ভাৰত আৰু পাকিস্তানৰ মাজত উত্তেজনাই চৰম পৰ্যায় পাইছেগৈ । ভাৰতীয় সেনাই পাকিস্তানৰ ওপৰত বিমান আক্ৰমণ চলাই ‘অপাৰেচন সিন্দুৰ’ আৰম্ভ কৰাৰ পিছত পাকিস্তানে প্ৰতিশোধ লোৱাৰ কথা অহৰহ কৈ আছে । ইফালে শিয়ালকোট, লাহোৰ আৰু পাকিস্তানৰ আন এখন চহৰত পাকিস্তানী সেনাৰ এয়াৰ ডিফেন্স ইউনিটৰ যথেষ্ট লোকচান হোৱাৰ খবৰ প্ৰকাশ পাইছে ।
জানিব পৰা মতে পাকিস্তানী সেনাৰ HQ-9 মিছাইল ডিফেন্স চিষ্টেম ইউনিটসমূহ ড্ৰ’ন আক্ৰমণত যথেষ্ট লোকচানৰ সন্মুখীন হৈছে । লাহোৰৰ উপৰিও গুজৰাণৱালা, ৰাৱালপিণ্ডি, চাকৱাল, বাহাৱালপুৰ, মিয়ানৱালী, কৰাচী, চোৰ, মিয়ানো আৰু অটকত এনেধৰণৰ ড্ৰোন আক্ৰমণ সংঘটিত হৈছে ।
ভাৰত চৰকাৰৰ বিবৃতি-
ভাৰত চৰকাৰে আনুষ্ঠানিক বিবৃতি জাৰি কৰি কয় যে, “আজি পুৱা ভাৰতীয় সশস্ত্ৰ বাহিনীয়ে পাকিস্তানৰ কেইবাটাও স্থানত এয়াৰ ডিফেন্স ৰাডাৰ আৰু চিষ্টেমক লক্ষ্য কৰি লয় । ভাৰতে পাকিস্তানক তেওঁলোকৰ ধৰণেই প্ৰত্যুত্তৰ দিছে । লাহোৰৰ এটা এয়াৰ ডিফেন্স চিষ্টেম ধ্বংস হৈছে ।”
১৫খন চহৰৰ ওপৰত পাকিস্তানৰ পৰিকল্পনা বিফল কৰিলে ভাৰতে-
বিবৃতিটোত আৰু কোৱা হৈছে যে ০৭ আৰু ০৮ মে’ৰ মাজ নিশা পাকিস্তানে ড্ৰ’ন আৰু মিছাইল ব্যৱহাৰ কৰি অৱন্তিপুৰা, শ্ৰীনগৰ, জম্মু, পাঠানকোট, অমৃতসৰ, কাপুৰথালা, জলন্ধৰ, লুধিয়ানা, আদমপুৰ, বথিন্দা, চণ্ডীগড়, নল, ফালোডী, উত্তৰলাই আৰু ভোজকে ধৰি উত্তৰ আৰু পশ্চিম ভাৰতৰ কেইবাটাও সামৰিক প্ৰতিষ্ঠানত আক্ৰমণৰ চেষ্টা চলাইছিল । এই আক্ৰমণসমূহ কাউণ্টাৰ ইউ এ এছ গ্ৰীড আৰু এয়াৰ ডিফেন্স চিষ্টেমৰ দ্বাৰা নিষ্ক্ৰিয় কৰা হয় । এই আক্ৰমণৰ ধ্বংসাৱশেষ এতিয়া বহু ঠাইৰ পৰা উদ্ধাৰ কৰা হৈছে, যিটোৱে পাকিস্তানৰ আক্ৰমণৰ প্ৰমাণ দিয়ে ।
ভাৰতীয় সেনাই দিলে উপযুক্ত প্ৰত্যুত্তৰ-
প্ৰেছ বিজ্ঞপ্তিটোত কোৱা হৈছে যে, “আজি ৮ মে’ৰ পুৱা ভাৰতীয় সশস্ত্ৰ বাহিনীয়ে কেইবাঠাইতো পাকিস্তানৰ বায়ু প্ৰতিৰক্ষা ৰাডাৰ আৰু ব্যৱস্থাক লক্ষ্য কৰি লয় । ভাৰতেও পাকিস্তানৰ দৰেই তীব্ৰতাৰে প্ৰতিক্ৰিয়া প্ৰকাশ কৰিছে । নিৰ্ভৰযোগ্যভাৱে জানিব পৰা গৈছে যে লাহোৰৰ এটা বায়ু প্ৰতিৰক্ষা ব্যৱস্থা নিষ্ক্ৰিয় হৈছে ।”
ইয়াত আৰু কোৱা হৈছে যে জম্মু-কাশ্মীৰৰ কুপৱাৰা, বাৰামুল্লা, উৰি, পুঞ্চ, মেন্ধাৰ আৰু ৰাজৌৰী খণ্ডত পাকিস্তানে মৰ্টাৰ আৰু গধুৰ কেলিবাৰ আৰ্টিলাৰী ব্যৱহাৰ কৰি এল অ’ চিৰ ওপৰেৰে অপ্ৰৰোচিত গুলীচালনাৰ তীব্ৰতা বৃদ্ধি কৰিছে ।
উল্লেখ্য যে, পাকিস্তানে ভাৰতৰ আধুনিক আকাশযুদ্ধৰ সা-সঁজুলিক লৈ চিন্তিত হোৱাৰ বাবেই বায়ু প্ৰতিৰক্ষা ব্যৱস্থা গ্ৰহণ কৰিছিল । ভাৰতৰ ৰাফেল যুদ্ধ বিমান, ছুখয় ছু-৩০এম কে আই আৰু ব্ৰাক্ষ্মছ ছুপাৰছনিক ক্ৰুজ মিছাইলৰ দৰে অস্ত্ৰ-শস্ত্ৰ পাকিস্তানৰ বাবে এক ডাঙৰ প্ৰত্যাহ্বান । ইয়াৰ পৰিপ্ৰেক্ষিতত পাকিস্তানে এইচ কিউ-৯ৰ দৰে ব্যৱস্থাৰ ওপৰত আস্থা প্ৰকাশ কৰে, যিটো ব্যৱস্থা এতিয়া ভাৰতীয় আক্ৰমণত ধ্বংস হৈছে ।
