তেওঁ কয় যে ইৰাণৰ হাতত থকা সমৃদ্ধ ইউৰেনিয়াম হস্তগত কৰিবলৈ আমেৰিকাক ইৰাণৰ সৈতে কোনো ধৰণৰ বুজাবুজি বা চুক্তিৰ প্ৰয়োজন নাই
আমেৰিকাৰ ৰাষ্ট্ৰপতি ডনাল্ড ট্ৰাম্পে ইৰাণ আৰু লেবাননৰ সাম্প্ৰতিক পৰিস্থিতিক লৈ পুনৰ এবাৰ অত্যন্ত কঠোৰ স্থিতি গ্ৰহণ কৰিছে । মাৰ্কিন ৰাষ্ট্ৰপতিগৰাকীয়ে স্পষ্ট কৰি দিছে যে মধ্য-প্ৰাচ্যৰ এই জটিল পৰিস্থিতিত সামৰিক যুদ্ধই হওক বা কূটনৈতিক কাগজৰ চুক্তিয়েই হওক, যিকোনো পৰিস্থিতিতে কেৱল আমেৰিকাৰে জয় হ’ব ।
ইৰাণৰ সৈতে চলি থকা তীব্ৰ উত্তেজনা আৰু ভৱিষ্যতৰ সম্ভাৱ্য চুক্তিক লৈ সাংবাদিকে কৰা এক প্ৰশ্নৰ উত্তৰত ট্ৰাম্পে কয়, “অনাগত সময়ত এই চুক্তিখন আচলতে কি, সেইয়া সমগ্ৰ বিশ্বই জানিব পাৰিব ।” অৱশ্যে, তেওঁ ইৰাণৰ সৰ্বোচ্চ নেতা মোজতাবা খামেনেইক সাক্ষাৎ কৰাৰ সম্ভাৱনা সম্পূৰ্ণৰূপে নাকচ কৰে । ট্ৰাম্পৰ ভাষ্য অনুসৰি, “যদি কথাটো কেৱল এখন সাধাৰণ চুক্তি কৰাৰ হে হ’লহেঁতেন, তেন্তে আমি হয়তো সাক্ষাৎ কৰিব পাৰিলোহেঁতেন (কিন্তু বৰ্তমান পৰিস্থিতি তেনে নহয়)।”
পৰমাণু কাৰ্যসূচীক লৈ ইৰাণলৈ চৰম হুংকাৰ-
ৰাষ্ট্ৰপতি ট্ৰাম্পে ইৰাণৰ পৰমাণু কাৰ্যসূচীক লৈ তীব্ৰ অসন্তুষ্টি প্ৰকাশ কৰাৰ লগতে এক ডাঙৰ দাবী উথাপন কৰে । তেওঁ কয় যে ইৰাণৰ হাতত থকা সমৃদ্ধ ইউৰেনিয়াম হস্তগত কৰিবলৈ আমেৰিকাক ইৰাণৰ সৈতে কোনো ধৰণৰ বুজাবুজি বা চুক্তিৰ প্ৰয়োজন নাই । তেওঁ পুনৰ সকীয়াই দিয়ে যে ইৰাণক কোনো পৰিস্থিতিতে বা কোনো মূল্যৰ বিনিময়তে পৰমাণু অস্ত্ৰ নিৰ্মাণ কৰিবলৈ অনুমতি দিয়া নহ’ব ।
আমেৰিকান সৈন্যৰ সুৰক্ষা সন্দৰ্ভত ইৰাণক পোনপটীয়া সকীয়নি দি ট্ৰাম্পে কয়, “যদি ইৰাণে কোনো আমেৰিকান সৈন্যৰ ক্ষতি কৰে বা তেওঁলোকক হত্যা কৰে, তেন্তে সেয়া হ’ব সংঘাত আৰু পূৰ্ণাংগ যুদ্ধ পুনৰ আৰম্ভ কৰাৰ এটা ডাঙৰ তথা সবল কাৰণ ।” ইয়াৰোপৰি, তেনে পৰিস্থিতিৰ সৃষ্টি হ’লে বিশ্ব বাণিজ্যৰ বাবে গুৰুত্বপূৰ্ণ জলপথ ‘ষ্ট্ৰেইট অৱ হৰমুজ’ আমেৰিকাই লগে লগে মুকলি কৰি দিব বুলিও তেওঁ হুংকাৰ দিয়ে ।
লেবানন সংকটক লৈ আশাবাদী ট্ৰাম্প-
ইৰাণৰ উপৰিও মধ্য-প্ৰাচ্যৰ আন এক অশান্ত জৰ্জৰ দেশ লেবাননৰ পৰিস্থিতিৰ ওপৰতো ডনাল্ড ট্ৰাম্পে নিজৰ মত ব্যক্ত কৰে । লেবানন আৰু ইজৰাইলৰ মাজত চলি থকা বৰ্তমানৰ তীব্ৰ সামৰিক উত্তেজনাৰ মাজতো ট্ৰাম্পে এক ইতিবাচক আশা প্ৰকাশ কৰে ।
তেওঁ কয়, “মোৰ ধাৰণা তাত এতিয়া কথাবোৰ এক ইতিবাচক দিশত আগবাঢ়িব । লেবাননৰ বাবে ই অত্যন্ত ভাল হ’ব যদিহে তাত অতি শীঘ্ৰে কিছু শান্তি প্ৰতিষ্ঠা কৰিব পৰা যায় ।”
লগতে পঢ়ক : প্ৰধানমন্ত্ৰী মোদীক “ভাল বন্ধু” আখ্যা ট্ৰাম্পৰ : শীঘ্ৰেই হ’ব ভাৰত-আমেৰিকাৰ ঐতিহাসিক বাণিজ্য চুক্তি!
