ফিফা বিশ্বকাপৰ সামৰণি অনুষ্ঠানত কোনে কোনে পৰিৱেশন কৰিব অনুষ্ঠান?
এইবাৰৰ বিশ্বকাপ ফাইনেলৰ আটাইতকৈ ডাঙৰ আকৰ্ষণ খেলপথাৰৰ বাহিৰতো থাকিব
ক্ৰীড়া ইতিহাসৰ আটাইতকৈ বৃহৎ আৰু ৰোমাঞ্চকৰ মহোৎসৱ অৰ্থাৎ ফিফা বিশ্বকাপ ২০২৬-ৰ এতিয়া অন্তিম পৰ্যায় । অহা দেওবাৰে নিউয়ৰ্ক নিউ জাৰ্চি ষ্টেডিয়ামত অনুষ্ঠিত হ’বলগীয়া ফাইনেল খেলখনৰ ঠিক পূৰ্বে বিশ্বই প্ৰত্যক্ষ কৰিব এক ৰঙীন সামৰণি অনুষ্ঠান । এই অনুষ্ঠানটোত কেৱল খেলৰ উন্মাদনাই নহয়, বৰঞ্চ তিনিখন আয়োজক দেশ আৰু ১৬ খন আয়োজক চহৰত খেলা আটাইকেইখন (৪৮ খন) দলৰ স্মৰণীয় যাত্ৰাকো সংগীত আৰু সংস্কৃতিৰ মাধ্যমেৰে উদযাপন কৰা হ’ব । ডিফেণ্ডিং চেম্পিয়ন আৰ্জেণ্টিনা আৰু স্পেইনৰ মাজত হ’বলগীয়া খিতাপ দখলৰ এই ঐতিহাসিক মহাযুঁজখনৰ পূৰ্বে বিশ্ববাসী মন্ত্ৰমুগ্ধ হ’ব তাৰকাৰ মেলাত ।
বিজয়ী দলক ট্ৰফী তুলি দিব আমেৰিকাৰ ৰাষ্ট্ৰপতি ড’নাল্ড ট্ৰাম্পে
এইবাৰৰ বিশ্বকাপ ফাইনেলৰ আটাইতকৈ ডাঙৰ আকৰ্ষণটো খেলপথাৰৰ বাহিৰতো থাকিব । হোৱাইট হাউছে নিশ্চিত কৰা অনুসৰি, আমেৰিকাৰ ৰাষ্ট্ৰপতি ড’নাল্ড ট্ৰাম্প নিজে ষ্টেডিয়ামত উপস্থিত থাকি ফাইনেল খেলখন উপভোগ কৰিব । কেৱল সেয়াই নহয়, ট্ৰাম্পে বিজয়ী দলৰ অধিনায়কৰ হাতত বিশ্বকাপৰ সোণালী ট্ৰফীটো তুলি দিব ।
সমবেত হ’ব বিশ্বৰ তাৰকাসকল
‘বেলিচ ৱাণ্ডাৰ ষ্টুডিঅ”-ৰ সহযোগত আয়োজিত হ’বলগীয়া এই মেগা শ্ব’টোত হলীউডৰ পৰা আৰম্ভ কৰি বিশ্বসংগীতৰ ন-ন তাৰকা সমবেত হ’ব । মূল সামৰণি অনুষ্ঠানৰ মঞ্চ কঁপাবলৈ সাজু হৈছে হলীউডৰ ছুপাৰষ্টাৰ টম ক্ৰুজ, ল’ৰা পাউচিনি, ৰবি উইলিয়ামছ আৰু জনপ্ৰিয় গ্ল’বেল ক্ৰিয়েটৰ আইশ্ব’স্পীড । একে সময়তে, এমি, গ্ৰেমী, অস্কাৰ আৰু টনি বঁটা বিজয়ী কণ্ঠশিল্পী জেনিফাৰ হাডছনে নিজৰ সুৰীয়া কণ্ঠেৰে আমেৰিকাৰ ৰাষ্ট্ৰীয় সংগীত পৰিৱেশন কৰি খেলৰ শুভাৰম্ভ কৰিব ।
ফিফা বিশ্বকাপ ২০২৬-ৰ মুখ্য পৰিচালন বিষয়া হেইমো শ্বিৰ্গীয়ে কৈছিল যে, উদ্বোধনী অনুষ্ঠানৰ আৱেগক আগুৱাই লৈ গৈ সামৰণি অনুষ্ঠানত সংগীত, সংস্কৃতি আৰু ফুটবলৰ জৰিয়তে ফিফা বিশ্বকাপ ২০২৬-ৰ সামৰণি মৰা হ’ব । ইয়াৰ পিছতেই আৰম্ভ হ’ব সেই বহু প্ৰত্যাশিত খেলখন, যিখনে এই ঐতিহাসিক টুৰ্নামেণ্টখনৰ চেম্পিয়নৰ ভাগ্য নিৰ্ণয় কৰিব ।
হাফ-টাইম শ্ব’ত ক’ল্ডপ্লে’, বিটিএছ আৰু শ্বাকীৰাৰ ধুমুহা
ফাইনেল খেলখনৰ হাফ-টাইম শ্ব’টো অধিক আকৰ্ষণীয় কৰিবলৈ বিশেষভাৱে পৰিচালনাৰ দায়িত্ব লৈছে ‘ক’ল্ডপ্লে’-ৰ ক্ৰীছ মাৰ্টিনে । এই শ্ব’ত বিশ্ব কঁপাবলৈ সাজু হৈছে ৫ গৰাকী মেগা-ষ্টাৰ ।
কানাডিয়ান ছুপাৰষ্টাৰ জাষ্টিন বিবাৰে ক’চেলাত ধুমুহা সৃষ্টি কৰাৰ পিছত প্ৰথমবাৰৰ বাবে এই বিশাল মঞ্চত লাইভ পৰিৱেশন কৰিব । লগতে আমেৰিকাৰ কিংবদন্তি কণ্ঠশিল্পী মেডোনাও এই মঞ্চত নামিব ।
ইফালে, কলম্বিয়ান তাৰকা শ্বাকীৰা, যিয়ে উদ্বোধনী অনুষ্ঠানতো প্ৰদৰ্শন কৰিছিল, তেওঁও এই শ্ব’ৰ অংশ হ’ব । ইয়াৰ উপৰিও লছ এঞ্জেলছ ফিলহাৰমনিকৰ সংগীত পৰিচালক গুস্তাভ’ ডুডামেলে এই হাফ-টাইম শ্ব’ৰ কাৰ্যসূচীত ক্লাছিক মাত্ৰা প্ৰদান কৰিব । আটাইতকৈ ডাঙৰ আকৰ্ষণ হিচাপে দক্ষিণ কোৰিয়াৰ অত্যন্ত জনপ্ৰিয় বয়বেণ্ড ‘বিটিএছ’-এও হাফ-টাইম শ্ব’ত নিজৰ অনবদ্য ডান্স আৰু সংগীতেৰে দৰ্শকৰ মন জয় কৰিব ।
লগতে পঢ়ক : বাথটাবৰ সেই কণমানি কেঁচুৱাটো এতিয়া মেছিৰ বাবে ডাঙৰ প্ৰত্যাহ্বান!