ইজৰাইল-ইৰাণৰ মাজত অব্যাহত ভয়ংকৰ যুদ্ধ

মধ্যপ্ৰাচ্য পুনৰবাৰ এক বৃহৎ যুদ্ধৰ সন্মুখীন হৈছে । ইজৰাইল আৰু ইৰাণৰ মাজত অব্যাহত আছে ভয়ংকৰ যুদ্ধ । ১৩ জুনৰ নিশা ইৰাণৰ বিৰুদ্ধে ইজৰাইলৰ ‘অপাৰেচন ৰাইজিং লায়ন’ আৰম্ভ হোৱাৰ পিছতেই দুয়োখন দেশৰ মাজত উত্তেজনা অব্যাহত আছে । এই ভয়ংকৰ যুদ্ধত শনিবাৰে নিশাও দুয়োখন দেশে ইখনে সিখনক আক্ৰমণ কৰে । শনিবাৰে নিশা ইৰাণৰ অন্যান্য অঞ্চলৰ লগতে ইজৰাইলৰ বায়ুসেনাই ৰাজধানী তেহৰাণক আক্ৰমণ কৰে, যাৰ প্ৰতিক্ৰিয়া স্বৰূপে ইৰাণে ইজৰাইলৰ ওপৰত আন এক মিছাইল আক্ৰমণ কৰে ।

ইজৰাইলৰ এই আক্ৰমণত তেহৰাণৰ প্ৰতিৰক্ষা মন্ত্ৰালয়ৰ ভৱন, পাৰমাণৱিক পৰীক্ষাগাৰ, পাৰমাণৱিক মুখ্য কাৰ্যালয় আৰু দুটা শোধনাগাৰক লক্ষ্য কৰি লোৱা হয় । আক্ৰমণৰ পিছত ছবিসমূহত অগ্নিকাণ্ড আৰু বৃহৎ পৰিসৰৰ ক্ষতি হোৱা দেখা যায় । ইয়াৰ পিছত ইৰাণে ইজৰাইলৰ বন্দৰ চহৰ হাইফাকে ধৰি সমগ্ৰ ইজৰাইলৰ ওপৰত ক্ষেপণাস্ত্ৰ নিক্ষেপ কৰে । ইৰাণৰ ইছলামিক ৰিভল্যুচনেৰী গাৰ্ড কৰ্পছে কয় যে তেওঁলোকে ইজৰাইলৰ শক্তি আন্তঃগাঁথনিক লক্ষ্য কৰি লৈছিল । ইজৰাইলৰ জৰুৰীকালীন সেৱাই জনাইছে যে এই আক্ৰমণত দেশখনৰ উত্তৰ অংশত কমেও তিনিজন লোক নিহত হৈছে ।

শুকুৰবাৰে সন্ধিয়া ইৰাণৰ আক্ৰমণৰ পিছত ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে শনিবাৰে কয় যে দেশখনৰ সেনাই আয়াতুল্লাহ শাসনৰ প্ৰতিটো স্থান আৰু প্ৰতিটো লক্ষ্যত আক্ৰমণ কৰিব ।

এই ভয়ংকৰ যুদ্ধত শুকুৰবাৰে পুৱা ইৰাণে নিজৰ পাৰমাণৱিক সুবিধা, বিমান প্ৰতিৰক্ষা আৰু অন্যান্য লক্ষ্যত ইজৰাইলৰ বিমান আক্ৰমণৰ প্ৰতিক্ৰিয়া প্ৰকাশ কৰে । ইয়াৰে কিছু আক্ৰমণত শীৰ্ষ সামৰিক সেনা কামাণ্ডাৰ আৰু পাৰমাণৱিক বিজ্ঞানীক হত্যা কৰা হৈছে । ইজৰাইলে কয় যে ইয়াৰ অস্তিত্বৰ প্ৰতি ভাবুকি বুলি গণ্য কৰা ইৰাণৰ পাৰমাণৱিক কাৰ্যসূচীৰ অন্ত পেলাবলৈ চেষ্টা চলাইছে ।

দেওবাৰে ইৰাণে যুদ্ধ তীব্ৰতৰ হোৱাৰ পিছত এমাহতকৈও অধিক সময় ধৰি চলি থকা পাৰমাণৱিক আলোচনা স্থগিত ৰাখিছিল । ইৰাণৰ বৈদেশিক মন্ত্ৰী আব্বাছ আৰাঘচিয়ে কয় যে ইজৰাইলৰ আক্ৰমণৰ পিছত আলোচনা অনুষ্ঠিত কৰাটো “অনুচিত” হ’ব ।

