লছ এঞ্জেলছত ৬৮ সংখ্যক গ্ৰেমী বঁটা ২০২৬ৰ আৰম্ভণি হয়। প্ৰথমবাৰৰ বাবে এই অনুষ্ঠানত দালাই লামাই গ্ৰেমী বঁটা লাভ কৰিছে ।
দেওবাৰে অনুষ্ঠিত হোৱা ৬৮ সংখ্যক বাৰ্ষিক গ্ৰেমী বঁটাৰ পৰিৱেশ আৰম্ভণিৰে পৰাই উত্তেজনা আৰু উৎসাহেৰে ভৰি পৰিছিল।সংগীতৰ এই বৃহৎ নিশাটোত উদ্যোগটোৰ বহু কিংবদন্তি উপস্থিত আছিল।
লেডী গাগা, জাষ্টিন বিবাৰৰ পৰা আৰম্ভ কৰি ফেৰেল উইলিয়ামছলৈকে সকলোৱে গ্ৰেমী বঁটাত অনুষ্ঠান পৰিৱেশন কৰিছিল।
গ্ৰেমী বঁটা মূলত এক সন্মানীয় সংগীত বঁটা,কিন্তু এইবাৰৰ অনুষ্ঠানটো বহু কাৰণত অতি বিশেষ আৰু এক বিশ্বব্যাপী অনুষ্ঠান হৈ পৰিছে।
এইবাৰ তিব্বতী বৌদ্ধ ধৰ্মৰ আধ্যাত্মিক নেতা দালাই লামাই অডিঅ’বুক, নেৰেচন আৰু ষ্ট’ৰীটেলিং ৰেকৰ্ডিং শাখাত তেওঁৰ প্ৰথমটো গ্ৰেমী বঁটা লাভ কৰি ইতিহাস ৰচনা কৰে।
এই শিতানত তেওঁ আনকি আমেৰিকাৰ উচ্চতম ন্যায়ালয়ৰ ন্যায়াধীশ কেতঞ্জী ব্ৰাউন জেকচনকো পিছ পেলাই।তেওঁৰ এলবাম ‘মেডিটেচন: দ্য ৰিফ্লেকচনছ অৱ হিজ হলিনেছ দ্য দালাই লামা’ৰ বাবে তেওঁ এই সন্মান লাভ কৰে।
গ্ৰেমী বঁটা লাভ কৰাৰ পিছত দালাই লামাই ইনষ্টাগ্ৰাম পোষ্টৰ জৰিয়তে সকলোকে কৃতজ্ঞতা প্ৰকাশ কৰে।দালাই লামাক তিব্বতী বৌদ্ধ ধৰ্মৰ সৰ্বোচ্চ আধ্যাত্মিক নেতা হিচাপে গণ্য কৰা হয়।
সামাজিক মাধ্যমত তেওঁ লিখিছে যে, এই সন্মান মই কৃতজ্ঞতা আৰু নম্ৰতাৰে গ্ৰহণ কৰিছো।এই বঁটাটোক মই ব্যক্তিগত বুলি নাভাবো, বৰঞ্চ আমাৰ সকলোৰে ফালৰ পৰা সাৰ্বজনীন দায়বদ্ধতাৰ স্বীকৃতিহে বুলি গণ্য কৰোঁ।
মই বিশ্বাস কৰো যে শান্তি, মমতা, পৰিৱেশ সুৰক্ষা, আৰু মানৱতাৰ ঐক্য আমাৰ সকলো ৮ বিলিয়ন লোকৰ মংগলৰ বাবে অতি প্ৰয়োজনীয়। মই আশাকৰোঁ এই গ্ৰেমী সন্মানে আমাৰ বাৰ্তা অধিক লোকৰ মাজলৈ বিয়পোৱাত সহায় কৰিব।
লগতে পঢ়ক: পৰিচালক ৰোহিত শ্বেট্টীৰ বাসগৃহলৈ দুৰ্বৃত্তৰ গুলীচালনা…
