উইম্বলডনত দেখা গ’ল ভাৰতীয় ক্ৰিকেটৰ তিনি প্ৰজন্ম: শচীন, বিৰাট আৰু শুভমনক লৈ বিশেষ পোষ্ট-

লণ্ডনৰ ঐতিহাসিক চেণ্টাৰ ক’ৰ্টত চলি থকা উইম্বলডন টেনিছ চেম্পিয়নশ্বিপত দেখা গ’ল ক্ৰীড়া বিশ্বৰ এক অপূৰ্ব মহামিলন । ক্ৰিকেট আৰু টেনিছ অনুৰাগীসকলক এক বিশেষ উপহাৰ দি উইম্বলডনৰ অফিচিয়েল এক্স (পূৰ্বৰ টুইটাৰ) হেণ্ডেলে ভাৰতীয় ক্ৰিকেটৰ তিনিজন মহান তাৰকাক একেলগে সন্মান জনাই এটা বিশেষ পোষ্ট শ্বেয়াৰ কৰিছে, যিটো বৰ্তমান ছচিয়েল মিডিয়াত ভাইৰেল হৈ পৰিছে ।

উইম্বলডনত ভাৰতীয় ক্ৰিকেটৰ তিনি প্ৰজন্ম

উইম্বলডনে শ্বেয়াৰ কৰা ফটোত এটা শকৰো অধিক সময়ৰ ব্যৱধানৰ দুটা বিশেষ মুহূৰ্তক তুলনা কৰা হৈছে । এখন ছবিত ২০১৫ চনত ক্ৰিকেট লেজেণ্ড শচীন টেণ্ডুলকাৰ আৰু ভাৰতীয় দলৰ প্ৰাক্তন অধিনায়ক বিৰাট কোহলীয়ে একেলগে মেচ উপভোগ কৰা দেখা গৈছে । তাৰ ঠিক কাষতে আনখন ছবিত ২০২৬ চনত শচীন টেণ্ডুলকাৰৰ কাষত বহি থকা দেখা গৈছে ভাৰতৰ বৰ্তমানৰ টেষ্ট অধিনায়ক শুভমন গীলক । এই ছবিখন শ্বেয়াৰ কৰি উইম্বলডনে কেপচনত লিখিছে- “শচীন টেণ্ডুলকাৰ, বিৰাট কোহলী, শুভমন গীল । একেখন ছবিতে ভাৰতীয় ক্ৰিকেট ৰাজকীয়তাৰ তিনি প্ৰজন্ম ।”

ৰয়েল বক্সত তাৰকাৰ মেলা: শচীনৰ সৈতে ব্ৰায়ান লাৰা আৰু ফুটবল তাৰকা

প্ৰতি বছৰৰ দৰে এইবাৰো উইম্বলডনৰ ভিআইপি ৰয়েল বক্সত ক্ৰীড়া জগতৰ কেইবাগৰাকীও তাৰকা উপস্থিত আছিল । ক্ৰিকেট জগতৰ অন্যতম শ্ৰেষ্ঠ প্ৰতিদ্বন্দ্বী তথা এতিয়াৰ অন্তৰংগ বন্ধু শচীন টেণ্ডুলকাৰ আৰু ৱেষ্ট ইণ্ডিজৰ প্ৰাক্তন অধিনায়ক ব্ৰায়ান লাৰাই একেলগে বহি মেচ উপভোগ কৰে । ইয়াৰ উপৰিও ফুটবল তাৰকা তথা লিভাৰপুল আৰু নেদাৰলেণ্ডৰ অধিনায়ক ভাৰ্জিল ভ্যান ডাইক আৰু লিডছ ইউনাইটেডৰ অধ্যক্ষ পৰাগ মাৰাথেও বিশিষ্ট অতিথি হিচাপে চেণ্টাৰ ক’ৰ্টৰ শোভা বৰ্ধন কৰে ।

জেনিক চিনাৰৰ প্ৰদৰ্শনক শচীনৰ ‘মাষ্টাৰক্লাছ’ আখ্যা

চেম্পিয়নশ্বিপৰ পুৰুষৰ একক শাখাৰ দুয়োখন হাই-ভল্টেজ ছেমিফাইনেল প্ৰত্যক্ষ কৰাৰ পিছত শচীন টেণ্ডুলকাৰে এক্স যোগে নিজৰ উলাহ প্ৰকাশ কৰে । ব্ৰিটেইনৰ আৰ্থাৰ ফেৰীক পৰাস্ত কৰি আলেকজেণ্ডাৰ জেভেৰেভে নিজৰ প্ৰথমটো উইম্বলডন ফাইনেলত প্ৰৱেশ কৰা খেলখনক তেওঁ প্ৰশংসা কৰে ।