ইজৰাইলৰ প্ৰতিৰক্ষা বাহিনীয়ে টুইটযোগে কয়, “আই ডি এফে তেহৰাণত ইৰাণৰ শাসন ব্যৱস্থাৰ পাৰমাণৱিক অস্ত্ৰ প্ৰকল্পৰ সৈতে জড়িত লক্ষ্যত ধাৰাবাহিকভাৱে আক্ৰমণ চলাইছে । লক্ষ্যৰ ভিতৰত ইৰাণৰ প্ৰতিৰক্ষা মন্ত্ৰালয়ৰ মুখ্য কাৰ্যালয়, এছ পি এন ডি পাৰমাণৱিক প্ৰকল্পৰ মুখ্য কাৰ্যালয় আৰু ইৰাণ শাসনৰ পাৰমাণৱিক অস্ত্ৰ নিৰ্মাণৰ প্ৰচেষ্টাক আগুৱাই নিয়া অন্যান্য লক্ষ্য অন্তৰ্ভূক্ত আছিল । য’ত ইৰাণ শাসনে পাৰমাণৱিক অস্ত্ৰ নিৰ্মাণৰ প্ৰচেষ্টাক আগুৱাই নিছিল ।”

ইফালে ইজৰাইলৰ প্ৰতিৰক্ষা মন্ত্ৰী ইজৰাইল কাটজে ছ’চিয়েল মিডিয়াত কয় যে তেহৰাণ জ্বলি আছে । ইৰাণৰ চৰকাৰী টেলিভিছনে কয় যে চহৰখনৰ পূব আৰু পশ্চিম অংশত বিস্ফোৰণৰ শব্দ শুনা গৈছে ।

লগতে পঢ়ক : মধ্যপ্ৰাচ্যত যুদ্ধৰ দামামা; ইজৰাইলৰ ওপৰত ১৫০টা মিছাইল নিক্ষেপ ইৰাণৰ

খোমেইনীক ইজৰাইলৰ প্ৰতিৰক্ষা মন্ত্ৰীৰ কঠোৰ সতৰ্কবাণী

ইজৰাইলৰ প্ৰতিৰক্ষা মন্ত্ৰী ইজৰাইল কাটজে ইৰাণক কঠোৰ সকিয়নী দিছে । তেওঁ কয় যে, ইৰাণে যদি ইজৰাইলৰ ওপৰত ক্ষেপণাস্ত্ৰ আক্ৰমণ অব্যাহত ৰাখে তেন্তে “তেহৰাণ জ্বলাই দিয়া হ’ব”। ইৰাণে নিজৰ পাৰমাণৱিক, ক্ষেপণাস্ত্ৰ আৰু সামৰিক প্ৰতিষ্ঠানত ইজৰাইলৰ আক্ৰমণৰ প্ৰতিক্ৰিয়া স্বৰূপে কেইবাটাও ক্ষেপণাস্ত্ৰ নিক্ষেপ কৰাৰ পিছতে এই বিবৃতি প্ৰকাশ কৰিছে তেল আভিভে ।

ইজৰাইল প্ৰতিৰক্ষা বাহিনীৰ মুৰব্বী ইয়াল জমিৰ, মোছাদৰ মুৰব্বী ডেভিদ বাৰ্নিয়া আৰু অন্যান্য সামৰিক বিষয়াসকলে অংশগ্ৰহণ কৰা উচ্চ পৰ্যায়ৰ বৈঠকত প্ৰতিৰক্ষা মন্ত্ৰীজনে কয় যে ইৰাণৰ একনায়কত্ববাদে নিজৰ নাগৰিকক পণবন্দী কৰি ৰাখিছে আৰু এনে পৰিস্থিতিৰ সৃষ্টি কৰিছে য’ত বিশেষকৈ তেহৰাণৰ বাসিন্দাসকলে যথেষ্ট মূল্য ভৰিব লাগিব ।

মিছাইল নিক্ষেপ কৰিলে তেহৰাণ জ্বলাই দিয়া হ’ব !

