২০২৫ চনটোক যুদ্ধৰ বছৰ বুলি ক’লেও ভুল কোৱা নহ’ব ৷ ২০২৬ চনৰো আৰম্ভণি হৈছে উত্তেজনা, হিংসা আৰু সংঘাতেৰে । ইৰাণ, বাংলাদেশৰ পৰা ভেনিজুৱেলালৈকে যুদ্ধৰ বিভিষীকাই আগুৰি ধৰিছে…

নতুন বছৰৰ আৰম্ভণিতে বিশ্বত যুদ্ধৰ উকমুকনি । ২০২৫ চনটোক যুদ্ধৰ বছৰ বুলি ক’লেও ভুল কোৱা নহ’ব ৷ কিয়নো ইখনৰ পিছত সিখন দেশ যুদ্ধ আৰু হিংসাৰ জুয়ে আগুৰি ধৰিছিল । ২০২৫ বৰ্ষটোৱে বিদায় লোৱাৰ পিছত ২০২৬ চনটো শান্তি আৰু যুদ্ধবিহীন ভাৱে পাৰ হ’ব বুলি ভবা হৈছিল যদিও এতিয়া সেই আশাত চেঁচা পানী পৰিছে । কিয়নো ২০২৬ চনৰ আৰম্ভণি হৈছে উত্তেজনা, হিংসা আৰু সংঘাতেৰে ।

বিশ্বৰ বিভিন্ন প্ৰান্তত ক’ৰবাত চৰকাৰৰ বিৰুদ্ধে ক্ষোভত ৰাজপথ উত্তাল হৈ আছে, আন ঠাইত নিৰ্বাচনৰ পূৰ্বে পৰিস্থিতি নিয়ন্ত্ৰণৰ বাহিৰলৈ গতি কৰিছে । মধ্যপ্ৰাচ্যৰ পৰা দক্ষিণ এছিয়া আৰু লেটিন আমেৰিকালৈকে পৰিস্থিতি দ্ৰুতগতিত অৱনমিত হৈছে । ইৰাণৰ শাসন ব্যৱস্থাৰ বিৰুদ্ধে বিদ্ৰোহ, বাংলাদেশত নিৰ্বাচনী হিংসা, য়েমেনত চলি থকা গৃহযুদ্ধ, ৰাছিয়া আৰু ইউক্ৰেইনৰ মাজত চলি থকা তীব্ৰ যুদ্ধ, ভেনিজুৱেলাত আমেৰিকাৰ আক্ৰমণ আদি সকলোবোৰে স্পষ্ট কৰি দিছে যে ২০২৬ চনৰ আৰম্ভণিয়ে বিশ্ববাসীক অস্বস্তি, আতংক আৰু অনিশ্চয়তা কঢ়িয়াই আনিছে ।

আমেৰিকাৰ ভেনিজুৱেলা আক্ৰমণ আৰু ৰাষ্ট্ৰপতিক বন্দী-

২০২৬ বৰ্ষ আৰম্ভ হোৱাৰ মাত্ৰ তিনিটা দিন পিছতে আমেৰিকাই ভেনিজুৱেলাত বৃহৎ আক্ৰমণ চলায় । শনিবাৰে আমেৰিকাই ভেনিজুৱেলাৰ ৰাজধানী কাৰাকাছ, মিৰাণ্ডা, আৰাগুয়া, লা গুইৰাকে ধৰি চাৰিখন চহৰত ৭টা বিমান আক্ৰমণ চলায় । এই কথা স্বয়ং আমেৰিকাৰ ৰাষ্ট্ৰপতি ড’নাল্ড ট্ৰাম্পে নিশ্চিত কৰিছে । আক্ৰমণৰ পিছত কেইবাটাও অঞ্চলত বিদ্যুৎ বিচ্ছিন্ন হয় । ভেনিজুৱেলাৰ তেল আৰু খনিজ সম্পদ দখল কৰিবলৈ আমেৰিকাই অভ্যুত্থানৰ চেষ্টা চলাইছে বুলি অভিযোগ কৰি ৰাষ্ট্ৰপতি নিকোলাছ মাদুৰোৱে দেশজুৰি জৰুৰীকালীন অৱস্থা ঘোষণা কৰে । ইফালে ট্ৰাম্পে দাবী কৰে যে এই আক্ৰমণৰ পিছত নিকোলাছ মাদুৰো আৰু তেওঁৰ পত্নীক বন্দী কৰি দেশৰ বাহিৰলৈ লৈ যোৱা হৈছে ।

