চন্দ্ৰযান ২ৰ বৃহৎ সফলতা
ভাৰতৰ অভিলাষী লুনাৰ মিশ্যন চন্দ্ৰযান ২ য়ে পুনৰবাৰ নতুন তথ্য সংগ্ৰহ কৰিছে । ই চন্দ্ৰৰ ওপৰত সূৰ্যৰ প্ৰভাৱ ধৰা পেলাইছে । ১৮ অক্টোবৰ, শনিবাৰে ইছৰোৱে এই তথ্য শ্বেয়াৰ কৰিছে । মহাকাশ সংস্থাটোৱে কয় যে এই পৰ্যবেক্ষণসমূহে চন্দ্ৰৰ বহিঃমণ্ডল, ইয়াৰ অতি পাতল বায়ুমণ্ডল আৰু ইয়াৰ পৃষ্ঠত মহাকাশৰ বতৰৰ প্ৰভাৱ বুজিবলৈ সহায় কৰিব ।
ইছৰোৱে প্ৰকাশ কৰা অনুসৰি ভাৰতৰ অভিলাষী অভিযান চন্দ্ৰযান ২ৰ লুনাৰ অৰ্বিটাৰে মহাকাশ বিজ্ঞানৰ এক বৃহৎ, প্ৰথমবাৰৰ দেখা পৰিঘটনা ৰেকৰ্ড কৰিছে । চন্দ্ৰযান-২ত থকা CHASE-2 বৈজ্ঞানিক যন্ত্ৰটোৱে চন্দ্ৰৰ অতি পাতল বায়ুমণ্ডলত সূৰ্যৰ পৰা ক’ৰ’নেল মাছ ইজেকচন (CME)ৰ প্ৰভাৱ প্ৰত্যক্ষভাৱে পৰ্যবেক্ষণ কৰিছে ।
চন্দ্ৰযান-২ৰ পৰ্যবেক্ষণত প্ৰকাশ পাইছে যে যেতিয়া এই বৃহৎ সৌৰ ধুমুহাই চন্দ্ৰত আঘাত কৰে তেতিয়া চন্দ্ৰৰ দিনত বহিঃমণ্ডলত মুঠ চাপ হঠাতে বাঢ়ি যায় । ইছৰোৰ মতে, CHESS-2 য়ে লিপিবদ্ধ কৰিছে যে বায়ুমণ্ডলত থকা পৰমাণু আৰু অণুৰ ঘনত্ব দহগুণতকৈও অধিক বৃদ্ধি পাইছে । চন্দ্ৰযান-২ হৈছে প্ৰকৃততে এই ঘটাটো পৰ্যবেক্ষণ কৰা প্ৰথমটো অভিযান ।
এই পৰিঘটনা ২০২৪ চনৰ ১০ মে’ত সংঘটিত হৈছিল, যেতিয়া সূৰ্যই মহাকাশলৈ ধাৰাবাহিকভাৱে চি এম ই নিৰ্গত কৰিছিল । যিহেতু চন্দ্ৰত সুৰক্ষামূলক চুম্বকীয় ক্ষেত্ৰ বা পৃথিৱীৰ দৰে ঘন বায়ুমণ্ডলৰ অভাৱ, সেয়েহে চি এম ইৰ পৰা অহা আধানযুক্ত কণাবোৰে চন্দ্ৰৰ পৃষ্ঠৰ সৈতে পোনপটীয়াকৈ সংঘৰ্ষ কৰিছিল । এই কণিকাৰ প্ৰভাৱৰ ফলত চন্দ্ৰৰ পৃষ্ঠৰ পৰা বৃহৎ সংখ্যক পৰমাণু আৰু অণু বহিঃমণ্ডললৈ নিৰ্গত হৈছিল, যাৰ ফলত বায়ুমণ্ডল হঠাতে বিস্তাৰিত হৈছিল ।
লগতে পঢ়ক : ২০৩০ চনৰ ভিতৰত আন্তঃৰাষ্ট্ৰীয় মহাকাশ কেন্দ্ৰক বিদায় জনাব বিশ্বই; জানক কিয় ?
