন্দা মাৰে ।
বিমানখন আছিল বিচক্ৰাফ্ট ৫৫ মডেল, য’ত আছিল ২৭ বছৰীয়া পাইলট আৰু তেওঁৰ সতীৰ্থ । দুয়োগৰাকীৰ কোনোৱেই আহত হোৱা নাই । ফ্ল’ৰিডা হাইৱে পেট্ৰ’লৰ মতে, বিমানখনৰ হঠাতে দুয়োটা ইঞ্জিনৰ শক্তি হেৰুৱাই পেলোৱাৰ ফলত পাইলটে জৰুৰীকালীন অৱতৰণ কৰিবলৈ বাধ্য হয় ।
ইফালে চাৰিচকীয়া বাহনখন চলাই থকা ৫৭ বছৰীয়া মহিলাগৰাকী সামান্য আঘাতপ্ৰাপ্ত হয় আৰু তেওঁক ওচৰৰ চিকিৎসালয়ত ভৰ্তি কৰোৱা হয় । ৫:৪৫ বজাত সংঘটিত হয় এই দুৰ্ঘটনা । এই সংঘৰ্ষৰ পিছতে অঞ্চলটোত আতংকৰ সৃষ্টি হয় ।
দুৰ্ঘটনাটোৰ ফলত ২০১ মাইল মাৰ্কাৰৰ সমীপত আই-৯৫ৰ দক্ষিণমুখী লেন সম্পূৰ্ণৰূপে বন্ধ হৈ পৰে । উদ্ধাৰ আৰু সাহায্যকাৰী দল ঘটনাস্থলীত উপস্থিত হৈ তদন্ত আৰম্ভ কৰে । কেইবাঘণ্টা ধৰি ঘাইপথটো বন্ধ হৈ থাকে আৰু পুৱা প্ৰায় ৯ বজাত পুনৰ মুকলি হয় ।
লগতে পঢ়ক : ভয়ংকৰ দুৰ্ঘটনাত পতিত হ’ল আমেৰিকাৰ অত্যধুনিক যুদ্ধ বিমান
