শীঘ্ৰেই বিবাহপাশত আৱদ্ধ হ’ব দুবাৰৰ অলিম্পিক পদক বিজয়ী বেডমিণ্টন খেলুৱৈ পি ভি সিন্ধু । এই কথা নিশ্চিত কৰিছে তেওঁৰ পিতৃ পি ভি ৰমানে । সংবাদ সংস্থাক তেওঁৰ পিতৃয়ে এই সিদ্ধান্ত মাত্ৰ এমাহ পূৰ্বে লোৱা হৈছে বুলি অৱগত কৰে । উল্লেখ্য যে অহা ২২ ডিচেম্বৰত উদয়পুৰত ভেংকট দত্ত ছাইৰ সৈতে সিন্ধুৱে নতুন জীৱন আৰম্ভ কৰিব । সিন্ধুৰ হ’বলগীয়া স্বামী হায়দৰাবাদৰ । তেওঁ প’চিডেক্স টেকন’লজিৰ কাৰ্যবাহী সঞ্চালক ।
সিন্ধুৰ পিতৃ পি ভি ৰমানাই কয়- দুয়োটা পৰিয়াল চিনাকি আছিল যদিও সকলো ঠিক এমাহ আগতহে হৈছে । এইটোৱেই আছিল একমাত্ৰ সম্ভৱপৰ সময় কাৰণ জানুৱাৰীৰ পৰা তেওঁৰ (সিন্ধুৰ) সূচীত বহুত ব্যস্ততা আহিব ।
তৃতীয়বাৰৰ বাবে জয় কৰিলে চৈয়দ মোদী আন্তঃৰাষ্ট্ৰীয় বেডমিণ্টনৰ খিতাপ-
দেওবাৰে চৈয়দ মোদী আন্তঃৰাষ্ট্ৰীয় বেডমিণ্টনৰ ফাইনেলত চীনৰ ৱু লুও ইউক পৰাস্ত কৰি মহিলা একক শাখাৰ খিতাপ দখল কৰে ২৯ বছৰীয়া খেলুৱৈগৰাকীয়ে । লক্ষ্ণৌত খেলা চূড়ান্ত খেলখনত চীনৰ ৱু লুও ইউ ইউক ২১-১৪ ২১-১৬ ব্যৱধানত পৰাস্ত কৰি তৃতীয়বাৰৰ বাবে এই প্ৰতিযোগিতাৰ ট্ৰফী লাভ কৰে প্ৰাক্তন বিশ্ব চেম্পিয়নগৰাকীয়ে । ইয়াৰ পূৰ্বে ২০১৭ আৰু ২০২২ চনতো ট্ৰফী লাভ কৰিছিল সিদ্ধুৱে । দুবছৰ চাৰি মাহৰ ব্যৱধানৰ অন্তত পুনৰ প’ডিয়ামৰ শীৰ্ষ স্থান দখল কৰিবলৈ সক্ষম হয় সিন্ধু । ২০২২ চনৰ জুলাই মাহত ছিংগাপুৰ অ’পেনত শেষবাৰৰ বাবে খিতাপ দখল কৰিছিল তেওঁ । এইবাৰ মে’ মাহত মালয়েছিয়া মাষ্টাৰছ ছুপাৰ ৫০০ৰ ফাইনেলতো প্ৰৱেশ কৰে তেওঁ ।
