ভাৰত ভ্ৰমণৰ পূৰ্বে ইউৰোপীয় দেশসমূহক লক্ষ্য কৰি ল’লে ৰাছিয়াৰ ৰাষ্ট্ৰপতি পুটিনে
ইউক্ৰেইনত যুদ্ধৰ অন্ত পেলাবলৈ চলি থকা আন্তঃৰাষ্ট্ৰীয় প্ৰচেষ্টা সন্দৰ্ভত ৰাছিয়াৰ ৰাষ্ট্ৰপতি ভ্লাদিমিৰ পুটিনে এক শক্তিশালী বিবৃতি প্ৰকাশ কৰি কয় যে ইউৰোপীয় দেশসমূহে ইচ্ছাকৃতভাৱে শান্তিৰ দিশত লোৱা পদক্ষেপসমূহ বিধ্বস্ত কৰিছে । পুটিনে অভিযোগ কৰে যে ইউৰোপে আমেৰিকাৰ নেতৃত্বত শান্তি প্ৰক্ৰিয়াত বাধাৰ সৃষ্টি কৰিছে আৰু যুদ্ধৰ অন্ত পেলোৱাৰ দিশত কোনো ইতিবাচক উদ্দেশ্য প্ৰদৰ্শন কৰা নাই ।
আমেৰিকাৰ বিশেষ দূত ষ্টিভ উইটকফ আৰু ৰাষ্ট্ৰপতি ট্ৰাম্পৰ জোঁৱাই জেৰেড কুছনাৰৰ সৈতে হোৱা বৈঠকৰ পিছতে মস্কোত বিনিয়োগ মঞ্চত ভাষণ দি পুটিনে এই মন্তব্য কৰে । পুটিনে আঙুলিয়াই দিয়ে যে ইউৰোপীয় দেশসমূহে যোৱা কেইসপ্তাহমানৰ পৰা গতি লাভ কৰা আমেৰিকাৰ নেতৃত্বত শান্তি প্ৰস্তাৱসমূহৰ ক্ষেত্ৰত উল্লেখযোগ্য পৰিৱৰ্তন সাধন কৰিছে, যিটো ৰাছিয়াই কোনো কাৰণতে মানি ল’ব নোৱাৰে ।
ইউৰোপৰ উদ্দেশ্য শান্তি নহয়- পুটিন
পুটিনে অভিযোগ কৰে যে ইউৰোপীয় দেশসমূহে শান্তিৰ এজেণ্ডা বিচৰা নাই, বৰঞ্চ “যুদ্ধৰ পক্ষত থিয় দিছে” । তেওঁ কয় যে ইউৰোপে ৰাছিয়াৰ স্বাৰ্থ বিৰোধী প্ৰস্তাৱ অহৰহ আগবঢ়াই আহিছে আৰু ইয়াৰ প্ৰকৃত লক্ষ্য আলোচনা আগবঢ়াই নিয়া নহয় বৰঞ্চ ইয়াক বাধা দিয়াহে । পুটিনৰ মতে ইউৰোপৰ এই কাৰ্য্য ৰাছিয়াক দোষী হিচাপে চিত্ৰিত কৰাৰ কৌশলৰ অংশ, আনহাতে আচলতে ইয়েই এই প্ৰক্ৰিয়াটোক বাধা দি আছে ।
শান্তি প্ৰক্ৰিয়া স্থবিৰ হৈ পৰিছে- পুটিন
ৰাছিয়াৰ ৰাষ্ট্ৰপতিগৰাকীয়ে কয় যে ইউৰোপীয় দেশসমূহে শান্তি প্ৰস্তাৱসমূহত সংশোধনী সংযোজন কৰিছে যিবোৰ ৰাছিয়াৰ বাবে “সম্পূৰ্ণৰূপে গ্ৰহণযোগ্য নহয়” । তেওঁ কয় যে এই পৰিৱৰ্তনে শান্তি প্ৰক্ৰিয়াটো কাৰ্যতঃ স্তব্ধ কৰি পেলাইছে । ইউৰোপে ইচ্ছাকৃতভাৱে এই প্ৰক্ৰিয়াত বাধাৰ সৃষ্টি কৰিছে আৰু তাৰ পিছত ৰাছিয়াক দোষাৰোপ কৰি বিশ্বক বিপথে পৰিচালিত কৰিবলৈ চেষ্টা কৰিছে বুলি পুটিনে দাবী কৰে ।
ট্ৰাম্প প্ৰশাসনৰ সৈতে ৰাছিয়াৰ আলোচনা-
ট্ৰাম্প হোৱাইট হাউছলৈ ঘূৰি অহাৰ পিছৰে পৰা আমেৰিকা আৰু ৰাছিয়াৰ মাজত শান্তি আলোচনা ত্বৰান্বিত হৈছে । যোৱা কেইমাহমানৰ পৰা যুদ্ধৰ অন্ত পেলোৱাৰ বাবে ৱাশ্বিংটনে নতুন পদক্ষেপ হাতত লৈছে । পুটিনে কয় যে ইউৰোপে এই প্ৰচেষ্টাসমূহত বাধাৰ সৃষ্টি কৰিছে । ৰাছিয়াই বাৰে বাৰে কৈ আহিছে যে প্ৰস্তাৱসমূহ ন্যায্য হ’লেহে আলোচনা চলিব আৰু কোনো পক্ষৰ ওপৰত একপক্ষীয় হেঁচা প্ৰয়োগ কৰিব নালাগে ।
লগতে পঢ়ক : দুদিনীয়া ভ্ৰমণসূচীৰে ভাৰতলৈ আহিব ৰাছিয়াৰ ৰাষ্ট্ৰপতি পুটিন; বাৰ্ষিক শীৰ্ষ সন্মিলনত কৰিব অংশগ্ৰহণ
