আজি দুদিনীয়া ভ্ৰমণ কাৰ্যসূচীৰে ভাৰতলৈ আহিব ভ্লাদিমিৰ পুটিন । আমেৰিকাকে ধৰি সমগ্ৰ বিশ্বৰ দৃষ্টি নিবদ্ধ হৈ আছে এই ভ্ৰমণত ।

ৰাছিয়াৰ ৰাষ্ট্ৰপতি ভ্লাদিমিৰ পুটিনৰ সৈতে ৰক্ষা মন্ত্ৰী আন্দ্ৰে বেলৌচভসহ মুঠ সাতজন মন্ত্ৰী আজিৰে পৰা দুদিনীয়াকৈ ভাৰত ভ্ৰমণলৈ আহিব । ভ্লাদিমিৰ পুটিন আৰু ৰক্ষা মন্ত্ৰী বেলৌচভৰ উপৰি ৰাছিয়াৰ কৃষি মন্ত্ৰী, অৰ্থ মন্ত্ৰী আৰু অৰ্থনৈতিক উন্নয়ন মন্ত্ৰীয়ো এই ভ্ৰমণত অংশ ল’ব । এই গুৰুত্বপূর্ণ ভ্ৰমণত ভাৰত-ৰাছিয়াৰ মাজত প্ৰায় ১০টা আন্তঃ-চৰকাৰী চুক্তি আৰু ১৫টা ব্যৱসায়িক চুক্তি হোৱাৰ আশা কৰা হৈছে ।

প্ৰধানমন্ত্ৰী নৰেন্দ্ৰ মোদী আৰু ভ্লাদিমিৰ পুটিনৰ দুখন গুৰুত্বপূর্ণ বৈঠক হ’ব । এখন হ’ব বন্ধ দৰ্জাৰ বৈঠক, য’ত মোদী আৰু পুটিনৰ উপৰি অতি অল্পসংখ্যক ব্যক্তি উপস্থিত থাকিব । দ্বিতীয় বৈঠকখনত দুয়ো দেশৰ নেতাই অংশগ্ৰহণ কৰিব । লগতে মোদী আৰু পুটিনে India-Russia Business Forumৰ সন্মিলনতো যোগদান কৰিব । ইয়াৰ মাজতেই পুটিনে ৰাছিয়াৰ চৰকাৰী সংবাদ চেনেল RT (Russia Today)ৰ ভাৰত চেনেল RT-India-ৰ লঞ্চিং অনুষ্ঠানতো উপস্থিত থাকিব । তথ্য অনুসৰি, মঙলবাৰ (৯ ডিচেম্বৰ ২০২৫) ৰক্ষা মন্ত্ৰী ৰাজনাথ সিং আৰু তেওঁৰ ৰাছিয়ান সমকক্ষ বেলৌচভে India-Russia Inter-Governmental Commission on Military & Military Technical Cooperationৰ মন্ত্ৰ্যালয় স্তৰৰ বৈঠকখনত অংশ ল’ব। এই বৈঠকৰ আগতে দিল্লী কেণ্টৰ মেনেকশ্ব চেণ্টাৰত ভাৰতৰ তিনিও বাহিনীৰ যৌথ দলে বেলৌচভক Guard of Honour আগবঢ়াব ।

বেলৌচভে নেচনেল ৱাৰ মেম’ৰিয়েলতো গৈ ভাৰতৰ শহীদ সৈনিকসকলক শ্রদ্ধাঞ্জলি জ্ঞাপন কৰিব। ৰাছিয়াৰ ৰক্ষা মন্ত্ৰী আন্দ্ৰে বেলৌচভ এজন অৰ্থনীতিবিদ । ২০২৪ চনত পুটিনে পঞ্চমবাৰ ক্ষমতা গ্ৰহণ কৰাৰ পিছতেই বেলৌচভক ৰক্ষা মন্ত্ৰী হিচাপে নিযুক্তি দিয়া হৈছিল । ইউক্ৰেইন যুদ্ধৰ বাবে ৰাছিয়াৰ ৰক্ষা বাজেট বাঢ়ি যোৱাৰ ফলত পুটিনে তেওঁৰ বিশ্বস্ত সামৰিক কমাণ্ডাৰ চাৰ্জেই শোইগুক ৰক্ষা মন্ত্ৰালয়ৰ পৰা আঁতৰাই National Security Advisor পদত বহুৱাইছিল ।