প্ৰতিৰক্ষা মন্ত্ৰী কাটজে ইৰাণৰ সৰ্বোচ্চ নেতা আলী খোমেইনীক পোনপটীয়াকৈ সকীয়াই দি কয় যে, “যদি খোমেইনীয়ে ইজৰাইলৰ নাগৰিকৰ ওপৰত ক্ষেপণাস্ত্ৰ নিক্ষেপ কৰি থাকে তেন্তে তেহৰাণ জ্বলাই দিয়া হ’ব ।” আই ডি এফৰ তথ্য অনুসৰি শুকুৰবাৰৰ নিশাৰ পৰা ইৰাণে ইজৰাইললৈ প্ৰায় ২০০টা বেলিষ্টিক মিছাইল নিক্ষেপ কৰিছে । ইয়াৰে অধিকাংশই ইজৰাইলৰ বায়ু প্ৰতিৰক্ষাৰ দ্বাৰা ধ্বংস হয় যদিও নিৰ্ধাৰিত প্ৰট’কল অনুসৰি প্ৰায় ২৫% ক্ষেপণাস্ত্ৰ বাধা দিব পৰা নগ’ল আৰু কিছুমান মুকলি ঠাইত পৰে ।

ইজৰাইলৰ সেনাই কয় যে কিছুমান ক্ষেপণাস্ত্ৰই প্ৰতিৰক্ষা ব্যৱস্থাক ধূলি দি আৱাসিক অঞ্চলত উপনীত হোৱাৰ ফলত টেল আভিভ, ৰমাত গান আৰু ৰিছন লেজিয়নৰ দৰে চহৰত প্ৰাণ আৰু সম্পত্তিৰ ক্ষতিসাধন হয় । এই আক্ৰমণত তিনি ইজৰাইলী সাধাৰণ নাগৰিকৰ মৃত্যু হোৱাৰ লগতে প্ৰায় ৭০ জন লোক আহত হৈছে । অৱশ্যে আই ডি এফে কয় যে সকলো সামৰিক আৰু বায়ুসেনাৰ ঘাটি স্বাভাৱিকভাৱে কাম কৰি আছে ।

ইজৰাইলৰ ওপৰত এশৰো অধিক ড্ৰোন নিক্ষেপ ইৰাণৰ-

শুকুৰবাৰে ইৰাণে নিক্ষেপ কৰা ১০০খন ড্ৰোনৰ উপৰিও নিশা আন বহু ড্ৰোন নিক্ষেপ কৰা হয়, যিবোৰ ইজৰাইলৰ বায়ুসেনা আৰু নৌসেনাই ধ্বংসক কৰে । ইফালে আই ডি এফৰ মুৰব্বী ইয়াল জমিৰ আৰু ইজৰাইলৰ বায়ুসেনাৰ মুৰব্বী ট’মাৰ বাৰে কয় যে “তেহৰাণলৈ যোৱাৰ পথ এতিয়া স্পষ্ট হৈছে” । সেনাই কয় যে এতিয়া ইজৰাইলৰ যুদ্ধ বিমান তেহৰাণতো চলিব ।

আই ডি এফে কয় যে ইজৰাইলৰ বায়ুসেনাই তেহৰাণত ইৰাণৰ বায়ু প্ৰতিৰক্ষা ব্যৱস্থাত আক্ৰমণ চলাই ইজৰাইলৰ বিমানক তাত অধিক স্বাধীনতা প্ৰদান কৰিছে । টমাৰ বাৰে কয়, “আমি একেদিনাই শ শ টাৰ্গেটত আঘাত কৰিছিলো, য’ত কেইবা ডজন বিমান বিধ্বংসী ব্যৱস্থাও আছিল ।”

তেওঁ কয় যে যুদ্ধ আৰম্ভ হোৱাৰ পিছত প্ৰথমবাৰৰ বাবে ইজৰাইলৰ যুদ্ধ বিমানে ১৫০০ কিলোমিটাৰ দূৰৰ পৰা তেহৰাণৰ ওপৰেৰে উৰা মাৰি ইয়াৰ প্ৰতিৰক্ষা লক্ষ্যত আক্ৰমণ কৰিবলৈ সক্ষম হয় ।

লগতে পঢ়ক : ‘তেল এভিভক ধ্বংস কৰি দিব তেহৰাণে’; ইজৰাইলৰ আক্ৰমণত ক্ষুব্ধ খামেনীৰ প্ৰতিজ্ঞা