ইৰাণৰ ৰাজপথত প্ৰতিবাদ, শাসন ব্যৱস্থাৰ বিৰুদ্ধে শ্লোগান-

ইৰাণত একেৰাহে সপ্তম দিন ধৰি মুদ্ৰাস্ফীতি আৰু সৰ্বোচ্চ নেতা আয়াতুল্লাহ আলী খোমেইনীৰ বিৰুদ্ধে প্ৰতিবাদ অব্যাহত আছে । দেশখনত এই পৰ্যন্ত মৃত্যু হৈছে ৮ জন লোকৰ । পৰিস্থিতি ইমানেই উত্তেজিত হৈ পৰিছে যে নিহত প্ৰতিবাদকাৰীৰ অন্ত্যেষ্টিক্ৰিয়াতো মানুহে মুকলিকৈ “ডেথ টু খোমেইনী” ধ্বনি দি আছে । এই প্ৰতিবাদ এতিয়া কেৱল তেহৰাণতে আবদ্ধ হৈ থকা নাই । ছিয়া ধৰ্মগুৰুসকলৰ দুৰ্গ বুলি গণ্য কৰা পবিত্ৰ চহৰ ক’মলৈয়ো বিয়পি পৰিছে এই প্ৰতিবাদ । ইৰাণ ইণ্টাৰনেশ্যনেলৰ বাতৰি অনুসৰি, তীব্ৰ নিৰাপত্তাৰ মাজতো প্ৰতিবাদকাৰীসকলে ৰাজতন্ত্ৰৰ সমৰ্থনত শ্লোগান দিয়ে । ইয়াৰ মাজতে ইছলামিক শাসন ব্যৱস্থাৰ সম্ভাৱ্য পতনৰ বাতৰিও চৰ্চা চলিছে ।

বাংলাদেশৰ নিৰ্বাচনৰ পূৰ্বে হিংসা, সংখ্যালঘুক আক্ৰমণ-

২০২৬ চনৰ ১২ ফেব্ৰুৱাৰীত বাংলাদেশত সাধাৰণ নিৰ্বাচন অনুষ্ঠিত হোৱাৰ কথা আছে যদিও ইতিমধ্যে দেশখনত হিংসাত্মক পৰিস্থিতিৰ সৃষ্টি হৈছে । ২০২৫ চনৰ ডিচেম্বৰ মাহত ছাত্ৰ নেতা ওছমান হাদীৰ মৃত্যুৰ লগে লগে এই সংকটৰ আৰম্ভণি হয় । ইয়াৰ পিছতে অগ্নিসংযোগ, ধ্বংসাত্মক কাৰ্য, হিংসাত্মক পৰিস্থিতিৰ সৃষ্টি হয় । দেশখনত বৰ্তমান পৰিস্থিতি আটাইতকৈ চিন্তনীয় হিন্দু সংখ্যালঘুৰ বাবে । শেহতীয়াকৈ সংঘটিত আক্ৰমণত আহত ৫০ বছৰীয়া হিন্দু ব্যৱসায়ী খোকন চন্দ্ৰ দাসৰ চিকিৎসালয়ত মৃত্যু হয় । দিপু দাস, অমৃত মণ্ডল, বিজেন্দ্ৰ বিশ্বাসক নামৰ হিন্দু ব্যক্তিকেইজনকো হত্যা কৰা হয় । দেশখনত এই পৰ্যন্ত চাৰিজন হিন্দুৱে প্ৰাণ হেৰুৱাইছে । এই ঘটনাই বাংলাদেশৰ সমগ্ৰ হিন্দুসকলৰ মাজত আতংকৰ সৃষ্টি কৰিছে ।