ইফালে পুটিনৰ এই ভ্ৰমণৰ বাবে আমেৰিকাকে ধৰি বিশ্বৰ সকলো দেশেই দৃষ্টি নিবদ্ধ ৰাখিছে। কিয়নো এই ভ্ৰমণৰ ফলত হব পৰা ভাৰতৰ পক্ষে চুক্তি তথা বিভিন্ন ধৰণৰ আনুষংগিক সিদ্ধান্তই সম্ভৱতঃ ভাৰতক এঢাপ আগুৱাই নিবলৈ সক্ষম হব । এতিয়া সকলোৱে অপেক্ষা কৰিব পুটিনৰ ভ্ৰমণৰ ফলাফললৈ ।

লগতে পঢ়ক : আজি ভাৰতলৈ আহিব ৰাছিয়াৰ ৰাষ্ট্ৰপতি; পুটিনক আদৰিবলৈ সাজু নতুন দিল্লী

দুদিনীয়া ভ্ৰমণসূচীৰে আজি ভাৰতত উপস্থিত হব ৰাছিয়াৰ ৰাষ্ট্ৰপতি ভ্লাদিমিৰ পুটিন । ৰাষ্ট্ৰপতিগাৰীক আদৰিবলৈ সাজু হৈ উঠিছে নতুন দিল্লী ।

দুদিনীয়া ভ্ৰমণসূচীৰে বৃহস্পতিবাৰে ভাৰতত উপস্থিত হ’ব ৰাছিয়াৰ ৰাষ্ট্ৰপতি ভ্লাদিমিৰ পুটিন । সন্ধিয়া প্ৰায় ৬ বজাত ভাৰতত উপস্থিত হ’ব ৰাছিয়াৰ ৰাষ্ট্ৰপতিগৰাকী । প্ৰধানমন্ত্ৰী নৰেন্দ্ৰ মোদীয়ে পুটিনৰ সন্মানাৰ্থে এক ব্যক্তিগত নৈশ ভোজৰ আয়োজন কৰিব । যি সময়ত আমেৰিকাৰ সৈতে ভাৰতৰ সম্পৰ্কৰ তীব্ৰ অৱনতি ঘটিছে, সেই সময়তে ভাৰত-ৰাছিয়াৰ কৌশলগত আৰু অৰ্থনৈতিক অংশীদাৰিত্ব শক্তিশালী কৰাটোৱেই হৈছে পুটিনৰ এই ভ্ৰমণৰ সামগ্ৰিক উদ্দেশ্য ।

পুটিনৰ ভ্ৰমণৰ দ্বিতীয় দিন, শুকুৰবাৰে অনুষ্ঠিত হ’বলগীয়া শীৰ্ষ সন্মিলনত প্ৰতিৰক্ষা সহযোগিতা বৃদ্ধি, বাহ্যিক চাপৰ পৰা দ্বিপাক্ষিক বাণিজ্যক সুৰক্ষা দিয়া আৰু সৰু মডিউলাৰ ৰিয়েক্টৰত সম্ভাৱ্য সহযোগিতাৰ ওপৰত গুৰুত্ব আৰোপ কৰা হ’ব । পশ্চিমীয়া দেশসমূহে এই আলোচনাৰ ওপৰত তীক্ষ্ণ দৃষ্টি ৰাখিব ।

ৰাছিয়াৰ ৰাষ্ট্ৰপতিৰ ভ্ৰমণসূচী-

-বৃহস্পতিবাৰে সন্ধিয়া ৬ বজাত পুটিন দিল্লীত উপস্থিত হোৱাৰ সম্ভাৱনা আছে ।

-ৰাতি প্ৰধানমন্ত্ৰী নৰেন্দ্ৰ মোদীৰ সৈতে নৈশ আহাৰ গ্ৰহণ কৰিব ৰাছিয়াৰ ৰাষ্ট্ৰপতিয়ে ।

-শুকুৰবাৰে পুৱা ৯:১৫ বজাত ৰাষ্ট্ৰপতি ভৱনত পুটিনক আনুষ্ঠানিকভাৱে আদৰণি জনোৱা হ’ব ।

-মহাত্মা গান্ধীক শ্ৰদ্ধাঞ্জলি জনাবলৈ ৰাজঘাট ভ্ৰমণ কৰিব পুটিনে ।

-হায়দৰাবাদ হাউছত প্ৰধানমন্ত্ৰী মোদী আৰু ৰাষ্ট্ৰপতি পুটিনৰ মাজত বাৰ্ষিক শীৰ্ষ সন্মিলন ।

