দিল্লী বিস্ফোৰণৰ পিছতে হাই এলাৰ্ট

দিল্লী বিস্ফোৰণে সমগ্ৰ দেশৰ চোৰাংচোৱা সংস্থাসমূহৰ নিদ্ৰা হৰণ কৰিছে । সোমবাৰে সন্ধিয়া লালকিল্লাৰ সমীপত সংঘটিত হয় এক ভয়ংকৰ বিস্ফোৰণ । এই বিস্ফোৰণত ১০ জনকৈ লোক নিহত হোৱাৰ লগতে ২৪ জনতকৈ অধিক লোক আহত হৈছে । প্ৰত্যক্ষদৰ্শীৰ মতে এই বিস্ফোৰণ অতি শক্তিশালী আছিল । বিস্ফোৰণৰ পিছতে ঘটনাস্থলীত উপস্থিত হয় অগ্নিনিৰ্বাপক বাহিনীৰ গাড়ী । ঘটনাস্থলীত তদন্তকাৰী সংস্থাও উপস্থিত হয় ।

দিল্লী বিস্ফোৰণৰ পিছতে মুম্বাই আৰক্ষীক হাই এলাৰ্টত ৰখা হৈছে । মহানগৰীৰ স্পৰ্শকাতৰ অঞ্চলত বৃদ্ধি কৰা হৈছে টহল আৰু অৱৰোধ । ৰেল ষ্টেচন, মল, ধৰ্মীয় স্থান, ৰাজহুৱা স্থানত আৰক্ষী বাহিনী মোতায়েন কৰা হৈছে । যিকোনো ধৰণৰ অপ্ৰীতিকৰ ঘটনা ৰোধৰ বাবে সতৰ্কতামূলক ব্যৱস্থা গ্ৰহণ কৰা হৈছে । ইফালে উত্তৰ প্ৰদেশত হাই এলাৰ্ট জাৰি কৰা হৈছে । এই সন্দৰ্ভত মুখ্যমন্ত্ৰী যোগী আদিত্যনাথে কঠোৰ নিৰ্দেশনা জাৰি কৰিছে ।

উত্তৰ প্ৰদেশৰ প্ৰধান স্থান, ধৰ্মীয় স্থান, বজাৰ আৰু জনবহুল অঞ্চলত কঠোৰ নিৰীক্ষণত ৰখা হৈছে । ছ’চিয়েল মিডিয়াত উৰাবাতৰি সক্রিয়ভাৱে নিৰীক্ষণ কৰা হৈছে ৷ মুখ্যমন্ত্রীয়ে আৰক্ষীক ড্ৰোন আৰু পৰ্যবেক্ষণৰ দৰে প্রযুক্তি নিৰীক্ষণ কৰিবলৈ নির্দেশ দিয়ে ৷ উত্তৰ প্ৰদেশ আৰু দিল্লীৰ সীমান্তত জাৰি কৰা হৈছে নিশ্চিদ্ৰ তালাচী । নয়ডা আৰু গাজিয়াবাদ আৰক্ষীক সজাগ হৈ থাকিবলৈ কোৱা হৈছে ।

নয়ডাৰ ভিৰ হোৱা অঞ্চলসমূহত আৰক্ষীয়ে তালাচী আৰম্ভ কৰিছে । মহানগৰীৰ অন্যতম আড়ম্বৰপূৰ্ণ অঞ্চল ১৮ নং ছেক্টৰত তালাচী চলি আছে । সন্দেহজনক বাহন আৰু লোকক ৰখাই সোধা-পোছা কৰা হৈছে । মেট্ৰ’ ষ্টেচন আৰু ইয়াৰ দাঁতিকাষৰীয়া অঞ্চলত বৃদ্ধি কৰা হৈছে আৰক্ষীৰ টহল । চিচিটিভিৰ জৰিয়তে নিৰীক্ষণ চলি আছে । দিল্লীৰ গাতে লাগি থকা গুৰুগ্ৰামতো হাই এলাৰ্ট জাৰি কৰা হৈছে ।

দিল্লী বিস্ফোৰণৰ পিছত এই অঞ্চলসমূহত হাই এলাৰ্টঃ

-কলকাতাত উচ্চ সতৰ্কতা জাৰি । আৰক্ষীয়ে সকলো ইউনিটক সতৰ্ক কৰি দিছে । সমগ্ৰ মহানগৰীতে আৰম্ভ হৈছে তালাচী ।

-উত্তৰাখণ্ড আৰক্ষীয়ে জাৰি কৰিছে হাই এলাৰ্ট । ডেৰাডুনৰ মল, ব্যস্ত বজাৰ, বাছ টাৰ্মিনেল, ৰেল ষ্টেচন আদিত নিৰাপত্তা বৃদ্ধি কৰা হৈছে ।

