চেম্পিয়নছ ট্ৰফী ২০২৫ সন্দৰ্ভত লাহে লাহে সমগ্ৰ বিষয়বোৰ স্পষ্ট হৈ পৰিছে । ইয়াৰ পূৰ্বে আই চি চিয়ে আনুষ্ঠানিকভাৱে স্পষ্ট কৰি দিছিল যে প্ৰতিযোগিতাখনত ভাৰতৰ মেচসমূহ নিৰপেক্ষ স্থানত অনুষ্ঠিত হ’ব । আয়োজক পাকিস্তান ক্ৰিকেট ব’ৰ্ডক আই চি চিয়ে নিৰপেক্ষ স্থান বাছি ল’ব পাৰে বুলি জনাইছিল । এতিয়া পি চি বিয়ে স্পষ্ট কৰি দিছে যে চেম্পিয়নছ ট্ৰফীত ডুবাই হ’ব ভাৰতৰ নিৰপেক্ষ স্থান ।
পি চি বিৰ অধ্যক্ষ মহছিন নাকভিয়ে ২১ ডিচেম্বৰত পাকিস্তানত এমিৰেটছ ক্ৰিকেট ব’ৰ্ডৰ মুৰব্বী শ্বেইখ নাহিয়ান বিন মুবাৰক আল নাহিয়ানৰ সৈতে আই চি চি চেম্পিয়নছ ট্ৰফীৰ সূচী সন্দৰ্ভত বৈঠকত মিলিত হয় আৰু তেওঁলোকে একমতত উপনীত হোৱা বুলি বাতৰি প্ৰকাশ পাইছে ।
পি চি বিৰ মুখপাত্ৰ আমিৰ মিৰে এক বিবৃতিত কয় যে পাকিস্তানত দেওবাৰে পি চি বিৰ মুৰব্বী মহছিন নাকভি আৰু এমিৰেটছ ক্ৰিকেট ব’ৰ্ডৰ অধ্যক্ষ শ্বেখ মুবাৰক আল নাহিয়ানৰ মাজত হোৱা বৈঠকৰ পিছত আমি আই চি চিক জনাইছো যে ডুবাই নিৰপেক্ষ স্থান হ’ব ।
উল্লেখ্য যে ভাৰতৰ গ্ৰুপ ষ্টেজৰ তিনিওখন মেচ ডুবাইত অনুষ্ঠিত হ’ব । যদি টিম ইণ্ডিয়াই চেম্পিয়নছ ট্ৰফীৰ ছেমি ফাইনেল আৰু ফাইনেলত প্ৰৱেশ কৰে তেন্তে সেই মেচবোৰো ডুবাইত অনুষ্ঠিত হ’ব । ইফালে চেম্পিয়নছ ট্ৰফীৰ সূচী এতিয়াও আই চি চিয়ে প্ৰকাশ কৰা নাই ।
কিয় লোৱা হ’ল নিৰপেক্ষ স্থানৰ সিদ্ধান্ত ?
বি চি চি আইয়ে স্পষ্টভাৱে অস্বীকাৰ কৰিছিল যে টিম ইণ্ডিয়াই চেম্পিয়নছ ট্ৰফীৰ বাবে পাকিস্তান ভ্ৰমণ নকৰে । তেতিয়াৰ পৰাই নিৰপেক্ষ স্থান সন্দৰ্ভত আলোচনা তীব্ৰতৰ হৈ পৰিছিল আৰু তাৰ পিছত অৱশেষত আই চি চিয়ে সিদ্ধান্ত লয় যে মেন ইন ব্লু দলে প্ৰতিযোগিতাখনত নিজৰ মেচসমূহ নিৰপেক্ষ স্থানত খেলিব । এইবাৰ পাকিস্তানে আয়োজন কৰিছে চেম্পিয়নছ ট্ৰফী ।
