সন্ধিয়া সাংসদগৰাকীয়ে বন্ধু-বান্ধৱীৰ সৈতে ফুটবল খেলিবলৈ এখন খেলপথাৰলৈ গৈছিল । তাতেই তেওঁ হঠাতে অসুস্থ হৈ ঢলি পৰে ।
ফুটবল খেলি থাকোঁতে হঠাৎ অসুস্থ হৈ বৃহস্পতিবাৰে সন্ধিয়া ভইচ অৱ দ্য পিপল পাৰ্টিৰ শ্বিলং সাংসদ ৰিকি এ জে ছিংকনৰ মৃত্যু হয় । তেওঁৰ মৃত্যুত মেঘালয়ৰ ৰাজনৈতিক মহলত শোক ছাঁ পৰিছে । জানিব পৰা মতে, বৃহস্পতিবাৰে সন্ধিয়া ছিংকনে বন্ধু-বান্ধৱীৰ সৈতে ফুটবল খেলিবলৈ মাউলাই মাউয়ঙৰ এখন খেলপথাৰলৈ গৈছিল ।
প্ৰকাশিত এক প্ৰতিবেদন অনুসৰি মেচৰ সময়ত তেওঁ খেলপথাৰত ঢলি পৰাৰ ফলত দৰ্শকে তেওঁক জৰুৰীকালীন চিকিৎসাৰ বাবে ওচৰৰ মাউইয়ং কমিউনিটি হেল্থ চেণ্টাৰ (চিএইচচি)লৈ লৈ যায় । অৱশ্যে জানিব পৰা মতে, সেই সময়ত চিকিৎসালয়খনত চিকিৎসকৰ অনুপলব্ধতাৰ বাবে তেওঁক আন কেন্দ্ৰলৈ প্ৰেৰণ কৰা হয় । পিছত তেওঁক উন্নত চিকিৎসাৰ বাবে জয়াউৰ ডাঃ এইচ গৰ্ডন ৰবাৰ্টছ হাস্পতালত ভৰ্তি কৰোৱা হয় যদিও চিকিৎসাধীন অৱস্থাতে তেওঁৰ মৃত্যু হয় ।
মেঘালয়ৰ মুখ্যমন্ত্ৰী কনৰাড কে চাংমাই টুইট কৰি কয় যে, “শ্বিলঙৰ সন্মানীয় সংসদ সদস্য ড° ৰিকি এ জে ছিংকনৰ অকাল মৃত্যুত মই গভীৰভাৱে দুখ প্ৰকাশ কৰিছোঁ । ড° ৰিকি আছিল জনসেৱাৰ প্ৰতি গভীৰ আকৰ্ষণ আৰু জনসাধাৰণৰ প্ৰতি অটল দায়বদ্ধতা থকা এজন নিষ্ঠাৱান আৰু দয়ালু নেতা । তেওঁ আছিল এজন বিশ্বাসী ব্যক্তি আৰু নম্ৰতা, দূৰদৰ্শিতা আৰু সমাজখনক উন্নীত কৰাৰ প্ৰকৃত ইচ্ছাৰে সেৱা আগবঢ়াইছিল । এই কঠিন সময়ত তেওঁৰ পৰিয়াল, বন্ধু-বান্ধৱী আৰু অগণন শুভাকাংক্ষীলৈ মোৰ আন্তৰিক সমবেদনা জ্ঞাপন কৰিলোঁ । তেওঁৰ আত্মাই চিৰশান্তি লাভ কৰক ।”
নিশা প্ৰায় ৮:৪২ বজাত ৰিকি এ জে ছিংকনক মৃত বুলি ঘোষণা কৰা হয় । হঠাতে লাভ কৰা খবৰৰ পিছত সকলো শোকত ভাগি পৰে । তেওঁৰ মৃত্যুৰ খবৰ পোৱাৰ লগে লগে উপ-মুখ্যমন্ত্ৰী প্ৰেষ্টন টাইনছং, ভিপিপিৰ সভাপতি আৰ্ডেণ্ট মিলাৰ বাছাইয়াৱম’ইটৰ লগতে কেইবাজনো বিধায়ক, জ্যেষ্ঠ ৰাজনৈতিক নেতা, দলৰ কৰ্মীয়ে চিকিৎসালয়লৈ গৈ পৰিয়ালটোক শোক প্ৰকাশ আৰু সমবেদনা জ্ঞাপন কৰে । প্ৰথমবাৰৰ বাবে সাংসদ হিচাপে নিৰ্বাচিত হোৱা ছিংকনে ২০২৪ চনৰ লোকসভা নিৰ্বাচনত জয়লাভ কৰি এজন বিশিষ্ট ৰাজনৈতিক ব্যক্তি হিচাপে নিজকে প্ৰতিষ্ঠা কৰিছিল ।
লগতে পঢ়ক : ‘কংগ্ৰেছে ৩০ লাখ বিঘা ভূমি বেদখলকাৰীক এৰি দিছিল’; বিধানসভাত কংগ্ৰেছক সমালোচনা মুখ্যমন্ত্ৰীৰ