আনহাতে, বিশ্বৰ ১ নম্বৰ খেলুৱৈ জেনিক চিনাৰে সাতবাৰৰ উইম্বলডন চেম্পিয়ন নোভাক জকোভিচক পোনপটীয়া ছেটত পৰাস্ত কৰা মেচখনক লৈ শচীনে বিশেষ মন্তব্য কৰে ।

উইম্বলডনৰ এই ৰোমাঞ্চকৰ অভিজ্ঞতাৰ বাবে ধন্যবাদ জনাই মাষ্টাৰ ব্লাষ্টাৰে কয় যে এইধৰণৰ দিনবোৰৰ বাবেই মানুহে খেলক ইমান ভাল পায় আৰু তেওঁ আগন্তুক মেগা ফাইনেলখনৰ বাবে অধীৰ আগ্ৰহেৰে অপেক্ষা কৰিছে ।

লগতে পঢ়ক : উইম্বলডনত আলেকজেণ্ডাৰ জেভেৰেভৰ ইতিহাস

টীম ইণ্ডিয়াৰ হৈ খেলপথাৰত নামিয়েই ইতিহাসৰ পৃষ্ঠাত নিজৰ নাম সোণালী আখৰেৰে লিখিলে যুৱ বেটছমেন বৈভৱ সূৰ্যবংশীয়ে

ভাৰত আৰু ইংলেণ্ডৰ মাজত অনুষ্ঠিত টি২০ শৃংখলাৰ দ্বিতীয়খন খেলত এক অভূতপূৰ্ব ইতিহাসৰ সাক্ষী হৈ ৰ’ল ক্ৰীড়াবিশ্ব । শনিবাৰে (৪ জুলাই) মানচেষ্টাৰৰ ওল্ড ট্ৰেফৰ্ডত অনুষ্ঠিত খেলখনত টীম ইণ্ডিয়াৰ হৈ খেলপথাৰত নামিয়েই ইতিহাসৰ পৃষ্ঠাত নিজৰ নাম সোণালী আখৰেৰে লিখিলে যুৱ বেটছমেন বৈভৱ সূৰ্যবংশীয়ে । বাওঁহতীয়া বিস্ফোৰক বেটছমেন বৈভৱ এতিয়া ভাৰতৰ হৈ আটাইতকৈ কম বয়সত আন্তঃৰাষ্ট্ৰীয় পৰ্যায়ত অভিষেক ঘটোৱা ক্ৰিকেটাৰ হিচাপে পৰিগণিত হৈছে ।

খেলৰ পূৰ্বে বৈভৱক তেওঁৰ ঐতিহাসিক অভিষেক কেপ তুলি দিয়ে দলৰ উপ-অধিনায়ক তিলক বাৰ্মাই । ইয়াৰ সৈতে বৈভৱ ভাৰতৰ হৈ টি২০ আন্তঃৰাষ্ট্ৰীয় মেচ খেলা ১২২ সংখ্যক খেলুৱৈ হিচাপে পৰিগণিত হয় ।

ভংগ হ’ল মহান ক্ৰিকেটাৰ শচীন টেণ্ডুলকাৰৰ অভিলেখ-
মাত্ৰ ১৫ বছৰ ৯৯ দিন বয়সত নিজৰ আন্তঃৰাষ্ট্ৰীয় অভিষেক ঘটাই বৈভৱ সূৰ্যৱংশীয়ে ক্ৰিকেটৰ ভগৱান হিচাপে পৰিচিত শচীন টেণ্ডুলকাৰৰ বহু পুৰণি অভিলেখ ভংগ কৰে ।

শচীন টেণ্ডুলকাৰৰ অভিলেখ : ১৯৮৯ চনৰ ১৫ নৱেম্বৰত পাকিস্তানৰ বিৰুদ্ধে কৰাচীত টেষ্ট মেচ খেলি শচীনে আন্তঃৰাষ্ট্ৰীয় কেৰিয়াৰ আৰম্ভ কৰিছিল । অভিষেকৰ সময়ত তেওঁৰ বয়স আছিল ১৬ বছৰ ২০৫ দিন ।

