ভাৰতীয় ক্ৰিকেটৰ উদিত সুৰুজ বৈভৱ সূৰ্যবংশীয়ে চলিত বিজয় হাজাৰে ট্ৰফীত বিস্ফোৰক প্ৰদৰ্শন আগবঢ়োৱাৰ লগতে গঢ়িছে এক অনন্য অভিলেখ । মাত্ৰ ১৪ বছৰীয়া এইগৰাকী ক্ৰিকেট প্ৰতিভা এতিয়া কেৱল ভাৰততে নহয় সমগ্ৰ বিশ্বতে চৰ্চাৰ কেন্দ্ৰবিন্দু হৈ পৰিছে ।
চলিত বিজয় হাজাৰে ট্ৰফীৰ এখন মেচত উদীয়মান ক্ৰিকেট প্ৰতিভা বৈভৱ সূৰ্যবংশীয়ে অৰ্জন কৰিলে আন এক কৃতিত্ব । এই মেচত তেওঁ ৰানৰ ধুমুহা নমাই গঢ়ে এক চিৰস্মৰণীয় অভিলেখ । ১৯ বছৰ অনুৰ্ধ এছিয়া কাপৰ ফাইনেলত পাকিস্তানৰ হাতত পৰাজয় পাহৰি ১৪ বছৰীয়া বৈভৱ সূৰ্যবংশীয়ে বিজয় হাজাৰে ট্ৰফীত বিস্ফোৰক অভিষেক ঘটায় । অৰুণাচল প্ৰদেশৰ বিৰুদ্ধে মাত্ৰ ৩৬টা বলত শতক অৰ্জন কৰি সকলোকে আচৰিত কৰি তোলে ১৪ বছৰীয়া এইগৰাকী ক্ৰিকেটাৰে । তেওঁৰ ইনিংছ ছয় আৰু চাৰিৰে ভৰি আছিল । আটাইতকৈ গুৰুত্বপূৰ্ণ কথাটো হ’ল, অৰুণাচল প্ৰদেশৰ বিৰুদ্ধে অনুষ্ঠিত হোৱা এই মেচখন মহেন্দ্ৰ সিং ধোনীৰ ঘৰুৱা খেলপথাৰত হৈছিল য’ত নিজৰ বিস্ফোৰক ইনিংছ প্ৰদৰ্শন কৰে বৈভৱে ।
৩৬ বলত বিস্ফোৰক শতক-
বিহাৰৰ হৈ বিজয় হাজাৰে ট্ৰফী ২০২৫-২৬ৰ প্ৰথমখন মেচত অ’পেনিং কৰি বৈভৱ সূৰ্য্যবংশীয়ে অৰুণাচল প্ৰদেশৰ বলাৰক নিৰ্দয় প্ৰহাৰ কৰি দিশহাৰা কৰি পেলাই । মাত্ৰ ৩৬টা বলত ১০টা চাৰি আৰু ৮টা ছয়ৰ সহায়ত তেওঁ শতক অৰ্জন কৰে । অৱশ্যে সেয়া তেওঁৰ শতকৰ আৰম্ভণিহে আছিল, তাৰ পিছতো দুৰন্ত গতিত চলি থাকে বৈভৱৰ ইনিংছ । উল্লেখ্য যে, বিজয় হাজাৰে ট্ৰফীত এয়া বৈভৱ সূৰ্যবংশীৰ প্ৰথমটো শতক ।
বিজয় হাজাৰে ট্ৰফীত বৈভৱ সূৰ্যবংশীৰ অভিলেখ-
বৈভৱ সূৰ্যবংশীয়ে যোৱা বছৰ এই ট্ৰফীত অভিষেক ঘটাইছিল । ১৩ বছৰ বয়সত তেওঁ প্ৰতিযোগিতাখনত খেলা আটাইতকৈ কম বয়সীয়া খেলুৱৈ হিচাপে পৰিগণিত হয় । যোৱা ছিজনত নিজৰ বয়সৰ সৈতে ইতিহাস ৰচনা কৰা বৈভৱে এইবাৰ বেটিঙেৰে ইতিহাস সৃষ্টি কৰে । তেওঁ এতিয়া বিজয় হাজাৰে ট্ৰফীত শতক অৰ্জন কৰা আটাইতকৈ কম বয়সীয়া বেটছমেন হিচাপে পৰিগণিত হৈছে ।
বিজয় হাজাৰে ট্ৰফীত বৈভৱৰ সৰ্বোচ্চ স্ক’ৰ-
এইখন বৈভৱ সূৰ্যবংশীৰ বিজয় হাজাৰে ট্ৰফীত সপ্তমখন খেল । ইয়াৰ পূৰ্বে তেওঁ প্ৰতিযোগিতাখনৰ পূৰ্বৰ ছিজনত ৬খন মেচ খেলিছিল । সেই ৬খন মেচত তেওঁ মাত্ৰ ১৩২ ৰানহে সংগ্ৰহ কৰিছিল, য’ত তেওঁৰ সৰ্বোচ্চ স্ক’ৰ আছিল ৭১ । অৱশ্যে এইবাৰ ইতিমধ্যে তেওঁ প্ৰথমখন মেচত পূৰ্বৰ ৬ খন মেচতকৈ অধিক ৰান সংগ্ৰহ কৰিছে ।
ডি ভিলিয়াৰ্ছক অতিক্ৰম-
ইয়াৰ লগে লগে পুৰুষৰ এ তালিকাভুক্ত ক্ৰিকেটত ইতিহাস ৰচনা কৰিছে বৈভৱ সূৰ্য্যবংশীয়ে । এই মেচত মাত্ৰ ৫৯টা বলত তেওঁ ১৫০ ৰান সংগ্ৰহ কৰে, যিটো এতিয়ালৈকে দ্ৰুততম ১৫০ ৰান । এই অভিলেখেৰে তেওঁ এ বি ডি ভিলিয়াৰ্ছ (৬৪ বল, ২০১৫ চনত ৱেষ্ট ইণ্ডিজৰ বিৰুদ্ধে) আৰু জোছ বাটলাৰ (৬৫ বল, ২০২২ চনত নেদাৰলেণ্ডৰ বিৰুদ্ধে)ৰ দৰে কিংবদন্তিক অতিক্ৰম কৰে । ইমান কম বয়সতে এ তালিকাভুক্ত ক্ৰিকেটত এই বিশ্ব অভিলেখ গঢ়া বৈভৱ সূৰ্য্যবংশী এতিয়া কেৱল ঘৰুৱা ক্ৰিকেটেই নহয়, বিশ্ব ক্ৰিকেটত আলোচনাৰ কেন্দ্ৰবিন্দু হৈ পৰিছে ।
লগতে পঢ়ক : বিজয় হাজাৰেত ৰোহিত-কোহলীৰ দুৰ্দান্ত শতক… ব্যৰ্থ ঋষভ পন্ট
