মেক্সিকোৱে গ্ৰহণ কৰা আমদানি শুল্কৰ বিৰুদ্ধে তীব্ৰ আপত্তি দাখিল কৰিছে ভাৰতে । মেক্সিকোৰ এই সিদ্ধান্ত একপক্ষীয় বুলি অভিহিত কৰিছে ভাৰতে ।

মেক্সিকান চৰকাৰে এনে এটা সিদ্ধান্ত গ্ৰহণ কৰিছে যাৰ বিৰুদ্ধে ভাৰতে তীব্ৰ আপত্তি কৰিছে । মেক্সিকোৱে মুক্ত বাণিজ্য চুক্তি নথকা দেশসমূহৰ ওপৰত আমদানি শুল্ক বৃদ্ধি কৰিছে । ভাৰতো এই তালিকাত অন্তৰ্ভুক্ত আছে । নতুন শুল্ক নিয়মৰ অধীনত কিছুমান সামগ্ৰীৰ শুল্ক ৫০ শতাংশ পৰ্যন্ত বৃদ্ধি পাব পাৰে, আনহাতে বেছিভাগ সামগ্ৰীৰ ওপৰত প্ৰায় ৩৫ শতাংশ শুল্ক হোৱাৰ সম্ভাৱনা আছে ।

ভাৰত চৰকাৰে কৈছে যে মেক্সিকোৱে এই সিদ্ধান্ত লোৱাৰ পূৰ্বে নিজৰ অংশীদাৰসকলৰ সৈতে আলোচনা কৰা নাছিল । ইয়াৰ মিত্ৰ দেশসমূহৰ পৰামৰ্শ নোলোৱাকৈ লোৱা সিদ্ধান্তসমূহ অৰ্থনৈতিক সম্পৰ্ক আৰু বিশ্ব বাণিজ্য নিয়মৰ মনোভাৱৰ বিৰুদ্ধে ।

এটা চৰকাৰী সূত্ৰই স্পষ্টভাৱে উল্লেখ কৰিছে যে ভাৰতে বুজি পাইছে যে এই পদক্ষেপ প্ৰত্যক্ষভাৱে ভাৰতক লক্ষ্য কৰি লোৱা হোৱা নাই, কিন্তু তথাপিও আলোচনা অবিহনে এম এফ এন (Most Favored Nation) শুল্ক বৃদ্ধি কৰাটো সঠিক পন্থা নহয় ।

মেক্সিকান চৰকাৰৰ শুল্ক পৰিৱৰ্তনে মুঠ ১৪৬৩টা সামগ্ৰীৰ শিতানত প্ৰভাৱ পেলাব । ভাৰতৰ উপৰিও চীন, দক্ষিণ কোৰিয়া, থাইলেণ্ড, ইণ্ডোনেছিয়া আদি এছিয়াৰ দেশসমূহ এই শুল্কৰ দ্বাৰা প্ৰভাৱিত হ’ব ।

মেক্সিকান চৰকাৰে কয় যে ঘৰুৱা ব্যৱসায়ক প্ৰসাৰিত কৰাৰ লগতে বাণিজ্যিক ঘাটি হ্ৰাস কৰাৰ বাবে শুল্ক নিয়ম সলনি কৰিছে ।

মেক্সিকোৱে স্থানীয় উৎপাদনক সমৰ্থন কৰা আৰু বাণিজ্যিক ঘাটি হ্ৰাস কৰাটো এই পদক্ষেপৰ প্ৰধান কাৰণ হিচাপে উল্লেখ কৰিলেও আমেৰিকাৰ হেঁচা আৰু চীনৰ সামগ্ৰীৰ অৱৰোধৰ বাবে মেক্সিকোৱে নিজৰ শুল্ক নীতি কঠোৰ কৰা বুলিও ধাৰণা কৰা হৈছে ।

মেক্সিকান চৰকাৰৰ এই সিদ্ধান্তত গভীৰভাৱে বিচলিত হৈ পৰিছে ভাৰত । এই বিষয়ত মেক্সিকোৰ উপ-অৰ্থনৈতিক মন্ত্ৰী লুইছ ৰ’জেণ্ডোৰ সৈতে বাণিজ্য সচিব ৰাজেশ আগৰৱালে উচ্চ পৰ্যায়ৰ আলোচনাত মিলিত হৈছে ।

আগন্তুক সময়ত আৰু অধিক কাৰিকৰী পৰ্যায়ৰ বৈঠক হোৱাৰ সম্ভাৱনা আছে । ইয়াৰ পূৰ্বে ৩০ ছেপ্টেম্বৰত মেক্সিকোত থকা ভাৰতীয় দূতাবাসে এই বিষয়ত উদ্বেগ প্ৰকাশ কৰি ভাৰতৰ বাবে সকাহ বিচাৰিছিল ।

ভাৰতৰ মতে দুয়োখন দেশৰ মাজত সুদৃঢ় বাণিজ্যিক আৰু অৰ্থনৈতিক সম্পৰ্ক বজাই ৰখাটো অতি প্ৰয়োজনীয় । ভাৰতে স্পষ্টকৈ কৈছে যে ভাৰতে ৰপ্তানিকাৰকৰ স্বাৰ্থ সুৰক্ষিত কৰিব আৰু তাৰ বাবে প্ৰয়োজনীয় সকলো ব্যৱস্থা গ্ৰহণ কৰিব, কিন্তু দুয়োপক্ষৰ বাবে সুষম বাণিজ্যিক পৰিৱেশ সুনিশ্চিত কৰিবলৈ আলোচনাৰ জৰিয়তে সমাধান বিচাৰিব ।

লগতে পঢ়ক : আমেৰিকাৰ পাছত এতিয়া এইখন দেশৰ শুল্ক আক্ৰমণ, ভাৰতকে ধৰি বহু দেশৰ ওপৰত ৫০% শুল্ক !