য়েমেনত পুনৰ উত্তেজনা-

২০১৪ চনৰ পৰাই য়েমেনৰ গৃহযুদ্ধ চলি আছে । সেই বছৰতে হৌথী বিদ্ৰোহীয়ে ৰাজধানী ছানা দখল কৰে । ইয়াৰ পিছত ২০১৫ চনত ছৌদি আৰৱৰ নেতৃত্বত আৰু কেইবাখনো উপসাগৰীয় দেশকে ধৰি সামৰিক মিত্ৰজোঁট গঠন কৰি হৌথীক ক্ষমতাৰ পৰা উৎখাত কৰা হয় । প্ৰথম অৱস্থাত ছৌদি সমৰ্থিত চৰকাৰ আৰু ইৰাণ সমৰ্থিত হৌথীৰ মাজত যুদ্ধ হৈছিল যদিও এতিয়া য়েমেনত নতুন আৰু বিপজ্জনক উত্তেজনাই আৱৰি ধৰিছে ।

এতিয়া এই যুদ্ধত উপসাগৰীয় দেশসমূহৰ মাজত উত্তেজনা স্পষ্ট হৈ পৰিছে । চৌদি আৰৱৰ সেনাই বিমান আক্ৰমণ চলোৱাত পৰিস্থিতি অধিক ভয়াৱহ হৈ পৰে । ছৌদি আৰবে দাবী কৰে যে এই আক্ৰমণৰ লক্ষ্য হৈছে য়েমেনৰ বিচ্ছিন্নতাবাদী গোট দক্ষিণ ট্ৰেঞ্জিচনেল কাউন্সিললৈ প্ৰেৰণ কৰা অস্ত্ৰৰ চালান । এই গোটটো সংযুক্ত আৰব আমিৰশ্বাহী (UAE) ৰ দ্বাৰা সমৰ্থিত আৰু দক্ষিণ য়েমেনৰ বহু অঞ্চল নিয়ন্ত্ৰণত আছে । ইতিমধ্যে যুদ্ধ, ক্ষুধা আৰু মানৱীয় সংকটৰ সৈতে যুঁজি থকা য়েমেনৰ অসামৰিক জনসাধাৰণে শেহতীয়া উত্তেজনাৰ বোজা আকৌ এবাৰ বহন কৰিছে ।

অধিক ভয়ংকৰ হৈ পৰিছে ৰাছিয়া-ইউক্ৰেইন যুদ্ধ-

২০২৬ চনত ৰাছিয়া আৰু ইউক্ৰেইনৰ মাজৰ যুদ্ধ চাৰি বছৰ সম্পূৰ্ণ হ’ব । শান্তি আলোচনাৰ সকলো প্ৰচেষ্টা ব্যৰ্থ হৈছে । নতুন বছৰৰ আৰম্ভণিতে সংঘাত তীব্ৰতৰ হৈ পৰিছে । পুটিনৰ বাসগৃহত আক্ৰমণৰ দাবীয়ে উত্তেজনা আৰু অধিক বৃদ্ধি কৰিছে । মস্কোৱে কয় যে ইউক্ৰেইনে এতিয়া ৰাজধানী আৰু মূল স্থানসমূহক পোনপটীয়াকৈ লক্ষ্য কৰি লৈছে । আমেৰিকাৰ ৰাষ্ট্ৰপতিৰ নেতৃত্বত যুদ্ধৰ অন্ত পেলোৱাৰ প্ৰচেষ্টা কিমান সফল হ’ব সেয়া হ’ব লক্ষ্যণীয় ।

লগতে পঢ়ক : পত্নীসহ ভেনিজুৱেলাৰ ৰাষ্ট্ৰপতি মাদুৰোক বন্দী আমেৰিকাৰ… ট্ৰাম্পৰ বৃহৎ দাবী