মুদ্ৰাস্ফীতি আৰু পশ্চিম এছিয়াৰ সংকটৰ মাজতে পুনৰ অপৰিৱৰ্তিত থাকিল ৰেপ’ ৰেট
মুদ্ৰাস্ফীতিৰ চিন্তাৰ মাজতে ভাৰতীয় ৰিজাৰ্ভ বেংকে গ্ৰহণ কৰিছে এক গুৰুত্বপূৰ্ণ সিদ্ধান্ত
গোলকীয় অনিশ্চয়তা আৰু মুদ্ৰাস্ফীতিৰ চিন্তাৰ মাজতে ভাৰতীয় ৰিজাৰ্ভ বেংকে গ্ৰহণ কৰিছে এক গুৰুত্বপূৰ্ণ সিদ্ধান্ত । শুকুৰবাৰে ৰিজাৰ্ভ বেংকৰ মুদ্ৰানীতি সমিতিয়ে (MPC) সৰ্বসন্মতিক্ৰমে দেশৰ নীতিগত ৰেপ’ ৰেট ৫.২৫ শতাংশতে অপৰিৱৰ্তিত ৰখাৰ কথা ঘোষণা কৰে । ইয়াৰ সৈতে বেংকে নিজৰ নিৰপেক্ষ নীতিগত স্থিতিও বাহাল ৰাখিছে ।
আৰ.বি.আই.ৰ গভৰ্ণৰ সঞ্জয় মালহোত্ৰাই এই সিদ্ধান্ত ঘোষণা কৰি কয় যে বৰ্তমানৰ সামগ্ৰিক অৰ্থনৈতিক আৰু বিত্তীয় পৰিস্থিতিৰ পুঙ্খানুপুঙ্খ পৰ্যালোচনাৰ অন্তত এই পদক্ষেপ লোৱা হৈছে । মুদ্ৰানীতি সমিতিৰ আটাইকেইগৰাকী সদস্যই তাৰল্য সমাঞ্জস্য সুবিধাৰ অধীনত ৰেপ’ ৰেট পূৰ্বৰ দৰেই ৰাখিবলৈ সৰ্বসন্মত ভোটদান কৰে ।
বিভিন্ন সূচকৰ বৰ্তমানৰ হাৰ :
গভৰ্ণৰগৰাকীৰ ঘোষণা অনুসৰি নতুন নিৰিখসমূহ হ’ল—
-ৰেপ’ ৰেট : ৫.২৫%
-ষ্টেণ্ডিং ডিপজিট ফেচিলিটি (SDF): ৫.০০%
-মাৰ্জিনেল ষ্টেণ্ডিং ফেচিলিটি (MSF): ৫.৫০%
-বেংক ৰেট : ৫.৫০%
সিদ্ধান্তৰ আঁৰৰ মূল কাৰণসমূহ :
বিশ্ব অৰ্থনীতিৰ প্ৰত্যাহ্বানমূলক পৰিৱেশৰ কথা উল্লেখ কৰি গভৰ্ণৰ সঞ্জয় মালহোত্ৰাই কয় যে বৰ্তমান গোলকীয় বজাৰত যথেষ্ট অনিশ্চয়তা আছে ।
“গোলকীয় অৰ্থনীতি বৰ্ধিত অনিশ্চয়তা, গুৰুত্বপূৰ্ণ ব্যৱসায়িক পথ তথা যোগান শৃংখলত ব্যাঘাত, বজাৰৰ অস্থিৰতা আৰু সতৰ্ক ব্যৱসায়িক মনোভাৱৰ দ্বাৰা প্ৰভাৱিত হৈছে । পিছে ভাৰতীয় অৰ্থনীতিয়ে পূৰ্বৰ তুলনাত বহুত শক্তিশালী ভেটি লৈ এই গোলকীয় অস্থিৰতাৰ পৰ্যায়ত প্ৰৱেশ কৰিছে ।”
তেওঁ লগতে কয় যে পশ্চিম এছিয়াত চলি থকা ভূ-ৰাজনৈতিক অচলাৱস্থা, ইন্ধনৰ ক্ৰমবৰ্ধমান মূল্য আৰু বিশ্বজুৰি হোৱা যোগান শৃংখলৰ ব্যাঘাত আদিয়ে গোলকীয় অৰ্থনীতিলৈ বিপদ নমাই আনিছে । এনে পৰিপ্ৰেক্ষিতত বিশ্বৰ ডাঙৰ ডাঙৰ কেন্দ্ৰীয় বেংকসমূহে বিকাশ আৰু মুদ্ৰাস্ফীতি নিয়ন্ত্ৰণৰ মাজত সমতা ৰক্ষা কৰিবলৈ যথেষ্ট সংগ্ৰাম কৰিবলগীয়া হৈছে । আনকি উন্নত দেশৰ কেন্দ্ৰীয় বেংকসমূহে আগলৈ মুদ্ৰা সংকুচিতকৰণৰ নীতিও ল’ব পাৰে ।
শ্বেয়াৰ বজাৰ বনাম বণ্ড বজাৰ :
গোলকীয় বজাৰৰ বৰ্তমানৰ স্থিতি সন্দৰ্ভত তেওঁ কয় যে আৰ্টিফিচিয়েল ইণ্টেলিজেন্স চালিত বিকাশক লৈ থকা আশাবাদৰ বাবে বিশ্বৰ শ্বেয়াৰ বজাৰসমূহ এতিয়াও সজীৱ হৈ আছে । কিন্তু আনফালে, নতুন মুদ্ৰাস্ফীতিৰ চিন্তা আৰু ঋণৰ বোজাৰ বাবে গোলকীয় বণ্ড বজাৰসমূহ বৰ্তমান তীব্ৰ চাপৰ মাজত আছে ।
উল্লেখ্য যে, ইয়াৰ পূৰ্বে যোৱা এপ্ৰিল মাহত অনুষ্ঠিত হোৱা মুদ্ৰানীতি সমিতিৰ বৈঠকত একেধৰণৰ সিদ্ধান্ত লোৱা হৈছিল । সেইবাৰো সমিতিয়ে সৰ্বসন্মতিক্ৰমে ৰেপ’ ৰেট ৫.২৫ শতাংশতে অপৰিৱৰ্তিত ৰখাৰ লগতে নিৰপেক্ষ নীতি বাহাল ৰখাৰ সপক্ষে ৰায় দিছিল ।
লগতে পঢ়ক : পশ্চিম এচিয়াৰ সংঘাতৰ আশংকাৰ মাজতো ভাৰতৰ অৰ্থনীতিৰ বাবে আশাব্যঞ্জক খবৰ