ৰাছিয়াৰ সৰ্ববৃহৎ আক্ৰমণ

ইউক্ৰেইনত ৰাছিয়াৰ সৰ্ববৃহৎ আক্ৰমণ । দেওবাৰে নিশা ৰাছিয়াই ইউক্ৰেইনত বৰ্তমানলৈকে কৰা সৰ্ববৃহৎ ড্ৰোন আক্ৰমণ চলাই । ইউক্ৰেইনৰ মতে, ৰাছিয়াৰ পৰা কিয়েভ আৰু অন্যান্য অঞ্চলত প্ৰায় ৩৫৫টা ড্ৰোন আৰু ৯টা ক্ৰুজ মিছাইল নিক্ষেপ কৰা হয় । ৰাছিয়াৰ সৰ্ববৃহৎ আক্ৰমণৰ বিষয়ে তথ্য দি ইউক্ৰেইনৰ বায়ুসেনাৰ যোগাযোগ বিভাগে কয় যে ৰাছিয়াৰ আক্ৰমণত ৩৫৫খন ড্ৰোন জড়িত আছিল । এই আক্ৰমণত একাংশ সাধাৰণ নাগৰিক আহত হোৱা বুলি বিষয়াসকলে জনায় । অৱশ্যে তাৎক্ষণিকভাৱে কোনো মৃত্যুৰ খবৰ পোৱা নগ’ল ।

শনিবাৰৰ আক্ৰমণত ১২ জন নিহত-

ইয়াৰ পূৰ্বে শনিবাৰে নিশা ইউক্ৰেইনৰ ৰাজধানী কিয়েভ আৰু অন্যান্য অঞ্চলত ৰাছিয়াৰ ড্ৰোন আৰু মিছাইলৰ সংযুক্ত আক্ৰমণত কমেও ১২ জন লোক নিহত হোৱাৰ লগতে কেইবা ডজন লোক আহত হয় । ইউক্ৰেইনৰ বিষয়াসকলে ইয়াক যুদ্ধৰ সময়ত ৰাছিয়াৰ আটাইতকৈ ডাঙৰ বিমান আক্ৰমণ বুলি অভিহিত কৰিছে । বৰ্তমান এই আক্ৰমণ সন্দৰ্ভত ৰাছিয়া কৰ্তৃপক্ষৰ পৰা কোনো তাৎক্ষণিক মন্তব্য দিয়া হোৱা নাই ।

ইউক্ৰেইনে চলাইছিল ড্ৰোন আক্ৰমণ-

ইয়াৰ পূৰ্বে ৰাছিয়াৰ সামৰিক অধিনায়কগৰাকীয়ে দাবী কৰিছিল যে ২০ মে’ত ৰাছিয়াৰ কুৰ্স্ক অঞ্চল ভ্ৰমণৰ সময়ত ইউক্ৰেইনে ৰাছিয়াৰ ৰাষ্ট্ৰপতিৰ হেলিকপ্টাৰত ড্ৰোন আক্ৰমণ চলাইছিল । সেই সময়ত ৰাষ্ট্ৰপতি পুটিনৰ হেলিকপ্টাৰ আক্ৰমণৰ কেন্দ্ৰবিন্দু আছিল । ৰাছিয়ান সেনাৰ বায়ু প্ৰতিৰক্ষা বিভাগৰ অধিনায়ক ইউৰি ডাচকিনে এই দাবী কৰিছে । ৰাছিয়াৰ সংবাদ মাধ্যমৰ সৈতে হোৱা এক সাক্ষাৎকাৰত ডাচকিনে কয় যে ৰাষ্ট্ৰপতি পুটিনৰ হেলিকপ্টাৰক সুৰক্ষা প্ৰদানৰ বাবে আমি অহৰহ বিমান সুৰক্ষাৰ যুদ্ধ চলাই আহিছিলো । ইউক্ৰেইনৰ ড্ৰোন আক্ৰমণৰ লক্ষ্য হৈ পৰিছিল ৰাষ্ট্ৰপতিৰ হেলিকপ্টাৰখন ।

লগতে পঢ়ক : ‘শীঘ্ৰেই ধ্বংস হ’ব ৰাছিয়া…’; ভ্লাদিমিৰ পুটিনক পাগল আখ্যা ড’নাল্ড ট্ৰাম্পৰ