ইমৰাণ খানক লৈ চলি থকা উৎকণ্ঠাৰ অন্ত পৰাৰ দিশে
মঙলবাৰে পাকিস্তান চৰকাৰে ইমৰাণ খানৰ ভগ্নীক কাৰাগাৰত সাক্ষাৎ কৰিবলৈ অনুমতি দিয়ে । প্ৰাক্তন প্ৰধানমন্ত্ৰীগৰাকীৰ স্বাস্থ্যক লৈ চলি থকা ধাৰাবাহিক জল্পনা-কল্পনাৰ মাজতে ৰাৱালপিণ্ডীৰ আদিয়ালা জেলৰ বাহিৰত বৃহৎ সংখ্যক দলীয় সমৰ্থক সমবেত হোৱাৰ পিছতে চৰকাৰে এই সিদ্ধান্ত গ্ৰহণ কৰে । উল্লেখ্য যে, ২০২৩ চনৰ আগষ্ট মাহৰ পৰা কেইবাটাও গোচৰৰ সৈতে জড়িত হৈ কাৰাগাৰত বন্দী হৈ আছে ৭৩ বছৰীয়া প্ৰাক্তন ক্ৰিকেটাৰৰ তথা ৰাজনীতিবিদ ইমৰাণ খান ।
যোৱা এমাহ ধৰি নেতাগৰাকীক কাকোৱেই সাক্ষাৎ কৰিবলৈ দিয়া হোৱা নাই । দীৰ্ঘদিন ধৰি পাকিস্তান চৰকাৰে ইমৰাণ খানৰ পৰিয়ালৰ লোকক সাক্ষাতত বাধা দি আহিছিল । পাকিস্তান তেহৰিক-ই-ইনছাফৰ মুৰব্বীগৰাকীক সাক্ষাৎ কৰিবলৈ পৰিয়ালৰ লোকক অবিৰতভাৱে অনুমতি প্ৰদান নকৰাৰ বাবে ছ’চিয়েল মিডিয়াত তেওঁ জীয়াই আছে নে মৃত বুলি জল্পনা-কল্পনাৰ সৃষ্টি হৈছিল । অৱশ্যে আদিয়ালা জেলৰ বিষয়াসকলে তেওঁৰ স্বাস্থ্য ভাল বুলি সদৰী কৰিছে ।
জানিব পৰা মতে প্ৰায় এমাহৰ অন্তত প্ৰাক্তন প্ৰধানমন্ত্ৰীগৰাকীৰ ভগ্নী ডাঃ উজমা খানক লগ কৰাৰ অনুমতি প্ৰদান কৰা হৈছে । খবৰ অনুসৰি কাৰাগাৰ প্ৰশাসনে ডাঃ উজমাক কাৰাগাৰৰ চৌহদৰ ভিতৰলৈ নিমন্ত্ৰণ জনাইছে, য’ত তেওঁ ইমৰাণক সাক্ষাৎ কৰিব । ইফালে আদিয়ালা জেলৰ বাহিৰত প্ৰাক্তন প্ৰধানমন্ত্ৰীগৰাকীৰ বৃহৎ সংখ্যক সমৰ্থক একত্ৰিত হৈছে । আনহাতে ভগ্নীৰ সৈতে হোৱা সাক্ষাতৰ পিছতহে ইমৰাণ খানৰ স্বাস্থ্য সম্পৰ্কীয় তথ্য প্ৰকাশ পাব ।
ইফালে, প্ৰকাশিত এক বিবৃতিত প্ৰাক্তন প্ৰধানমন্ত্ৰীগৰাকীৰ অন্যতম ভগ্নী ডাঃ উজমা খানক লগ কৰিবলৈ অনুমতি দিয়া বুলি উল্লেখ কৰে যদিও চৰকাৰে দিয়া প্ৰতিশ্ৰুতি পূৰণ কৰে নে নকৰে সেয়া হ’ব লক্ষ্যণীয় । ইফালে দলীয় সমৰ্থকৰ প্ৰতিবাদ ৰোধ কৰিবলৈ পঞ্জাৱ চৰকাৰে আদিয়ালা পথত ৰাৱালপিণ্ডি আৰক্ষী বাহিনী মোতায়েন কৰিছে । ইতিমধ্যে ৰাৱালপিণ্ডি আৰু ইছলামবাদত ১৪৪ ধাৰা জাৰি কৰিছে চৰকাৰে ।
লগতে পঢ়ক : ‘মোৰ দেউতা জীয়াই আছে নে নাই সেইটো কওক’; নিৰুদ্দেশ হোৱা পিতৃৰ বাবে আৱেগিক পোষ্ট ইমৰাণ খানৰ পুত্ৰৰ