-ভাৰত মণ্ডপমত ভাৰত-ৰাছিয়া ফ’ৰামৰ বৈঠক ।

-ৰাষ্ট্ৰপতি ভৱনত কাৰ্যসূচী ।

-ৰাছিয়ালৈ ৰাওনা হ’ব পুটিন ।

মোদী-পুটিনৰ শীৰ্ষ সন্মিলনঃ

শুকুৰবাৰে পুটিনক আনুষ্ঠানিকভাৱে আদৰণি জনোৱাৰ পিছত পুৱা ১১ বজাত ২৩ সংখ্যক ভাৰত-ৰাছিয়া শীৰ্ষ সন্মিলন অনুষ্ঠিত হ’ব । ভাৰতে ৰাছিয়াৰ খাৰুৱা তেল বৃহৎ পৰিমাণে ক্ৰয়ৰ কৰাৰ বাবে বৃদ্ধি পোৱা বাণিজ্যিক ঘাটিৰ বিষয়টো শীৰ্ষ সন্মিলনত উত্থাপন হোৱাৰ সম্ভাৱনা আছে । হায়দৰাবাদ হাউচত প্ৰধানমন্ত্ৰী মোদীয়ে পুটিন আৰু তেওঁৰ প্ৰতিনিধি দলৰ বাবে দুপৰীয়াৰ আহাৰো আয়োজন কৰিব আৰু শুকুৰবাৰে পুৱা পুটিনে ৰাজঘাটো ভ্ৰমণ কৰিব । শীৰ্ষ সন্মিলনৰ পিছতে পুটিনে ৰাছিয়াৰ ৰাষ্ট্ৰীয় সম্প্ৰচাৰক প্ৰতিষ্ঠানটোৰ ভাৰতৰ চেনেল মুকলি কৰিব, তাৰ পিছত তেওঁৰ সন্মানত ৰাষ্ট্ৰপতি দ্ৰৌপদী মুৰ্মুৱে ৰাজকীয় ভোজৰ আয়োজন কৰিব । প্ৰায় ২৮ ঘণ্টীয়া ভ্ৰমণৰ অন্তত শুকুৰবাৰে নিশা প্ৰায় ৯:৩০ বজাত ভাৰতৰ পৰা ৰাছিয়া অভিমুখে যাত্ৰা কৰিব পুটিনে ।

-প্ৰতিৰক্ষা সম্পৰ্কৰ পৰ্যালোচনাৰ সম্ভাৱনা আছে ।

-এছ-৪০০ ক্ষেপণাস্ত্ৰৰ নতুন বেচ ক্ৰয়ৰ বাবে বিবেচনা চলি আছে ।

-ৰাছিয়াৰ পৰা নতুন প্ৰজন্মৰ এছ-৫০০ ক্ষেপণাস্ত্ৰ প্ৰতিৰক্ষা ব্যৱস্থা ক্ৰয় কৰাৰ বাবে বিবেচনা চলি আছে ।

-ৰাছিয়াৰ চুখয়-৫৭ যুদ্ধ বিমান যোগান ধৰাৰ সম্ভাৱনাৰ বিষয়ে আলোচনা হ’ব পাৰে ।

-চুখয়-৩০ যুদ্ধ বিমানৰ আধুনিকীকৰণ আৰু অন্যান্য জটিল সামৰিক সঁজুলি ক্ৰয়ৰ ক্ষেত্ৰতো আলোচনাৰ সম্ভাৱনা ।

-বাণিজ্যিক সম্পৰ্কক নতুন উচ্চতালৈ উন্নীত কৰাৰ বাবে আলোচনা ।

-ভাৰত আৰু ৰাছিয়াই আমেৰিকান ডলাৰৰ ওপৰত নিৰ্ভৰশীলতা দূৰ কৰিবলৈ নিজৰ মুদ্ৰাৰ ব্যৱসায়ৰ ব্যৱস্থা গঢ়ি তোলাৰ কথা চিন্তা কৰিব পাৰে ।

-ৰাছিয়ালৈ ভাৰতীয় সামগ্ৰীৰ ৰপ্তানি বৃদ্ধিৰ সন্দৰ্ভতো আলোচনা হোৱাৰ সম্ভাৱনা আছে ।

-১০ লাখ দক্ষ ভাৰতীয় পেছাদাৰীক নিয়োগ কৰিবলৈ দুয়োখন দেশৰ মাজত শ্ৰমিক গতিশীলতাৰ চুক্তি হ’ব পাৰে ।

-শক্তি, জলবায়ু পৰিৱৰ্তন, নতুন শক্তি, দুৰ্যোগ ব্যৱস্থাপনা আৰু শিক্ষাৰ দৰে ক্ষেত্ৰতো ৰাছিয়াৰ সৈতে বহু নতুন চুক্তি বা পুৰণি চুক্তিৰ নবীকৰণ কৰাৰ সম্ভাৱনা আছে ।

লগতে পঢ়ক : তেওঁলোকৰ উদ্দেশ্য শান্তি নহয়… ভাৰত ভ্ৰমণৰ পূৰ্বে ইউৰোপীয় দেশসমূহক লক্ষ্য কৰি ক’লে পুটিনে