-উত্তৰ প্ৰদেশ আৰু নেপাল সীমান্ততো নিৰাপত্তা বৃদ্ধি কৰা হৈছে ।

-হাৰিয়ানাতো জাৰি কৰা হৈছে হাই এলাৰ্ট । ফৰিদাবাদত উদ্ধাৰ হোৱা এমোনিয়াম নাইট্ৰেটৰ দিল্লী বিস্ফোৰণৰ সৈতে সম্পৰ্ক নিশ্চিত হোৱা নাই ।

উচ্চ তীব্ৰতাৰ বিস্ফোৰণ, মৃত্যুৰ সংখ্যা বৃদ্ধিৰ সম্ভাৱনা-

উল্লেখ্য যে, দিল্লী বিস্ফোৰণৰ তীব্ৰ প্ৰাবল্যৰ আছিল । শেহতীয়া খবৰ অনুসৰি এই ঘটনাত ১০ জন লোক নিহত আৰু ২৪ জনতকৈ অধিক লোক আহত হৈছে । আনহাতে মৃত্যুৰ সংখ্যা বৃদ্ধি পোৱাৰ সম্ভাৱনা আছে, কিয়নো বিস্ফোৰণ উচ্চ তীব্ৰতাৰ আছিল ।

লগতে পঢ়ক : ভয়ংকৰ বিস্ফোৰণত কঁপি উঠিল ৰাজধানী দিল্লী; লালকিল্লাৰ সমীপত হাহাকাৰ পৰিস্থিতি

ভয়ংকৰ বিস্ফোৰণত কঁপি উঠিল দিল্লী

সোমবাৰে এক ভয়ংকৰ বিস্ফোৰণত কঁপি উঠে ৰাজধানী দিল্লী । দিল্লীৰ লালকিল্লাৰ সমীপত এক ভয়ংকৰ বিস্ফোৰণ সংঘটিত হোৱা বুলি খবৰ প্ৰকাশ পাইছে । এই ঘটনাৰ ফলত অঞ্চলটোত আতংকময় পৰিৱেশৰ সৃষ্টি হৈছে । প্ৰাৰম্ভিক তথ্য অনুসৰি এই ঘটনাত ৮গৰাকী লোক নিহত হোৱাৰ লগতে আন কেইবাজনো লোক গুৰুতৰভাৱে আহত হৈছে বুলি জানিব পৰা গৈছে । সন্ধিয়া ৬:৫৫ বজাত অগ্নিনিৰ্বাপক বাহিনীয়ে বিস্ফোৰণৰ তথ্য লাভ কৰে । দিল্লী আৰক্ষীৰ এটা দলে ঘটনাৰ তদন্ত আৰম্ভ কৰিছে ।

বিস্ফোৰণ এখন বাহনত সংঘটিত হয় আৰু আন ৮খন বাহনো লগে লগে জুয়ে আগুৰি ধৰে । জানিব পৰা মতে ৰেড ফ’ৰ্ট মেট্ৰ’ ষ্টেচনৰ ১ নং গেটত সংঘটিত হয় এই বিস্ফোৰণ ।

বিস্ফোৰণৰ ফলত ওচৰতে ৰখাই থোৱা বাহনসমূহৰ খিৰিকী ছিন্নভিন্ন হৈ পৰে । বিস্ফোৰণৰ সময়ত সেই ঠাইত বৃহৎ জনসমাগমৰ আছিল । আহত লোকসকলক ওচৰৰ চিকিৎসালয়ত ভৰ্তি কৰোৱা হৈছে । গাড়ীখনত থকা চি এন জিৰ ফলত নে আন কোনো কাৰণত বিস্ফোৰণ সংঘটিত হয় সেয়া এতিয়াও জানিব পৰা হোৱা নাই । ইতিমধ্যে ঘটনাস্থলীত অগ্নিনিৰ্বাপক বাহিনীৰ বাহনসমূহ উপস্থিত হৈ অগ্নি নিৰ্বাপনৰ  প্ৰয়াস অব্যাহত ৰাখিছে ।

উল্লেখ্য যে, লালকিল্লাৰ সমীপত সংঘটিত হোৱা বিস্ফোৰণে চিন্তিত কৰি তুলিছে নিৰাপত্তা সংস্থা সমূহক । প্ৰাৰম্ভিক তদন্তৰ পৰা দেখা গৈছে যে এই কাণ্ড স্থানীয় বিস্ফোৰণ নহয় । দিল্লীৰ গাতে লাগি থকা ফৰিদাবাদত ২৯০০ কিলোগ্ৰাম এমোনিয়াম নাইট্ৰেট উদ্ধাৰ হোৱাৰ পিছতে এই বিস্ফোৰণ সংঘটিত হৈছে । অৱশ্যে দুয়োটা ঘটনাৰ মাজত কোনো সংযোগ আছে নে নাই সেয়া পৰৱৰ্তী তদন্ত প্ৰক্ৰিয়াত স্পষ্ট হ’ব ।

লগতে পঢ়ক : চিকিৎসকৰ ঘৰৰ পৰা দুটা এ কে ৪৭ আৰু ৩৫০ কেজি বিস্ফোৰক উদ্ধাৰ!দুজনক আটক