দীপাৱলীত বিষাক্ত হৈ পৰিল দিল্লীৰ আকাশ-বতাহ
দীপাৱলীৰ পুৱাই ধোঁৱাময় হৈ পৰে ৰাজধানী চহৰ দিল্লী । ৰাষ্ট্ৰীয় ৰাজধানী চহৰখনৰ আকাশ-বতাহ বিষাক্ত হৈ পৰা পৰিলক্ষিত হৈছে । ডাঠ ধোঁৱা আৰু কুঁৱলীৰ আৱৰণে চহৰখনক আৱৰি ধৰিছে, যাৰ ফলত নেদেখা হৈ পৰিছে আকাশ । ধোঁৱাময় চহৰখনত একোকে নেদেখা পৰিৱেশৰ সূচনা হৈছে । বায়ুৰ গুণাগুণ সূচকাংক (AQI) ৩০০ অতিক্ৰম কৰিছে, যিটো অতি বেয়া তথা সংবেদনশীল শ্ৰেণীত পৰে ।
কেন্দ্ৰীয় প্ৰদূষণ নিয়ন্ত্ৰণ ব’ৰ্ডৰ SAMEER এপ অনুসৰি সোমবাৰে পুৱা ৯ বজাত দিল্লীৰ সামগ্ৰিক AQI ৩৩৯ ত ৰেকৰ্ড কৰা হয় । প্ৰায় ৩৮টা নিৰীক্ষণ কেন্দ্ৰৰ তথ্য অনুসৰি বেছিভাগ অঞ্চলৰ বায়ুৰ গুণাগুণ ৩০০ৰ ওপৰত । আনন্দ বিহাৰৰ AQI ৪১৪ আৰু ৱাজিৰপুৰৰ ৪১২, দুয়োটা ‘গুৰুতৰ’ শ্ৰেণীত পৰে । ইফালে, পুছা (৩৭১), অশোক বিহাৰ (৩৯৪) আৰু বাৱানা (৩৬৯)ৰ ‘অতি বেয়া’ মাত্ৰা লাভ কৰিছে ।
আনহাতে দিল্লীৰ কিছুমান অঞ্চল যেনে শ্ৰী অৰবিন্দ মাৰ্গ (১৬৫) আৰু ডিটিইউ (১৯৮)ৰ বায়ুৰ গুণাগুণ বাকী অঞ্চলতকৈ কিছু উন্নত আছিল যদিও ইয়াকো স্বাস্থ্যকৰ বুলি ক’ব পৰা নাযায় ।
দ্বিতীয় পৰ্যায়ৰ GRAP কাৰ্যকৰী-
বায়ুৰ গুণাগুণ ব্যৱস্থাপনা আয়োগে দিল্লী-এনচিআৰত দ্বিতীয় পৰ্যায়ৰ গ্ৰেডেড ৰেচপন্স একচন প্লেন (GRAP) ৰূপায়ণ কৰিছে । প্ৰদূষণৰ মাত্ৰা বৃদ্ধি আৰু ভাৰত বতৰ বিজ্ঞান বিভাগ আৰু আই আই টি এমৰ পূৰ্বাভাসৰ পিছত এই সিদ্ধান্ত লোৱা হৈছে, যিয়ে অনাগত দিনত পৰিস্থিতি অধিক বেয়া হোৱাৰ সতৰ্কবাণী দিছে ।
বতৰ বিভাগৰ আগজাননী-
আই এম ডিৰ তথ্য অনুসৰি সোমবাৰে পুৱা দিল্লীৰ সৰ্বনিম্ন তাপমাত্ৰা ২০.২ ডিগ্ৰী চেলছিয়াছ । দিনটোৰ শেষলৈ আকাশ পৰিষ্কাৰ হোৱাৰ সম্ভাৱনা আছে আৰু সৰ্বোচ্চ তাপমাত্ৰা প্ৰায় ৩৩ ডিগ্ৰী চেলছিয়াছ হোৱাৰ সম্ভাৱনা আছে ।
সেউজ ফটকা সন্দৰ্ভত উচ্চতম ন্যায়ালয়ৰ নিৰ্দেশনা-
যোৱা বুধবাৰে উচ্চতম ন্যায়ালয়ে কিছুমান চৰ্ত সাপেক্ষে দিল্লী-এনচিআৰত সেউজীয়া ফটকা বিক্ৰী আৰু ফুটোৱাত অনুমতি দিছিল । নিৰ্ধাৰিত সময় অনুসৰি দীপাৱলীৰ এদিন পূৰ্বে আৰু উৎসৱৰ দিনটোত পুৱা ৬ বজাৰ পৰা সন্ধিয়া ৭ বজালৈ তাৰ পিছত নিশা ৮ বজাৰ পৰা ১০ বজালৈ ফটকা ফুটাব পাৰিব ।
লগতে পঢ়ক : দীপাৱলীৰ পূৰ্বেই বিষাক্ত দিল্লীৰ জলবায়ু; একিউআইয়ে অতিক্ৰম কৰিলে ৩০০
