অপাৰেচন সিন্দুৰৰ অন্ত পৰাৰ পিছত উদ্ভৱ হোৱা পৰিস্থিতি সন্দৰ্ভত কেন্দ্ৰীয় চৰকাৰে আহ্বান কৰা সৰ্বদলীয় বৈঠক সমাপ্ত হৈছে । বৈঠকৰ অন্তত কংগ্ৰেছৰ সভাপতি মল্লিকাৰ্জুন খাৰ্গে কয় যে এই সংকটৰ সময়ত আমি চৰকাৰৰ লগত আছো । খাৰ্গেই কয় যে কিছু কথাৰ বিষয়ে গোপনীয়তাৰ উদ্ধৃতি দি আমাক তথ্য দিয়া হোৱা নাছিল । ৰাহুল গান্ধীয়ে কয় যে আমি চৰকাৰক সম্পূৰ্ণ সমৰ্থন দিছো । প্ৰতিৰক্ষা মন্ত্ৰী ৰাজনাথ সিঙৰ অধ্যক্ষতাত অনুষ্ঠিত হয় এই বৈঠক ।
এই বৈঠকত গৃহমন্ত্ৰী অমিত শ্বাহ আৰু সংসদীয় পৰিক্ৰমা মন্ত্ৰী কিৰেন ৰিজিজুও উপস্থিত থাকে । লগতে উপস্থিত থাকে বৈদেশিক মন্ত্ৰী এছ জয়শংকৰ । ইয়াৰ উপৰিও কংগ্ৰেছৰ হৈ ৰাহুল গান্ধী আৰু কংগ্ৰেছৰ ৰাষ্ট্ৰীয় অধ্যক্ষ মল্লিকাৰ্জুন খাৰ্গেও সভাত অংশগ্ৰহণ কৰে । বৈঠকত চৰকাৰে বিৰোধী নেতাসকলক অপাৰেচন সিন্দুৰৰ পিছত প্ৰতিশোধমূলক ব্যৱস্থা আৰু ভৱিষ্যতৰ প্ৰস্তুতিৰ বিষয়ে তথ্য প্ৰদান কৰে ।
কংগ্ৰেছে বাতিল কৰিলে নিৰ্ধাৰিত সকলো কাৰ্যসূচী-
কংগ্ৰেছে সন্ত্ৰাসবাদৰ বিৰুদ্ধে চৰকাৰক সম্পূৰ্ণ সমৰ্থন আৰু সেনাবাহিনীৰ সৈতে সংহতি প্ৰদৰ্শন কৰি ‘সংবিধান সমাৱেশ বচাওক’কে ধৰি দলৰ সকলো নিৰ্ধাৰিত কাৰ্যসূচী বন্ধ কৰি দিছে । এই উত্তেজিত পৰিবেশত তিনিখন দেশ ভ্ৰমণ বাতিল কৰিছে প্ৰধানমন্ত্ৰী মোদীয়ে । ১৩ মে’ৰ পৰা ১৭ মে’লৈ প্ৰধানমন্ত্ৰী মোদীয়ে নৰৱে, ক্ৰ’ৱেচিয়া আৰু নেদাৰলেণ্ড ভ্ৰমণৰ কথা আছিল ।