শ্বেফালী বাৰ্মাৰ অভিলেখ : কেৱল পুৰুষ ক্ৰিকেটেই নহয়, সামগ্ৰিক ভাৰতীয় ক্ৰিকেটৰ ইতিহাসতো বৈভৱে শীৰ্ষস্থান দখল কৰিছে । ইয়াৰ পূৰ্বে ভাৰতৰ হৈ মহিলা ক্ৰিকটত আটাইতকৈ কম বয়সত অভিষেক ঘটোৱাৰ অভিলেখ আছিল শ্বেফালী বাৰ্মাৰ নামত (১৫ বছৰ ২৩৯ দিন)। এতিয়া বৈভৱে তেওঁতকৈও কম বয়সত দেশক প্ৰতিনিধিত্ব কৰাৰ গৌৰৱ অৰ্জন কৰিলে ।

IPL 2026 আৰু শ্ৰীলংকাত চমকপ্ৰদ প্ৰদৰ্শন-
বিগত কেইমাহমানৰ পৰা ভাৰতীয় ক্ৰিকেটত বৈভৱ সূৰ্যৱংশীৰ নাম জোৰদাৰভাৱে চৰ্চিত হৈ আহিছে । আই পি এল ২০২৬ ত ৰাজস্থান ৰয়েলছৰ হৈ খেলি তেওঁ বেটেৰে এনে ধুমুহাৰ সৃষ্টি কৰিছিল যে সমগ্ৰ বিশ্বই তেওঁৰ প্ৰতিভাৰ উমান পাইছিল । সমগ্ৰ ছিজনত আক্ৰমণাত্মক শৈলীৰে বেটিং কৰি তেওঁ ৭৭৬ ৰান সংগ্ৰহ কৰিছিল । এই সময়ছোৱাত তেওঁৰ বেটিং ষ্ট্ৰাইক ৰেট আছিল ২৩৭.৩০, যিয়ে টি২০ ক্ৰিকেটত তেওঁৰ বিস্ফোৰক মানসিকতা প্ৰদৰ্শন কৰে ।

আইপিএলৰ ধুমুহাৰ পিছতে বৈভৱে ইণ্ডিয়া-এ দলত সুযোগ লাভ কৰে । শ্ৰীলংকাত অনুষ্ঠিত ত্ৰিকোণীয় শৃংখলাত শ্ৰীলংকা-এ দলৰ বিৰুদ্ধে খিতাপ দখলৰ যুঁজখনত বৈভৱে মাত্ৰ ১১টা বলতে অৰ্ধশতক অৰ্জন কৰিছিল । এইটো লিষ্ট-এ ক্ৰিকেটৰ ইতিহাসত যিকোনো বেটছমেনৰ বাবে আটাইতকৈ দ্ৰুততম অৰ্ধশতক হিচাপে ধৰা হৈছে ।

বিচিচিআইৰ ভাইৰেল ভিডিঅ’:

আয়াৰলেণ্ড আৰু ইংলেণ্ড ভ্ৰমণৰ আৰম্ভণিৰে পৰাই বৈভৱ চৰ্চাত আছিল । বিচিচিআইয়ে শ্বেয়াৰ কৰা তেওঁৰ প্ৰথমটো নেট চেশ্বনৰ ভিডিঅ’ ছচিয়েল মিডিয়াত ব্যাপকভাৱে ভাইৰেল হৈ পৰিছি ল।

মাত্ৰ ১৫ বছৰ বয়সতে বৈভৱ সূৰ্যৱংশীয়ে যিধৰণে ইটোৰ পিছত সিটো অভিলেখ গঢ়িছে, সি ক্ৰিকেট বিশেষজ্ঞ তথা প্ৰাক্তন ক্ৰিকেটাৰসকলকো আপ্লুত কৰিছে । ক্ৰিকেট অনুৰাগীসকলে এতিয়া আশা প্ৰকাশ কৰিছে যে এই যুৱ তাৰকাগৰাকীয়ে অনাগত দিনত টীম ইণ্ডিয়াৰ হৈ বহু স্মৰণীয় ইনিংছ খেলি বিশ্ব ক্ৰিকেটত ভাৰতৰ নাম উজলাই তুলিব ।

লগতে পঢ়ক : ‘তেওঁ শচীন আৰু বিৰাটৰ দৰেই প্ৰতিভাশালী’; বৈভৱ সূৰ্যৱংশীক লৈ কপিল দেবৰ বিশেষ মন্তব্য